Pagpapahalaga sa Satong mga Lugar nin Pagsamba
1-3. Ano an nagmomotibar sa mga parasamba ki Jehova na magtao nin kontribusyon para sa saindang mga lugar nin pagsamba? Magtao nin mga halimbawa.
1 Sia haros 50 taon nang aktibo sa paglilingkod bilang Kristiano. Minsan ngani sia maluya na huli sa kagurangan, determinado siang magbisita sa bagong togdok na Kingdom Hall. Mantang nakasandig sa takyag nin sarong tugang, sia naglaog sa tiriponan asin naglakaw nin luway-luway alagad deretso pasiring sa saiyang tuyo—an kahon sa kontribusyon. Ihinulog nia dian an kadikit na kuarta na tinipon nia para sa katuyohan na ini. Minsan ngani dai sia makatabang sa pagtogdok kan tiriponan, gusto niang tumabang.
2 Ipinapagirumdom kaini sa sato an “dukhang babaeng balo” na naheling ni Jesus na naghulog nin duwang saradit na sinsilyo sa kaha sa templo. Sinabi nia na an sadit na kontribusyon kaini nangangahulogan kan “gabos na yaon sa saiya, an saiyang bilog na pagbuhay.”—Mar. 12:41-44.
3 Ano an nagmotibar sa duwang babaeng ini na magtao? Iyan an pagpapahalaga ninda sa lugar nin pagsamba na itinao ni Jehova. An kantidad na itinao ninda kadikit sana, alagad para ki Jehova ipinapaheling kaiyan kun gurano an pagpapahalaga ninda sa saiyang lugar nin pagsamba. Si Hadeng David nagpaheling nin kaparehong mapagpahalagang puso. Sa Salmo 27:4 sia nagsabi: “Sarong bagay an hinagad ko ki Jehova—iyan an sakong hahalaton, na ako makapag-erok sa harong ni Jehova sa gabos na aldaw kan sakong buhay, . . . asin tanganing masdan na may pagpahalaga an saiyang templo.” Ipinaheling nia an pagpapahalagang iyan paagi sa pagtao nin dakulang kontribusyon para sa pagtogdok kan templo.
4. Sa anong mga paagi niato ipinapaheling an pagpapahalaga sa satong Kingdom Hall?
4 Pagpaheling nin Pagpapahalaga Ngonyan: Igwa nin dakol na paagi ngonyan tanganing ipaheling an pagpapahalaga sa satong mga Kingdom Hall. Ipinapaheling niato iyan paagi sa satong paggubing kun nag-aatender sa mga pagtiripon, paagi sa satong magalang na paggawe durante kan mga pagtiripon, asin paagi sa pagtabang kun turno na niato na papagdanayon an Kingdom Hall na malinig asin nasa marahay na kondisyon. Minsan siring, an pagtao nin pinansial na kontribusyon kaidto pa saro nang kinakaipuhan na kabtang kan tunay na pagsamba asin nagpapaheling kun gurano niato pinapahalagahan an mga regalo ni Jehova sa sato. An pagtao sa paaging ini pirme nang nagigin gikanan nin dakulang kagayagayahan.—1 Cron. 29:9.
5. Anong mga areglo an ginibo kan Namamahalang Grupo tanganing ikatao an angay na mga lugar na pagtitiriponan?
5 Huli sa pagsunod sa prinsipyong sono sa Kasuratan dapit sa boluntaryong pagtatao, durante kan dekada nin 1980 pinonan na ialok an mga loan na mayo nin interes sa mga kongregasyon sa Pilipinas tanganing makapatogdok sinda nin bagong mga Kingdom Hall. Ginatos na bagong tiriponan an ikinatogdok paagi sa areglong ini. Dangan kan 1999, pinonan kan Namamahalang Grupo an sarong programa na gamiton an pondo hale sa mas mayaman na mga nasyon tanganing dugangan an pondo na ikinokontribwir sa lokal para sa pagtogdok nin mga Kingdom Hall sa mga nasyon na may limitadong kuarta. Poon kan 2001, nakinabang an Sangang Opisina sa Pilipinas sa programang ini asin sa presente nagresulta na iyan sa 656 na Kingdom Hall na ikinatogdok, sa siring nakikinabang an 885 kongregasyon. Gusto ming kuanon an oportunidad na ini tanganing itao sa saindo an pinakabagong impormasyon dapit sa duwang areglong ini.
6. Anong lakdang an kaipuhan na gibohon kun an sarong kongregasyon dai nagpapadara kan bilog na kantidad na ipinanuga ninda bilang bayad sa saindang loan sa pagpatogdok nin Kingdom Hall? Paano kun nagkapirang kongregasyon an kalabot?
6 An mga Igwa Pang Binabayadan na Loan sa Pagpatogdok nin Kingdom Hall: Durante kan dekada nin 1980 asin 1990, labing 1,000 loan an itinao tanganing ikatogdok an mga Kingdom Hall. Dakol sa mga ini an nabayadan na nin kompleto. Minsan siring, igwa pa nin 538 loan, na nagrerepresentar sa 699 kongregasyon, na dai pa nababayadan nin kompleto. An kada saro sa mga kongregasyon na ini naggibo nin nakasurat na resolusyon na nanunuga na kada bulan mabayad sinda nin sarong espesipikong kantidad. Ipinaparisa kan samong mga rekord na mga 40% sana kan total na kantidad na napagdesisyonan an ibinabayad sa sangang opisina kada bulan. Kun arog kaini an kamugtakan sa kongregasyon nindo, daing duwa-duwa na ipapaaram ini kan kamagurangan sa mga parahayag, tanganing maaraman ninda an pangangaipo asin magkaigwa sinda kan ‘pribilehio na maboot na magtao.’ (2 Cor. 8:4) Kun nagkapirang kongregasyon an nagbabayad kan loan, kaipuhan na magmiting an gabos na magurang sa kongregasyon tanganing maheling kun paano madudugangan kan kada kongregasyon an ibinabayad kaiyan tanganing ikapadara sa sangang opisina an bilog na kantidad na napagdesisyonan. Dangan an pondong ini gagamiton giraray sa pagtogdok nin dugang pang mga Kingdom Hall kun saen iyan kaipuhan.
7, 8. (a) Paano nagpaheling nin kaomaw-omaw na pagpapahalaga an mga kongregasyon durante kan pagtogdok kan saindang Kingdom Hall? (b) Sa anong duwang paagi padagos nindang ikakapaheling an pagpapahalagang iyan pagkatapos na itogdok an Kingdom Hall?
7 An mga Naggagamit nin mga Kingdom Hall na Sadiri kan Sangang Opisina: Kaomaw-omaw na ginagamit nin rinibong boluntaryo an saindang panahon asin abilidad, na sa parate nagtatrabaho sa hararayong lugar, tanganing magtogdok nin mga Kingdom Hall. Durante kan pagtogdok, an lokal na mga kongregasyon nagpaheling nin pagpapahalaga paagi sa pagtao nin kakanon para sa mga nagtatrabaho asin paggamit kan saindang kosog, na nakatabang na mainaan an gastos kan sangang opisina sa pagtogdok. Oras na matapos an sarong Kingdom Hall, paano padagos na ikakapaheling kan mga kongregasyon an saindang pagpapahalaga sa abundang regalong ini hale ki Jehova?
8 Ikakapaheling ninda ini sa duwang paagi: Enot, paagi sa regular na pagkontribwir sa pondo na gagamiton sa pagmantenir kan Kingdom Hall, tanganing iyan pirmeng malinig paghelingon asin magtao nin onra ki Jehova. Magkakaigwa nin pondo para sa pagmantenir na gagamiton kan operating committee asin siempre magibo nin iskedyul sa paglinig kan tiriponan. Ikaduwa, boluntad sindang mapasar nin resolusyon na magkontribwir sa sangang opisina nin sarong espesipikong kantidad kada bulan. Saen mapapaduman an kuartang ini? Mapasiring iyan sa Kingdom Hall Fund asin sa siring magagamit sa pagtogdok nin dugang pang mga Kingdom Hall. Mamomoton nanggad na areglo iyan! An mga may bagong Kingdom Hall ngonyan igwa nin oportunidad na ipaheling an saindang pagpasalamat paagi sa pagtabang na magtogdok nin mga lugar na pagtitiriponan para man sa iba.
9. Anong hatol ni Jesus an maninigong sunodon kan mga kongregasyon na dai nagpapadara kan bilog na kantidad na napagdesisyonan para sa saindang Kingdom Hall? Taano ta mahalaga ini?
9 Ipinapaheling kan samong mga rekord na dakol sa mga kongregasyon na ini an pirmeng nagpapadara kan kantidad na napagdesisyonan ninda kada bulan. Minsan siring, sa kabilogan 70% sana kan total na kantidad na napagdesisyonan kan 885 na kongregasyon an ipinapadara kada bulan sa sangang opisina. Kun an gabos regular na mapadara kan bilog na kantidad na napagdesisyonan ninda, mas dakol pang pondo an magagamit tanganing magtogdok nin mga Kingdom Hall sa ngapit. Mantang an lambang kongregasyon nagdesisyon na magtao nin sarong espesipikong kantidad, obligasyon ninda na sunodon an paggiya ni Jesus: “An saindong tataramon na Iyo mangahulogan sana nin Iyo.”—Mat. 5:37.
10. Taano ta maninigong dagdagan an kontribusyon mantang nagdadakula an kongregasyon?
10 Dakol na kongregasyon an nagrereport na nadagdagan an mga nag-aatender sa pagtiripon asin duminakula an kongregasyon pagkatapos na itogdok an bagong Kingdom Hall. Huli kaini, daing duwa-duwa na puedeng dagdagan kan nagkapira an kantidad na ipinapadara ninda sa sangang opisina kada bulan. Kun posible ini, maninigong magpresentar nin bagong resolusyon sa kongregasyon tanganing makapagdesisyon sinda na dagdagan an saindang bulanan na kontribusyon.
11. Taano ta an lambang indibiduwal maninigong gibohon an saiyang kabtang sa pinansial na pagsuportar sa Kingdom Hall?
11 An Lambang Indibiduwal Maninigong Makikabtang: Kan idusay niato an satong buhay ki Jehova, garo man sana sinasabi niato na an gabos na yaon sa sato, an gabos niatong kayamanan, sadiri nia. Si Tugang na C. T. Russell nagsurat kaidto: “An lambang saro dapat na mansayon an saiyang sadiri na ninombrahan kan Kagurangnan bilang pinagkatiwalaan kan saiya mismong panahon, impluwensia, kuarta, asin iba pa, asin an kada saro dapat na maghingoang gamiton an mga talentong ini sa saiyang pinakamakakaya, sa ikakamuraway kan Kagurangnan.” Bilang indibiduwal, baga man mayaman o dukha, nakikikabtang daw kita? An paagi daw kan paggamit niato kan satong kuarta nagpapaheling na an paglilingkod ki Jehova an pangenot na mahalaga sa sato?
12, 13. Anong regular na ugale an maninigong pataluboon nin mga indibiduwal asin pamilya? Paano minamansay ni Jehova an satong maogmang pagtatao?
12 Bilang pamilya, dinadagka mi an gabos na gibohon an isinurat ni Pablo sa 1 Corinto 16:2: “Sa kada enot na aldaw kan semana an lambang saro sa saindo sa saiyang sadiring harong magtagama na sono sa saiyang nakukua.” Mangnoha na ini sarong regular na ugale, sarong pamumuhay. Kun regular na nagtatao nin kontribusyon an mga magurang, iyan nagseserbing halimbawa para sa saindang mga aki. Siring man, dai na kakaipuhanon an dayaday na mga pagirumdom, huling ginigibo na kan lambang saro “an oyon sa napagdesisyonan nia sa saiyang puso, na bakong maraot sa boot o napipiritan.”—2 Cor. 9:7.
13 Iyo, kun an lambang indibiduwal, lambang pamilya, asin lambang kongregasyon nagtatao nin kontribusyon ‘oyon sa napagdesisyonan ninda sa saindang puso,’ na ginigibo iyan huli sa pagpasalamat sa inakong mga bendisyon, si Jehova maoogma nanggad, huling “an Dios namomoot sa maogmang paratao.”