Pagkamoot—An Pinakaliabe sa Mabungang Ministeryo
1 “Madia kamo sa sako, . . . asin papaginhawahon ko kamo.” (Mat. 11:28) An siring na managom na mga tataramon nagpapabanaag kan hararom na pagkamoot ni Jesus sa mga tawo. Bilang Kristianong mga ministro, mawot niatong arogon si Jesus sa pagpaheling kan satong pagkamoot sa mga tawo na pagal-pagal huli sa sarong kinaban na daing pagkamoot. Paano daw niato magigibo iyan mantang sinasabi niato sa iba an maogmang bareta?
2 Paagi sa Tataramon: Pagkamoot sa mga tawo an nagpahiro ki Jesus na aprobetsaran an gabos na oportunidad na sabihon sa iba an maogmang bareta. (Juan 4:7-14) Pagkamoot an matabang sa sato na mapaglabanan an pag-alangan na magpatotoo nin impormal. An sarong sais anyos na aking babae nakapagtao nin marahay na patotoo sa sarong babae na kataed nia sa sarong kuartong halatan para sa pagpabolong. Ano an nagpahiro sa saiya na gibohon iyan? Sia nagpaliwanag, “An babae garo baga nagkakaipo na makaaram manongod ki Jehova.”
3 Puede niatong ipahayag an satong interes sa mga tawo paagi sa sinsero, mamomoton na huyom asin makikatood na tono nin boses. Nagpapaheling man nin pagkamoot an paghinanyog nin maingat sa mga komento nin iba, pagrekonoser sa saindang mga ikinakapurisaw, asin pagpahayag nin tunay na personal na interes. (Tal. 15:23) Bilang pag-arog ki Jesus, maninigo niatong idoon an nakakaparigon sa boot na mensahe kan Kahadean asin an mamomoton na pagmalasakit ni Jehova sa mga tawo.—Mat. 24:14; Luc. 4:18.
4 Paagi sa Gibo: Mapagrisa si Jesus sa mga pangangaipo nin iba sa praktikal asin materyal na mga paagi. (Mat. 15:32) Puede man kitang magkaigwa nin mga oportunidad na gumibo nin mga akto nin mamomoton na kabootan mientras na nasa ministeryo. Naobserbaran nin sarong tugang na babae an sarong babae na nasasakitan na saboton an sarong importanteng apod sa telepono. Nagboluntaryo an satong tugang na babae na tumabang na saboton an mga tataramon kan nag-aapod. An mamomoton na aktong ini nagbukas kan dalan para sa sarong pag-orolay na sono sa Kasuratan na nakatabang sa babae na umako nin pag-adal sa Biblia. Sa saro pang pangyayari, an sarong tugang na lalaki na nagdadalaw liwat naabotan na nauuyam an kagharong huli ta dai kaini ikinakalaog sa pinto an sarong magabat na muebles. Pagkatapos na tabangan an kagharong, dai nahaloy nagtutukaw na an tugang sa sopa na ikinalaog sa tabang nia asin nakapoon na sia nin pag-adal sa Biblia sa may pag-apresyar na lalaki.
5 Mantang kita nakikikabtang sa ministeryo, ipinapaheling niato an satong pagkamoot sa Dios asin an satong pagkamoot sa kapwa. (Mat. 22:36-40) An siring na pagpaheling nin pagkamoot paagi sa tataramon asin gibo nakakatabang sa mga sadiosan an puso na marealisar na yaon sa sato an katotoohan.