Pagkabuhay Liwat ni Jesus Sagkod sa Pagkapreso ni Pablo

Sa ikatulong aldaw pagkagadan ni Jesus, binuhay siya liwat. Kan aldaw na iyan, limang beses siyang nagpahiling sa mga disipulo. Padagos na nagpahiling si Jesus sainda sa laog nin 40 aldaw. Dangan, mantang nagmamasid an mga disipulo, nag-itaas si Jesus sa langit. Pakalihis nin sampulong aldaw, ibinubo nin Diyos an banal na espiritu sa mga parasunod ni Jesus na yaon sa Jerusalem.

Paghaloy-haloy, ipinapreso kan mga kaiwal nin Diyos an mga apostol, alagad pinalibre sinda nin sarong anghel. An disipulong si Esteban ginapo nin mga parakontra sagkod na magadan. Pero mahihiling ta na pinili ni Jesus an saro sa mga parakontrang ini na magin espesyal na lingkod niya, na kan huri namidbid bilang si apostol Pablo. Tulo may kabangang taon pagkagadan ni Jesus, isinugo nin Diyos si apostol Pedro tanganing ipahayag an maugmang bareta sa bakong Judiong si Cornelio asin sa pamilya kaini.

Pakalihis nin 13 taon, pinunan ni Pablo an inot niyang pagbiyahe para ipahayag an maugmang bareta. Sa ikaduwa niyang pagbiyahe, nag-iba si Timoteo. Maaaraman ta an pambihirang mga eksperyensiya ni Pablo asin kan kairiba niya sa pagbiyahe. Kan huri, napreso si Pablo sa Roma. Pakalihis nin duwang taon pinaluwas siya, pero napreso giraray siya asin ginadan. Bali mga 32 na taon an lawig nin mga pangyayari sa KABTANG SIYETE.