Namumutan na mga Kapwa Parahayag kan Maugmang Bareta:

Dakulaon nanggad na pribilehiyo niyato na magkasararo sa pagsamba sa saro sanang tunay na Diyos, si Jehova! Kita an saiyang “mga kapwa trabahador,” na pinagkatiwalaan kan sagrado asin nagliligtas-buhay na gibuhon na paghuhulit asin pagtutukdo kan maugmang bareta manungod sa saiyang naestablisar nang Kahadian. (1 Cor. 3:9; Mat. 28:19, 20) Para magibo an pambilog na kinaban na gibuhon na ini na may katuninungan asin pagkasararo, dapat na magin organisado kita.—1 Cor. 14:40.

Makakatabang saimo an librong ini na masabutan kun paano naghihiro ngunyan an Kristiyanong kongregasyon. Ipinapaliwanag kaini an mga pribilehiyo asin mga paninimbagan mo bilang sarong Saksi ni Jehova. Kun papahalagahan mo an saimong mga pribilehiyo asin gigibuhon mo an saimong mga paninimbagan, ‘mapapakusog an pagtubod’ mo.—Gibo 16:4, 5; Gal. 6:5.

Kaya dinadagka mi ika na pag-adalan na marhay an librong ini. Maghanap nin mga paagi kun paano mo masusunod an mga impormasyon digdi. Halimbawa, kun ika bago pa lang na magin dai pa bawtisadong parahayag, ano an mga dapat mong gibuhon para mabawtismuhan bilang Saksi ni Jehova? Kun ika man bawtisado na, ano an magigibo mo para umuswag an saimong espirituwalidad asin mapahiwas an saimong paglilingkod ki Jehova? (1 Tim. 4:15) Paano ka makakatabang na mapagdanay an katuninungan kan kongregasyon? (2 Cor. 13:11) Hanapon sa librong ini an simbag sa mga hapot na iyan.

Kun ika bawtisadong brother, ano an magigibo mo para makuwalipikar na magin ministeryal na lingkod asin magin elder pag-abot nin panahon? Ribo-ribong baguhan an padagos na nagraralaog sa organisasyon nin Diyos, kaya nangangaipong marhay nin kuwalipikadong mga brother na manginginot. Makakatabang saimo an librong ini na maaraman kun ano an mga ‘paghihinguwang’ dapat mong gibuhon para maabot an espirituwal na mga pasuhan na ini.—1 Tim. 3:1.

Udok ming ipinapamibi na lugod makatabang saimo an librong ini para masabutan an papel mo sa areglo ni Jehova asin mapahalagahan mo iyan. Namumutan ming marhay kamo gabos asin padagos ming ipinapamibi na lugod mapabilang kamo sa mga mag-uugma sagkod pa man sa pagsamba sa satuyang Ama sa langit, si Jehova.—Sal. 37:10, 11; Isa. 65:21-25.

SA BILOG na kinaban, dakul na organisasyon nin relihiyon, pulitika, komersiyo, asin sosyedad na iba-iba an karakteristiko, katuyuhan, punto de vista, saka pilosopiya. Pero may sarong organisasyon na risang-risa an pagkakalain sa gabos na iba pa. Malinaw na ipinapamidbid kan Tataramon nin Diyos na iyan iyo an Mga Saksi ni Jehova.

² Nakakaugma ta kabilang ka na ngunyan sa organisasyon ni Jehova. Napatunayan mo mismo kun ano an kabutan nin Diyos kaya ginigibo mo na iyan ngunyan. (Sal. 143:10; Roma 12:2) Ika aktibong ministro na naglilingkod kaiba kan mamumuton asin pambilog na kinaban na kasararuan nin magturugang. (2 Cor. 6:4; 1 Ped. 2:17; 5:9) Siring kan ipinanuga sa Tataramon nin Diyos, nagtatao ini sa saimo nin abundang bendisyon asin dakulang kaugmahan. (Tal. 10:22; Mar. 10:30) Paagi sa maimbod na paggibo ngunyan kan kabutan ni Jehova, inaandam ka na para sa nagdadanay asin mamuraway na puturo.—1 Tim. 6:18, 19; 1 Juan 2:17.

³ An satong Kahuruhalangkawing Kaglalang igwa nin daing kaagid na pambilog na kinaban na organisasyon na pinapamahalaan sa teokratikong paagi. An buot sabihon pinapamahalaan iyan ni Jehova, na iyo an Payo kan gabos. Lubos an kumpiyansa ta sa saiya. Siya an satong Hukom, satong Paratao nin Katugunan, asin satong Hadi. (Isa. 33:22) Huling siya aregladong Diyos, naggibo siya nin mga areglo tanganing kita ‘makagibo kaiba niya’ sa pag-utob kan saiyang katuyuhan.—2 Cor. 6:1, 2.

⁴ Mantang parani nang parani an katapusan kan presenteng sistema nin mga bagay, nag-aabante kita sa panginginot kan nombradong Hadi, si Cristo Jesus. (Isa. 55:4; Kap. 6:2; 11:15) Siya mismo an naghula na an saiyang mga parasunod magibo nin urog pa kisa sa mga nagibo niya sa panahon kan saiyang ministeryo digdi sa daga. (Juan 14:12) Magigin totoo iyan huling mas halawig an panahon ninda asin magdadakul sinda, kaya mas mahiwas an teritoryong maaabot ninda. Ibabalangibog ninda an maugmang bareta kan Kahadian sagkod sa pinakaharayong parte kan daga.—Mat. 24:14; 28:19, 20; Gibo 1:8.

⁵ Talagang nangyayari na ini ngunyan. Minsan siring, arog kan malinaw na sinabi ni Jesus, an pagpahayag kan maugmang bareta matatapos sa itinalaan na panahon ni Jehova. An gabos na propesiya sa Tataramon nin Diyos manungod sa dakula asin makangangalas na aldaw ni Jehova nagpaparisang harani na iyan.—Joel 2:31; Sof. 1:14-18; 2:2, 3; 1 Ped. 4:7.

⁶ Huling nasasabutan ta kun ano an kabutan ni Jehova sa huring parteng ini kan mga aldaw, kaipuhan na urog pa kitang maghinguwa sa paggibo kan kahagadan nin Diyos. Kaya dapat na aram tang marhay kun paano naghihiro an organisasyon nin Diyos asin lubos kitang makikooperar diyan. An paghiro kaiyan nakabasar sa mga prinsipyo sa Kasuratan, kaiba na an mga katugunan, pagbuot, regulasyon, asin katukduan na yaon sa ipinasabong na Tataramon nin Diyos.—Sal. 19:7-9.

⁷ Pag sinusunod kan mga lingkod ni Jehova an siring na paggiya na basado sa Bibliya, namumuhay asin nagtatarabangan sinda na may katuninungan saka pagkasararo. (Sal. 133:1; Isa. 60:17; Roma 14:19) Ano an nagpapakusog sa pagkasararo kan satong mga tugang sa gabos na lugar? Pagkamuot. Iyan an nagmomotibar sa sato asin sulot ta iyan. (Juan 13:34, 35; Col. 3:14) Huling pinagkakasararo kita