ARAM MO DAW?

Makadlagan daw talaga sa Israel kaidtong panahon arog kan sinasabi sa Bibliya?

SINASABI sa Bibliya na may mga lugar sa Dagang Panuga na puro kadlagan asin ‘kaniguan kadakul’ nin kahoy. (1 Ha. 10:27; Jos. 17:15, 18) Pero huling mayo nang kahoy sa dakulang porsiyon kan Dagang Panuga ngunyan, nagdududa an iba kun talagang nagin makadlagan kaidto sa Israel.

An librong Life in Biblical Israel nagsasabi na “mas mahihiwas an kadlagan sa Israel kaidto kun ikukumparar ngunyan.” Dakul na porsiyon kan mga bulod an napapatos nin Aleppo pine (Pinus halepensis), evergreen oak (Quercus calliprinos), asin terebinth (Pistacia palaestina). Sa Sefela, sarong lugar na may hababang mga bulod na nasa pag-ultanan kan Baybayon nin Mediteraneo asin kan mabulod na rehiyon nin Juda, dakul man nin sikomorong higera (Ficus sycomorus).

An librong Plants of the Bible nagsasabi na an ibang lugar sa Israel ngunyan mayo na ni sarong kahoy. Taano? Ipinaliwanag kan libro kun paano padiit-diit na naubos an mga kahoy: “Pirming hinihiro kan mga tawo an kakahuyan, panginot na tanganing pahiwason an uma saka pasturan ninda, asin tanganing kumua nin mga panggatong saka materyales sa pagtutugdok.”