Kan mayo na si Adan asin Eva sa hardin nin Eden, nagkaaki sinda nin dakul. An inot nindang aki na si Cain nagin paratanom. An ikaduwa nindang aki na si Abel nagin pastor, o paraataman nin hayop.

Sarong aldaw, nagdulot ki Jehova si Cain saka Abel. Aram mo kun ano an dulot? Saro iyan na regalo para sa Diyos. Naugma si Jehova sa dulot ni Abel, pero dai siya naugma sa dulot ni Cain. Anggutona si Cain dahil diyan. Pinatanidan ni Jehova si Cain na ’baad makagibo ini nin maraot dahil sa kaanggutan. Pero dai nagdangog si Cain.

Imbes, sinabihan ni Cain si Abel: ‘Mag-iba ka sako duman sa tanuman.’ Kan sindang duwa na sana an magkaibanan, dinaguso ni Cain an saiyang tugang asin ginadan ini. Ano daw an gigibuhon ni Jehova digdi? Bilang padusa, pinalayas ni Jehova si Cain pasiring sa lugar na harayo sa pamilya kaini. Dai na tutugutan si Cain na magbalik.

Ano an manunudan ta digdi? Kun minsan, tibaad maanggot kita pag dai nangyari an gusto tang mangyari. Kun naggagrabe an satong kaanggutan—o kun may nagpatanid sato dahil nariparo niya na naaanggot kita—dapat na kontrulon ta tulos an satong namamatian para dai kita madara kaiyan.

Dahil namumutan ni Abel si Jehova asin ginibo niya an tama, pirmi siyang nagigirumduman ni Jehova. Bubuhayon liwat nin Diyos si Abel pag ginibo na Niyang paraiso an daga.

Pag-abot nin panahon, nagdakul an mga tawo digdi sa daga. Maraot an kadaklan sa sainda. May mga anghel pa ngani sa langit na nagin maraot man. Binayaan ninda an saindang istaran sa langit dangan nagdigdi sa daga. Aram mo kun taano? Tanganing makapagsulot sinda nin hawak, o lawas, na arog sa tawo asin makaagom nin mga babayi.

Nagkaaki nin mga lalaki an mga anghel na ini sa mga babaying tawo. Kan magdarakula na, nagin makusugon asin maraot an mga aking idto. Pigkukulgan ninda an mga tawo. Dai matugot si Jehova na magpadagos idto. Kaya nagdesisyon siyang paraon an maraot na mga tawo paagi sa sarong baha.

Pero may sarong tawong naiiba. Namumutan niya si Jehova. Siya si Noe. May agom siya asin may tulong aking lalaki, si Sem, Ham, saka Jafet. Gabos may agom an tulo niyang aki. Sinabihan ni Jehova si Noe na maggibo nin sarong dakulang arka tanganing makaligtas siya sa Baha kaiba an saiyang pamilya. An arka garo sarong dakulaon na kahon na puwedeng maglataw sa tubig. Sinabihan man ni Jehova si Noe na ilaog sa arka an dakul na mga hayop para makaligtas man an mga ini.

Pinunan tulos ni Noe na gibuhon an arka. Inabot si Noe asin an pamilya niya nin mga 50 taon bago iyan natapos. Sinunod ninda an eksaktong sinabi ni Jehova kun paano gigibuhon an arka. Sa panahon man na iyan, pinatanidan ni Noe an mga tawo manungod sa maabot na Baha. Pero mayo nin nagdangog sa saiya.

Nag-abot man giraray an panahon para lumaog sa arka. Aramon ta kun ano an sunod na nangyari.