Dios. Dugang pa, an pantubos nagbubukas kan dalan para sa pagkabuhay liwat kan mga gadan pasiring sa bagong kinaban nin Dios. Magigin kabilang dian an maimbod na mga lingkod nin Dios na nagadan bago magbayad si Jesus kan pantubos asin pati an dakol na nagadan na ignorante asin dai nagsamba sa Saiya. An Biblia nagsasabi: “Magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Sa panahon na iyan, basado sa pantubos, itatao ni Jehova sa gabos na makinuyog na tawo an buhay na daing katapusan. (Juan 3:36) Ipinaliwanag mismo ni Jesus: “An Dios namoot na gayo sa kinaban na itinao nia an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” (Juan 3:16) An gabos na pakinabang na ini makakamtan kan katawohan huli sa probisyon nin Dios na atang na pantubos.

Minsan siring, an pambihirang bagay manongod sa pantubos bakong an mga pakinabang na inaako niato gikan dian. An may mas dakulang importansia iyo an nagigibo kan pantubos ni Cristo para sa ngaran ni Jehova. Iyan nagpapatunay na si Jehova sarong Dios nin sangkap na hustisya na puedeng mangunlabot sa makasalan na mga tawo asin magdanay pa man giraray na dalisay asin banal. Kun dai nagin katuyohan nin Dios na itao an pantubos, mayo kutana nin gikan ni Adan, minsan pa si Enoc, Noe, asin Abraham, na nakalakaw sa kaibanan ni Jehova o nagin saiyang katood. Narealisar ini kan salmista asin isinurat: “Kun mga sala an saimong binabantayan, O Jah, O Jehova, siisay an makakatindog?” (Salmo 130:3) Maninigo nanggad kitang magpasalamat ki Jehova huli sa pagsugo kan saiyang namomotan na Aki sa daga sagkod ki Jesus huli sa boluntad na pagtao kan saiyang buhay bilang pantubos para sa sato!​—Marcos 10:45.

Nagkakabunga an Marahay na Gawe-Gawe

SA SARONG saday na isla sa may timog kan Hapon, an sarong ina asin an saiyang tolong saradang na aki nagpoon na makipag-adal kan Biblia sa mga Saksi ni Jehova. Pakaheling kaini, an mga kataed sa napapasuway asin konserbatibong marhay na lugar na idto nagpoon na dai pag-intindihon an ina kada maheling ninda sia. “An orog pang makolog kisa sa dai ninda pag-intindi sa sako iyo an pagpalimanliman ninda sa sakong agom asin mga aki,” an isinaysay nia. Minsan siring, sinabi nia sa saiyang mga aki: “Kaipuhan niatong padagos na taratarahon an satong mga kataed para sa kapakanan ni Jehova.”​—Mateo 5:​47, 48.

Sa harong, tinokdoan nia an saiyang mga aki na magin magalang sa ibong nin pagsikwal. Mantang pasiring sa saindang regular na mga pagpasyar sa lokal na mga burabod na mainit, nag-ensayo an mga aki kan saindang mga pataratara sa laog kan kotse. Paglaog sa edipisyo, pirmeng maogmang ikinukurahaw kan mga aki an “Konnichiwa!”​—“Marahay na aldaw po!” Pasensioso na tinaratara nin padagos kan pamilya an gabos nindang nanunuparan, minsan ngani an reaksion kan mga kataed danay na bakong makikatood. Pero, dai malikayan kan mga tawo na mariparo an marahay na hiro-hiro kan mga aki.

Sa katapustapusi, an sarong kataed asin dangan an iba pa suminimbag na nin“Konnichiwa.” Sa katapusan kan duwang taon, haros gabos sa banwaan nagsisimbag na sa mga pataratara kan pamilya. Pinonan na man nindang taratarahon an lambang saro asin nagin na sindang mas makikatood. Gustong tawan kan bise-alkalde nin onra an mga aki huli sa saindang kabtang sa pagbabagong ini. Alagad inasegurar sia kan saindang ina na ginigibo sana ninda an maninigong gibohon nin mga Kristiano. Kan huri, sa sarong kompetisyon sa pagtaram para sa bilog na isla, isinaysay kan saro sa mga aking lalaki kun paano sinanay kan saiyang ina an pamilya na magalang na taratarahon an iba ano man an saindang reaksion. An saiyang pahayag nanggana nin primer premyo asin naimprenta sa peryodiko kan banwaan. Ngonyan, maogmahon an pamilya na an pagsunod sa Kristianong mga prinsipyo nagbunga nin siring na marahay na mga resulta. Mas pasil nanggad an pagpaabot kan maogmang bareta sa iba kun an mga tawo makikatood.