LEKSIYON 39
An Pagmansay nin Diyos sa Dugo
Mahalagang marhay an dugo. Kun mayo iyan, dai kita mabubuhay. Bilang satong Kaglalang, an Diyos an may deretso na magsabi kun paano ta dapat gamiton an dugo. Ano an sinasabi niya manungod sa dugo? Puwede daw iyan kakanon o isalin? Asin paano ka makakagibo nin marahay na desisyon manungod sa bagay na iyan?
1. Ano an pagmansay ni Jehova sa dugo?
Sinabi ni Jehova sa mga nagsasamba sa saiya kan mga panahon kan Bibliya: “An buhay kan lambang klase nin laman iyo an dugo kaiyan.” (Levitico 17:14) Para ki Jehova, an dugo simbolo nin buhay. An buhay sarong banal na regalo hali sa Diyos, kaya an dugo banal man.
2. Anong paggamit nin dugo an ipinagbabawal nin Diyos?
Ipinagbuot ni Jehova sa mga parasamba niya bago an panahon kan mga Kristiyano na dai magkakan nin dugo. (Basahon an Genesis 9:4 asin Levitico 17:10.) Inutro niya an pagbuot na iyan kan magtao nin instruksiyon an namamahalang grupo sa mga Kristiyano na “padagos na maglikay . . . sa dugo.”—Basahon an Gibo 15:28, 29.
Ano an buot sabihon kan maglikay sa dugo? Kun sabihon saimo kan doktor na maglikay ka sa arak, siyempre dai ka mainom nin arak. Pero makakan ka daw nin mga kakanon na may arak o iiineksiyon mo daw iyan sa ugat mo? Siyempre dai. Arog man kaiyan sa pagbuot nin Diyos na maglikay sa dugo. Dai kita dapat magkakan nin dugo saka nin karne nin hayop na dai napadugo. Dai man kita makakan nin ano man na kakanon na may halong dugo.
Paano man pag-abot sa medikal na paggamit nin dugo? May mga paagi nin pagbulong na malinaw na nagbabalga sa pagbuot nin Diyos. Kaiba diyan an pagpasalin nin purong dugo o kan arin man sa apat na panginot na elemento kaiyan—an red blood cells, white blood cells, platelets, asin plasma. May iba pang paagi nin pagbulong na bakong malinaw kun baga nagbabalga iyan sa pagbuot nin Diyos. Halimbawa, may mga paagi nin pagbulong na ginagamitan nin blood fractions na kinua sa saro sa mga panginot na elemento nin dugo. May mga pagbulong man na ginagamitan kan sadiring dugo kan tawong nagpapabulong. Pag pigtuturutimbang an mga paaging iyan nin pagbulong, an kada saro sa sato dapat na gumibo nin personal na desisyon.a—Galacia 6:5.
ARAMON PA
Aramon kun paano makakapagdesisyon kun anong pamamaagi nin pagbulong na may kalabot na dugo an aakuon mo.
3. Magpili nin paagi nin pagbulong na inuuyunan ni Jehova
Paano ka makakapili nin paagi nin pagbulong na kauyon kan pagmansay nin Diyos sa dugo? I-play an VIDEO, dangan pag-ulayan an kahalagahan kan paggibo kan minasunod na mga lakdang:
Mamibi na tawan ka nin kadunungan.—Santiago 1:5.
Mag-research nin mga prinsipyo sa Bibliya asin kun paano iyan makakatabang sa sitwasyon mo.—Talinhaga 13:16.
Aramon an mga paagi nin pagbulong na igwa sa lugar nindo.
Halion sa pagpipilian an mga pagbulong na malinaw na dai puwede sa saimo.
Siguraduhon na dai ka makokonsiyensiya sa desisyon mo.—Gibo 24:16.b
Tandaan na mayo nin siisay man—dawa pa iyan agom mo, elder, o an nagtutukdo saimo sa Bibliya—an dapat na magdikta sa saimo kun ano an dapat na magin desisyon mo sa mga bagay na depende sa konsiyensiya.—Roma 14:12.
Isurat an napagdesisyunan mo.
4. Gusto kan mga Saksi ni Jehova an pinakamarahay na kalidad nin pagbulong
Posible na masunod an pagbuot nin Diyos manungod sa dugo asin mag-ako nin de-kalidad na paagi nin pagbulong na dai naggagamit nin dugo. I-play an VIDEO.
Basahon an Tito 3:2, dangan pag-ulayan an hapot na ini:
Taano ta dapat na makikooperar kita asin magin mabuot pag nakikipag-ulay sa mga medical personnel?
Dai puwede |
Personal na desisyon |
|---|---|
A. Blood plasma |
Mga fraction hali sa plasma |
B. White blood cells |
Mga fraction hali sa white blood cells |
C. Platelets |
Mga fraction hali sa platelets |
D. Red blood cells |
Mga fraction hali sa red blood cells |
5. Kun may kalabot na blood fractions
An dugo igwa nin apat na panginot na elemento—an red blood cells, white blood cells, platelets, asin plasma. An kada saro kaiyan igwa nin dakul na sararadit na parte na inaapod na blood fractions.c May mga fraction na piglalaag sa mga bulong na panglaban sa mga hilang o pantabang sa pag-ampat nin dugo.
Pag-abot sa blood fractions, an lambang Kristiyano dapat na gumibo nin personal na desisyon base sa saiyang konsiyensiya na sinanay sa Bibliya. An iba tibaad magdesisyon na dai mag-ako nin pagbulong na may kaibang blood fractions. Para man sa iba, tibaad okey lang iyan sa konsiyensiya ninda.
Pag naggigibo nin desisyon, pag-isipan an hapot na ini:
Paano ko ipapaliwanag sa doktor kun taano ta inaako ko o dai an paggamit nin partikular na blood fractions?
TIBAAD MAY MAGHAPOT: “Ano man an maraot sa pagpasalin nin dugo?”
Ano sa hiling mo?
SUMARYO
Gusto ni Jehova na ibilang tang banal an dugo.
Rebyu
Taano ta banal para ki Jehova an dugo?
Paano ta naaraman na an dai pagpasalin nin dugo kaiba man sa pagbuot nin Diyos na maglikay sa dugo?
Paano ka makakagibo nin marahay na desisyon pag-abot sa medikal na paggamit nin dugo?
HILINGON MAN
Ano an dapat mong pag-isipan bago magdesisyon kun baga maako ka nin mga pagbulong na ginagamitan kan sadiri mong dugo?
“Mga Hapot Hale sa mga Parabasa” (An Torrengbantayan, Oktubre 15, 2000)
Ano an dapat mong pag-isipan bago magdesisyon kun baga maako ka nin blood fractions?
“Mga Hapot Hale sa mga Parabasa” (An Torrengbantayan, Hunyo 15, 2004)
Ano an nakakumbinsir sa sarong doktor na tama talaga an pagmansay ni Jehova sa dugo?
“Tinanggap Ko ang Pangmalas ng Diyos Hinggil sa Dugo” (Gumising!, Disyembre 8, 2003)
Aramon kun paano tinatabangan kan mga elder na miyembro kan mga Hospital Liaison Committee an saindang mga tugang.
a Hilingon an Leksiyon 35, “Kun Paano Makakagibo nin Marahay na mga Desisyon.”
b Hilingon an punto 5, “Kun May Kalabot na Blood Fractions,” asin an Dagdag na Impormasyon 3, “Mga Pamamaagi nin Pagbulong na May Kalabot na Dugo.”
c Ibinibilang kan nagkapirang doktor na mga fraction an apat na panginot na elemento kan dugo. Kaya tibaad kaipuhan mong ipaliwanag sa sainda an saimong personal na desisyon na dai magpasalin nin purong dugo o nin red blood cells, white blood cells, platelets, o plasma.