“Girumdoma Nindo an mga Aldaw na Nakaagi”—Taano?

“GIRUMDOMA nindo an mga aldaw na nakaagi.” An sadol na ini ni apostol Pablo, na isinurat kaidtong mga 61 C.E., ipinanongod sa mga Kristianong Hebreo sa Judea. (Hebreo 10:​32, The New English Bible) Ano an dahelan na isinurat an mga tataramon na ini? Taano ta kaipuhan kan mga nagsasambang idto ki Jehova kan enot na siglo na dai paglingawan an nakaagi? Puede daw kitang makinabang paagi sa paghimate sa kaparehong pagirumdom ngonyan?

Sa laog nin mga siglo, an mga kagsurat kan Biblia paorootrong nagpatanid tumang sa dai pag-intindi o dai pagtao nin atension sa nakaagi. An enot na mga panahon asin pangyayari dapat na girumdomon asin horophoropon. Minsan si Jehova nagsabi: “Girumdoma nindo an enot na mga bagay kaidtong haloy na panahon na an nakaagi, na ako an Banal na Saro asin mayo na nin ibang Dios, ni siisay man na kabaing ko.” (Isaias 46:9) Siyasaton niato an tolong mapuersang rason na kuyogon an sadol na ini.

Motibasyon Asin Pamparigon sa Boot

Enot, iyan puedeng magin dakulang gikanan nin motibasyon asin pamparigon sa boot. Kan isurat ni Pablo an saiyang surat sa Hebreong kongregasyon, sinusuratan nia an mga kapwa Kristiano na aroaldaw kaipuhan na baloon an saindang pagtubod huli sa pagtumang kan mga Judio. Bilang pagmidbid sa saindang pangangaipo na magkaigwa nin pakatagal, si Pablo nagsabi: “Padagos nindong girumdomon an enot na mga aldaw kan, pakatapos na kamo naliwanagan, kamo nagtagal nin dakulang pakilaban sa mga kasakitan.” (Hebreo 10:32) An paggirumdom ninda sa nakaaging mga gibo nin kaimbodan sa espirituwal na pakikilaban matabang na itao sa sainda an kaipuhan na kapusoan tanganing taposon an paorumbasan. Sa kaagid na paagi, an propetang si Isaias nagsurat: “Girumdoma ini, tangani na kamo magkaigwa nin kapusoan.” (Isaias 46:8) Nasa isip an kaparehong kawiliwiling epekto kaya sinabihan ni Jesu-Cristo an kongregasyon sa Efeso: “Kaya girumdoma kun saen ka naholog [an saimong pagkamoot kan enot], asin magsolsol ka asin giboha an enot na mga gibo.”​—Kapahayagan 2:​4, 5.

An sadol na “girumdoma an mga aldaw kan suanoy, horophoropa an mga taon sa sunod-sunod na kapag-arakian” sarong paorootrong tema sa mga pahayag ni Moises sa Israel, mantang sinasadol nia an nasyon na ipaheling an daing takot na kaimbodan ki Jehova. (Deuteronomio 32:7) Mangnoha an saiyang mga tataramon, na nasusurat sa Deuteronomio 7:18: “Dai ka dapat na matakot sa sainda [sa mga Cananeo]. Maninigo na girumdomon mo nanggad an ginibo ni Jehova na saimong Dios ki Faraon asin sa bilog na Egipto.” An paggirumdom sa mga gibo nin pagliligtas ni Jehova para sa saiyang banwaan dapat na nagin pan-agyat sa saindang padagos na fiel na pagsunod sa mga ley nin Dios.​—Deuteronomio 5:​15; 15:15.

Makamomondo, an mga Israelita parateng napadara sa kasalan nin pagkamalilingawon. Na may anong resulta? “Paorootro binabalo ninda an Dios, asin pinakolog ninda an boot pati kan Banal na Saro nin Israel. Dai ninda ginirumdom an saiyang kamot, an aldaw na sinda kinalda nia sa kaiwal.” (Salmo 78:​41, 42) Sa kahurihurihi, an saindang pagkamalilingawon sa mga pagboot ni Jehova nagbunga kan pagsikwal nia sa sainda.​—Mateo 21:​42, 43.

An sarong marahay na halimbawa itinao kan salmista na nagsurat: “Gigirumdomon ko an mga gibo ni Jah; ta gigirumdomon ko an saimong makangangalas na mga gibo kan suanoy. Asin hohorophoropon ko nanggad an gabos mong gibo, asin tatawan ko nin atension an saimong mga ginibo.” (Salmo 77:​11, 12) An siring na mapaghorophorop na paggirumdom sa nakaaging fiel na paglilingkod asin mamomoton na mga gibo ni Jehova matao sa sato nin kinakaipuhan na motibasyon, pamparigon sa boot, asin pag-apresyar. Siring man, an ‘paggirumdom sa enot na mga aldaw’ makatatabang na haleon an panluluya asin puedeng makapahiro sa sato na gibohon an gabos niatong makakaya asin papagdanayon an fiel na pakatagal.

Pakanood nin Leksion sa Nakaaging mga Sala

Ikaduwa, an dai pakalingaw puedeng magin paagi nin pakanood nin leksion sa nakaaging mga sala asin sa mga resulta kaiyan. Nasa isip ini, hinatolan ni Moises an mga Israelita: “Girumdoma: Dai mo paglingawan kun paano mo prinobokar si Jehova na saimong Dios sa kaawagan. Poon kan aldaw na ika luminuwas sa daga nin Egipto sagkod sa pag-abot nindo sa lugar na ini kamo nagin rebelde sa saindong gawe-gawe ki Jehova.” (Deuteronomio 9:7) An resulta nin siring na pagmasumbikal kan mga Israelita, siring sa idinoon ni Moises, iyo na ‘pinalakaw sinda ni Jehova na saindang Dios sa laog nin kuarentang taon sa kaawagan.’ Taano ta pinarigon an saindang boot na girumdomon ini? Iyan tanganing papangyarihon sinda na magpakumbaba asin magserbing pagtatanos sa saindang rebeldeng mga dalan tanganing ‘otobon ninda an mga togon ni Jehova na saindang Dios paagi sa paglakaw sa saiyang mga dalan asin paagi sa pagkatakot sa saiya.’ (Deuteronomio 8:​2-6) Dapat sindang makanood nin leksion sa sentido na dai na pag-otrohon an saindang nakaaging mga sala.

Nagkomento an sarong parasurat: “An tawong mapagmaan nakikinabang sa personal na eksperyensia, an madonong sa eksperyensia nin iba.” Mantang nangapodan si Moises sa banwaan nin Israel na makinabang paagi sa paghorophorop sa saindang sadiring mga sala kan nakaagi, si apostol Pablo nagsadol sa iba​—sa kongregasyon nin Corinto kan enot na siglo asin, bilang dagdag, sa sato—​na makanood nin leksion sa iyo man sanang makasaysayan na rekord. Sia nagsurat: “Ngonyan an mga bagay na ini nangyari sa sainda [sa mga Israelita] bilang mga halimbawa, asin an mga iyan isinurat para sa pagpatanid sa sato na inabotan kan mga katapusan kan mga palakaw nin mga bagay.” (1 Corinto 10:11) Nasa isip ni Jesu-Cristo an saro pang suanoy na pangyayari sa Biblia asin an pangangaipo na makanood dian nin leksion kan sia magsabi: “Girumdoma an agom na babae ni Lot.” (Lucas 17:32; Genesis 19:​1-​26) Nagsurat an Ingles na poeta asin pilosopo na si Samuel Taylor Coleridge: “Kun an mga tawo makanonood nin leksion sa kasaysayan, kanigoan na mga leksion an ikatotokdo kaiyan sa sato!”

Kababaan nin Boot Asin Pagtanaw nin Utang na Boot

Ikatolo, an paggirumdom puedeng pataluboon sa sato an nakapaoogma sa Dios na mga kualidad na kababaan nin boot asin pagtanaw nin utang na boot. Mantang kita naggagayagaya sa dakol na aspekto kan satong pambilog na kinaban na espirituwal na paraiso, nungka logod na lingawan ta na iyan nasasarig sa nagkapirang sangkap. Kabale digdi an kaimbodan, pagkamoot, pagsasakripisyo sa sadiri, kapusoan sa atubangan nin kasakitan, pakatagal, pakatios asin pagtubod​—mga kualidad na ipinaheling kan satong Kristianong mga tugang na lalaki asin babae na kaidtong dakol na dekada na an nakaagi binuksan an gibohon sa laen-laen na kadagaan. Sa pagtapos sa report kaiyan dapit sa modernong aldaw na kasaysayan kan banwaan nin Dios sa Mejico, an 1995 Yearbook of Jehovah’s Witnesses nagsabi: “Para sa mga tawo na bago pa sanang asosyado sa Mga Saksi ni Jehova, an mga pagbalo na inatubang kan mga nakikabtang sa pagbukas kan gibohon sa Mejico tibaad dumatong bilang sorpresa. Tuod na sinda sa sarong espirituwal na paraiso kun saen igwa nin abundang espirituwal na pagkakan, kun saen igwang ginatos na ribong kairiba na may takot sa Dios, asin kun saen an paglilingkod sa Dios ginigibo sa organisadong marhay na paagi.”

An mga naenot na idto parateng naglilingkod na solo o sa sadit na nasusuhay na mga grupo. Napaatubang sinda sa kapungawan, kadaihon, asin iba pang grabeng mga pagbalo sa integridad mantang sinda nagmamaigot sa pagbalangibog kan mensahe nin Kahadean. Minsan ngani an dakol sa mga lingkod na ini kan enot na mga panahon nagadan na, nakaoogma nanggad sa puso na maaraman na ginigirumdom ni Jehova an saindang fiel na paglilingkod! Pinatunayan ini ni apostol Pablo, kan sia sumurat: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.” (Hebreo 6:10) Kun si Jehova may pag-apresyar na naggigirumdom, bako daw na siring man kaiyan an maninigo niatong gibohon na may espiritu nin pagtanaw nin utang na boot?

An mga bago pa sanang makaaram kan katotoohan puedeng magkaigwa kan makasaysayan na pagmansay na ini paagi sa publikasyon na Jehovah’s Witnesses​—Proclaimers of God’s Kingdom.a Dugang pa, kun kita may pribilehiong magin kabilang sa sarong pamilya o sa sarong Kristianong kongregasyon na kabilang sa mga miembro kaiyan an haloy nang naglilingkod na gurang nang mga tugang na lalaki asin babae, kita dinadagka sa espiritu kan Deuteronomio 32:7 na ‘girumdomon an mga aldaw kan suanoy, horophoropon an mga taon sa sunod-sunod na kapag-arakian; hapoton an saimong ama, asin sia makasasabi sa saimo; an saimong kamagurangan na lalaki, asin ikasasabi ninda iyan sa saimo.’

Iyo, an paggirumdom sa enot na mga gibo nin diosnon na debosyon puedeng makadagka sa sato na padagos na magtagal na may kagayagayahan sa satong Kristianong paglilingkod. Siring man, an kasaysayan igwa nin mga leksion na kaipuhan niatong manodan. Asin an paghorophorop sa satong binendisyonan nin Dios na espirituwal na paraiso nagpapatalubo kan angay na mga kualidad nin kapakumbabaan asin pagtanaw nin utang na boot. Tunay nanggad, “girumdoma nindo an mga aldaw na nakaagi.”

[Nota sa Ibaba]