Walo an Nakaligtas sa Baha

Naglaog sa arka si Noe, an saiyang pamilya, asin an mga hayop. Pagkasara ni Jehova sa pinto, nagpuon nang umuran nin makusugon kaya naglataw sa tubig an arka. Paghaloy-haloy, nalabawan nin tubig an bilog na daga. Nagadan an gabos na maraot na tawo sa luwas kan arka. Pero ligtas si Noe asin an saiyang pamilya sa laog. Naiisip mo daw kun gurano sinda kaugma dahil sinunod ninda si Jehova?

Nag-uran nin 40 aldaw asin 40 banggi, tapos nagpundo na iyan. Luway-luway na nagbaba an tubig, dangan suminadsad an arka sa kabukidan. Pero matubigon pa man giraray sa palibot, kaya dai pa makaluwas si Noe asin an saiyang pamilya.

Luway-luway na naghubas an tubig. Labing sarong taon si Noe asin an pamilya niya sa laog kan arka. Tapos sinabihan sinda ni Jehova na puwede na sindang lumuwas pasiring sa garo sarong bagong kinaban. Nagpapasalamat sindang marhay ki Jehova ta ilinigtas niya sinda, kaya nagdulot sinda ki Jehova bilang pasasalamat.

Naugma si Jehova sa dulot na iyan. Nangako siya na dai na niya giraray paparaon an gabos na bagay sa daga paagi sa baha. Bilang tanda kan pangakong iyan, pinalataw niya sa langit an pinakainot na bulalangaw.a Nakahiling ka na nin bulalangaw?

Tapos sinabihan ni Jehova si Noe asin an saiyang pamilya na magkaigwa nin mga aki asin panuon an daga.