Mga Pagtiripon kan Kongregasyon Paagi sa Videoconferencing

Ipinagbuot kan gobyerno sa dakul na nasyon an physical distancing asin ipinagbawal an pampublikong mga pagtiripon. Determinadong sunudon kan mga Saksi ni Jehova an mga pagbuot na iyan mantang ipinagpapadagos pa man giraray an mga pagtiripon sa ligtas na paagi. Para magibo iyan, naggagamit an mga kongregasyon nin mga videoconferencing app, arog kan Zoom, para makapagtiripon.

Para regular na makapagtiripon, inaprubaran kan Namamahalang Grupo an paggamit nin mga donasyon para magbakal nin mga Zoom account para sa mga kongregasyon. Nakatabang ining marhay sa nagkapirang kongregasyon na dai kayang makabakal nin videoconference account na sa parati nagkakahalaga nin 15 sagkod 20 dolyares o mas labi pa. Sa parati, an mga kongregasyon na ini naggagamit na sana nin mga libreng app na limitado sana an puwedeng magkonek asin bako gayong protektado. An gabos na kongregasyon na naggagamit kan mga Zoom account na itinatao kan organisasyon nakikinabang sa mga security setting na pasil gamiton asin dakul na tawo an puwedeng magkonek sa lambang pagtiripon. Sa ngunyan, labing 65,000 na kongregasyon sa labing 170 nasyon an naggagamit kan mga account na ini.

An Kairagi Congregation, sa Manado, North Sulawesi, Indonesia, nagpundo na sa paggamit kan libreng videoconferencing app asin nagpuon na maggamit kan Zoom account na itinao kan organisasyon. Sinabi ni Brother Hadi Santoso: “Dawa an mga tugang na dai gayong tataong maggamit nin mga gadyet nakikinabang na marhay ngunyan sa mga pagtiripon, panginot na dahil dai na ninda kaipuhan na mag-log in nin nagkapirang beses sa kada pagtiripon.”

Si Lester Jijón, Jr., sarong elder sa Guayacanes Oeste Congregation sa Guayaquil, Ecuador, nagsabi: “Huli sa masakit na pagbuhay kan dakul na tugang, talagang magigin imposible kuta para sa nagkapirang kongregasyon na makabakal nin Zoom license para makaatender an bilog na kongregasyon sa mga pagtiripon. Ngunyan may Zoom account na kami na puwedeng dakul na tawo an magkonek saka puwedeng-puwede na kaming mag-imbitar nin iba sa mga pagtiripon, ta dai mi na iniisip na limitado sana an puwedeng magkonek.”

Si Johnson Mwanza, sarong elder sa Ngwerere North Congregation sa Lusaka, Zambia, nagsurat: “Dakul na tugang an pauruutrong nagsasabi, ‘huli sa areglo kan organisasyon manungod sa Zoom dai mi lang namamatian na mas harani kami sa mga tugang kundi namamatian mi man na namumutan saka inaataman kami ni Jehova.’”

An mga account na ini na itinatao kan organisasyon binakal gamit an pondo na nakatagama para sa pag-ayuda. An pondong iyan hali sa boluntaryong mga donasyon na itinatao para sa pambilog na kinaban na gibuhon. An dakul sa mga donasyon na ini itinao paagi sa donate.jw.org. Salamat sa saindong bukas-palad na mga donasyon na nakakatabang man sa iba pang gibuhon na pag-ayuda sa bilog na kinaban.—2 Corinto 8:14.