Mga Hapot Hale sa mga Parabasa

Ano an ipinanganino kan areglo kan taon nin Jubileo na sinambit sa ika-25 kapitulo kan Levitico?

Sinabi kan Ley ni Moises na “sa ikapitong taon maninigo na magkaigwa nin sabbath nin lubos na pahingalo para sa daga.” May labot sa taon na iyan, pinagbotan an mga Israelita: “An saimong oma dai mo pagsabwagan nin banhi, asin an saimong ubasan dai mo paghawanan. An tumubo hale sa naragrag na mga tipasi kan saimong inani dai mo pag-anihon, asin an mga ubas kan saimong dai nahawanan na mga poon nin ubas dai mo paggunoon. Maninigong magkaigwa nin sarong taon nin lubos na pahingalo para sa daga.” (Levitico 25:​4, 5) Sa siring, an kada ikapitong taon magigin taon nin Sabbath para sa daga. Asin an kada ika-50 taon, na kasunod na taon kan ikapitong taon nin Sabbath, iyo an magigin Jubileo. Ano an mangyayari sa taon na iyan?

Sinabihan ni Jehova an Israel paagi ki Moises: “Pakabanalon nindo an ikalimang polong taon asin ibalangibog an katalingkasan sa daga sa gabos na nag-eerok dian. Iyan magigin Jubileo para sa saindo, asin ibalik nindo an balang saro sa saiyang rogaring asin ibalik nindo an balang saro sa saiyang pamilya. An ikalimang polong taon na iyan magigin Jubileo para sa saindo. Dai kamo magsabwag nin banhi ni mag-ani kan tumubo sa daga hale sa naragrag na mga tipasi ni magguno kan mga ubas kan dai nahawanan na mga poon nin ubas kaiyan.” (Levitico 25:​10, 11) An Jubileo nangangahulogan nin ikaduwang magkasunod na taon nin Sabbath para sa daga. Alagad para sa mga nag-iistar dian, iyan nagtao nin katalingkasan. Bubutasan an siisay man na Judio na ipinabakal sa kaoripnan. An minanang rogaring na napiritan na ipabakal nin saro kaipuhan na ibuelta sa saiyang pamilya. An Jubileo kaipuhan na magin taon nin pagbabalik sa dati asin nin pakabutas para sa suanoy na Israel. Ano an ipinapanganino kaiyan para sa mga Kristiano?

An pagrebelde kan enot na tawo, si Adan, nagbunga nin pagkaoripon sa kasalan kan katawohan. An probisyon nin Dios sa pagpatalingkas sa katawohan hale sa pamomogol kan kasalan iyo an atang na pantubos ni Jesu-Cristo.a (Mateo 20:28; Juan 3:16; 1 Juan 2:​1, 2) Noarin pinapatalingkas sa ley nin kasalan an mga Kristiano? Kinakaolay an linahidan na mga Kristiano, si apostol Pablo nagsabi: “An ley kan espiritung iyan na nagtatao nin buhay dian ki Cristo Jesus nagtao sa saindo nin katalingkasan sa ley nin kasalan asin nin kagadanan.” (Roma 8:2) An mga may paglaom na mabuhay sa langit nag-ako kan katalingkasan na ini kan sinda lahidan kan banal na espiritu. Minsan ngani an saindang mga hawak laman pa asin bakong sangkap, ipinahayag sinda nin Dios na matanos asin inampon sinda bilang espirituwal na mga aki nia. (Roma 3:24; 8:​16, 17) Para sa mga linahidan bilang sarong grupo, an Kristianong Jubileo nagpoon kan Pentecostes 33 C.E.

Kumusta an “ibang karnero,” na may paglaom na mabuhay na daing katapusan sa daga? (Juan 10:16) Para sa ibang karnero, an Sangribong Taon na Paghade ni Cristo magigin panahon nin pagbabalik sa dati asin nin pakabutas. Durante kan Milenyal na Jubileong ini, gagamiton ni Jesus an mga pakinabang kan saiyang atang na pantubos sa nagtutubod na katawohan asin babaliktadon an mga epekto nin kasalan. (Kapahayagan 21:​3, 4) Sa katapusan kan Milenyal na Paghade ni Cristo, an katawohan makakaabot na sa pagkasangkap bilang tawo asin lubos nang magigin talingkas sa minanang kasalan asin kagadanan. (Roma 8:21) Kun magibo na iyan, an Kristianong Jubileo matatapos na.

[Nota sa Ibaba]

[Ritrato sa pahina 26]

An Milenyal na Jubileo​—sarong panahon nin pagbabalik sa dati asin nin pakabutas para sa “ibang karnero”

“An Gabos na Alisto an Isip Mahiro na May Kaaraman”

AN PAGGIYA kan Tataramon nin Dios, an Biblia, orog na ‘dapat na mawoton kisa bulawan​—kisa dakol na dalisay na bulawan.’ (Salmo 19:7-10) Taano? Huli ta “an ley kan madonong [si Jehova] burabod nin buhay, tanganing irayo an saro sa mga siod nin kagadanan.” (Talinhaga 13:14) Kun iinaaplikar, an konseho hale sa Kasuratan bako sanang pinaparahay an kalidad kan satong buhay kundi tinatabangan man kita kaiyan na malikayan an mga siod na nagsasapeligro kaiyan. Kanigoan kahalaga na hanapon niato an kaaraman sa Kasuratan asin humiro sono sa satong nanonodan!

Siring kan nakasurat sa Talinhaga 13:15-25, si Hadeng Salomon kan suanoy na Israel nagtao nin sadol na nagtatabang sato na humiro sono sa kaaraman tanganing magkaigwa kita nin mas marahay asin mas halawig na buhay.a Ginagamit an halipot na mga talinhaga, ipinapaheling nia kun paano kita matatabangan kan Tataramon nin Dios na kamtan an pabor nin iba, magdanay na maimbod sa satong ministeryo, magkaigwa nin tamang aktitud sa disiplina, asin madonong na pilion an satong mga kairiba. Sinambit man nia an pag-isip para sa ngapit paagi sa pagwalat nin pamana sa satong mga aki siring man an pagdisiplina sa sainda sa pagkamoot.

An Marahay na Pakarorop Nagkakamit nin Pabor

“An marahay na pakarorop mismo nagtatao nin pabor,” an sabi ni Salomon, “alagad an dalan kan mga naggigibo nin kadayaan garanggasangon.” (Talinhaga 13:15) An pananaram sa orihinal na lenguahe para sa “marahay na pakarorop,” o marahay na pakasabot, “naglaladawan kan pagigin may isip, marahay na paghusgar, asin madonong na mga opinyon,” an sabi nin sarong reperensia. An tawong igwa kan siring na mga kualidad dai nasasakitan na kamtan an pabor kan iba.