An Makangangalas na Kublit kan Balat

An balat (sea cucumber) sarong klase nin hayop na nakaistar sa salog kan dagat saka sa mga korales. May mga balat na gurudo-gudo an hawak, an iba man may mga tunok-tunok pa ngani. An makangangalas dahil kaya nindang magin malumoy arog sa wax o magin matagas arog sa kahoy sa laog sana nin pirang minuto o segundo pa ngani. Huli kaiyan, nagigibo ninda na makasuksok sa hayakpit na mga lugar, dangan pinapatagas ninda an saindang hawak tanganing dai sinda mahugkot kan mga naniniba sainda. An sekreto ninda yaon sa makangangalas nindang kublit.

Pag-isipan: Kaya kan balat na gibuhon na matagas, makunat, saka malumoy an kublit kaiyan. Para magibo iyan, pig-uurutas o pigtatarakod kan balat an mga himaymay sa kublit kaiyan. Ginigibo ninda iyan gamit an manlain-lain na protinang pampatagas o pampalumoy.

An pampatagas na mga protina minaporma nin saraditon na pantakod, o mga kadena, sa mga himaymay kan connective tissue kaya mas minatagas an kublit. An pampalumoy na mga protina pig-uurutas an mga himaymay kaya mas minalumoy an kublit. Kaya kan kublit kan balat na magin malumuyon na garo baga natutunaw na iyan.

Pinupurbaran kan mga siyentista na makagibo nin mga materyales na makakaarog sa kakayahan kan kublit kan balat. Saro sa katuyuhan ninda iyo na makagibo nin mga electrode para sa pag-opera sa hutok na tama sana an pagkatagas para maiposisyon iyan nin eksakto pero minalumoy man sana. An arog kaiyan na mga electrode makakabawas sa posibilidad na dai iyan akuon kan hawak.

Ano sa hiling mo? Resulta daw nin ebolusyon an makangangalas na kublit kan balat? O may nagdisenyo kaiyan?