Duwang Aki na Nabuhay Liwat

HALIMBAWANG magadan ka, ano daw an mamamatian kan saimong ina kun mabuhay ka giraray? Siguradong mauugma siya! Pero, puwede daw na mabuhay liwat an gadan? Nangyari na daw ini?

Hilinga an ritrato. An lalaki iyo si propeta Elias. An babayi sarong balo na taga Zarefat, asin aki niya an kugos-kugos niya. Sarong aldaw, nagkahilang an aki. Nagparagrabe iyan sagkod na magadan siya. Sinabi ni Elias sa babayi: ‘Itao mo sako an aki.’

Dinara ni Elias an bangkay sa itaas kan harong asin ilinaag sa higdaan. Dangan namibi siya: ‘Diyos na Jehova, buhaya tabi an aki.’ Naghangos an aki! Tapos dinara siya ni Elias sa balo asin sinabi: ‘Hilinga, buhay an aki mo!’ Ugmahon an ina.

An saro pang importanteng propeta ni Jehova iyo si Eliseo. Nagin lingkod siya ni Elias. Pero pag-abot nin panahon ginamit man siya ni Jehova para gumibo nin milagro. Sarong aldaw, nagduman si Eliseo sa Sunem. May babayi duman na mabuuton saiya. An babayi asin an agom kaini nagkaaki nin lalaki.

Sarong aldaw, kan durudakula na an aki, nagpasyar siya sa saiyang ama na nagtatrabaho sa tanuman. Duman, bigla na lang nagkurahaw an aki: ‘Makulog an payo ko!’ Kan iuli an aki sa harong, nagadan ini. Munduon an saiyang ina! Dali-dali niyang sinundo si Eliseo.

Pag-abot ni Eliseo, naglaog siya sa kuwartong namumugtakan kan gadan na aki. Namibi siya ki Jehova asin dinapaan an bangkay. Dai nahaloy, nagbalik an ginhawa kan aki, asin naghatsing ini nin pitong beses. Ugmahon an ina kan mahiling niyang buhay si nonoy niya!

Dakulon nang tawo an nagadan. Nagdara ini nin grabeng kamunduan sa mga kapamilya asin amigo ninda. Mayo kitang kapangyarihan na bumuhay nin gadan. Pero si Jehova igwa. Sa iba pang istorya kan librong ini, manunudan ta kun paano niya ibabalik an buhay kan milyon-milyon na tawo.