-
Ano an Kahadian nin Diyos?Mabuhay nin Maugma Sagkod Pa Man!—Interactive na Pag-adal sa Bibliya
-
-
LEKSIYON 31
Ano an Kahadian nin Diyos?
Manungod sa Kahadian nin Diyos an pinakatema kan Bibliya. Gagamiton ni Jehova an Kahadian na iyan para gibuhon na Paraiso an bilog na daga. Ano an Kahadian? Ano an patunay na namamahala na iyan ngunyan? Ano an nagibo na kaiyan? Ano an gigibuhon kaiyan sa maabot? Sisimbagon an mga hapot na iyan sa leksiyon na ini asin sa masunod na duwang leksiyon.
1. Ano an Kahadian nin Diyos, asin siisay an Hadi kaiyan?
An Kahadian nin Diyos sarong gobyerno na inestablisar kan Diyos na Jehova. An Hadi kaiyan iyo si Jesu-Cristo, asin mamamahala siya hali sa langit. (Mateo 4:17; Juan 18:36) Sinasabi kan Bibliya manungod ki Jesus: “Mamamahala siya sagkod lamang bilang Hadi.” (Lucas 1:32, 33) Bilang Hadi kan Kahadian nin Diyos, papamahalaan ni Jesus an gabos na yaon sa daga.
2. Sairisay an kaiba ni Jesus na mamamahala?
Dai solong mamamahala si Jesus. May mga tawo hali sa ‘lambang tribo asin lengguwahe asin banwaan saka nasyon na mamamahala sa daga bilang mga hadi.’ (Kapahayagan 5:9, 10) Pira an mamamahala kaiba ni Cristo? Puon kaidtong magdigdi si Jesus sa daga, milyon-milyon na an nagin mga parasunod niya. Pero 144,000 sana an maduman sa langit para mamahala kaiba ni Jesus. (Basahon an Kapahayagan 14:1-4.) An gabos na iba pang Kristiyano sa daga magigin siyudadano kan Kahadian.—Salmo 37:29.
3. Taano ta an Kahadian nin Diyos nakakalabi sa mga gobyerno nin tawo?
Dawa ngani hinihinguwa kan mga tawong tagapamahala na gumibo nin marahay, mayo sinda kan kapangyarihan na gibuhon an gabos na gusto ninda. Pag-abot nin panahon, sinasalidahan sinda kan ibang mga tagapamahala na tibaad mayong malasakit sa nasasakupan ninda. Pero an Tagapamahala kan Kahadian nin Diyos, si Jesus, dai nuarin man riribayan nin siisay pa man. An Diyos nag-establisar “nin sarong kahadian na dai nuarin man malalaglag.” (Daniel 2:44) Mamamahala si Jesus sa bilog na daga, asin pantay-pantay an magigin pagtrato niya sa gabos. Mamumuton siya, mabuot, saka patas, asin tutukduan niya an mga tawo na arog man kaiyan an magin pagtrato sa iba.—Basahon an Isaias 11:9.
ARAMON PA
Aramon kun taano ta mas marahay an Kahadian nin Diyos kisa sa ano man na gobyerno nin tawo.
4. Sarong makapangyarihan na gobyerno an mamamahala sa bilog na daga
An awtoridad ni Jesu-Cristo nakakalabi kisa sa kiisay man na tagapamahala sa kasaysayan. Basahon an Mateo 28:18, dangan pag-ulayan an hapot na ini:
Taano ta an awtoridad ni Jesus nakakalabi sa awtoridad nin siisay man na tawong tagapamahala?
An mga gobyerno nin tawo paburubago, asin an kada saro kaiyan namamahala sa sarong parte sana kan kinaban. Arog man daw kaiyan an Kahadian nin Diyos? Basahon an Daniel 7:14, dangan pag-ulayan an mga hapot na ini:
Ano an karahayan na an Kahadian nin Diyos “dai malalaglag”?
Ano an karahayan na mamamahala iyan sa bilog na kinaban?
5. Dapat salidahan an pamamahala nin tawo
Taano ta dapat salidahan kan Kahadian nin Diyos an mga gobyerno nin tawo? I-play an VIDEO, dangan pag-ulayan an hapot.
Ano an nagin resulta kan pamamahala nin tawo?
Basahon an Eclesiastes 8:9, dangan pag-ulayan an mga hapot na ini:
Sa hiling mo, dapat daw salidahan kan Kahadian nin Diyos an mga gobyerno nin tawo? Taano?
6. Mga tagapamahala na nakakasabot sa sato
An satong Hadi, si Jesus, “nakakasabot kan satong mga kaluyahan” dahil nabuhay siya bilang tawo. (Hebreo 4:15) “Hali sa lambang tribo asin lengguwahe asin banwaan saka nasyon,” nagpili si Jehova nin 144,000 na maimbod na mga lalaki asin babayi na mamamahala kaiba ni Jesus.—Kapahayagan 5:9.
Para saimo, nakakapakusog daw na aram ni Jesus asin kan kairiba niyang mga tagapamahala an namamatian ta bilang tawo? Taano?
Nagpili si Jehova nin mga lalaki asin babayi na manlain-lain an pinaghalian para mamahala kaiba ni Jesus
7. Nakakalabi nanggad an mga pagbuot kan Kahadian nin Diyos
An mga gobyerno naggigibo nin mga ley, o pagbuot, na sa hiling ninda makakatabang asin makakaprotektar sa saindang mga siyudadano. An Kahadian nin Diyos igwa man nin mga pagbuot na dapat sundon kan mga siyudadano kaiyan. Basahon an 1 Corinto 6:9-11, dangan pag-ulayan an mga hapot na ini:
Ano sa hiling mo an magigin kamugtakan kan kinaban kun susunudon kan gabos an mga pagbuot nin Diyos?a
Sa hiling mo, tama sana daw na asahan ni Jehova na susunudon kan mga siyudadano kan Kahadian an mga pagbuot na iyan? Taano?
Ano an patunay na kayang magbago kan mga tawong dai nagsusunod sa mga pagbuot na iyan?—Hilingon an bersikulo 11.
An mga gobyerno naggigibo nin mga ley, o pagbuot, para makinabang asin maprotektaran an mga siyudadano kaiyan. An Kahadian nin Diyos igwa nin nakakalabing marhay na mga pagbuot para protektaran asin para sa kapakinabangan kan mga siyudadano kaiyan
TIBAAD MAY MAGHAPOT: “Ano an Kahadian nin Diyos?”
Ano an isisimbag mo?
SUMARYO
An Kahadian nin Diyos sarong tunay na gobyerno sa langit na mamamahala sa bilog na kinaban.
Rebyu
Siisay an mga tagapamahala sa Kahadian nin Diyos?
Taano ta an Kahadian nin Diyos nakakalabi sa ano man na gobyerno nin tawo?
Ano an pira sa mga bagay na inaasahan ni Jehova sa mga siyudadano kan Kahadian?
HILINGON MAN
Hain talaga an Kahadian nin Diyos? Aramon kun ano itinukdo ni Jesus manungod diyan.
“An Kahadian nin Diyos Daw Nasa Puso nin Tawo?” (Artikulo sa jw.org/bcl)
Taano ta mas importante para sa mga Saksi ni Jehova an saindang kaimbudan sa Kahadian nin Diyos kisa sa gobyerno nin tawo?
Aramon an sinasabi kan Bibliya manungod sa 144,000 na pinili ni Jehova para mamahala kaiba ni Jesus.
Ano an nakakumbinsir sa sarong babaying nakapreso na an Diyos sana an makakatao nin hustisya sa kinaban?
“Natagpuan Ko ang Solusyon sa Kawalang-Katarungan” (Gumising!, Nobyembre 2011)
a Ipapaliwanag an pira sa mga ley na iyan sa Seksiyon 3.
-
-
Namamahala Na an Kahadian nin Diyos!Mabuhay nin Maugma Sagkod Pa Man!—Interactive na Pag-adal sa Bibliya
-
-
LEKSIYON 32
Namamahala Na an Kahadian nin Diyos!
Nagpuon na mamahala an Kahadian nin Diyos sa langit kan taon 1914. Kan taon man na iyan nagpuon an huring mga aldaw kan pamamahala nin tawo. Paano ta iyan naaraman? Pag-isipan an mga propesiya sa Bibliya, an kamugtakan sa kinaban, asin an mga pag-uugali kan mga tawo na nagin risang-risa puon kan 1914.
1. Ano an pigpropesiya kan Bibliya?
Sa libro sa Bibliya na Daniel maaaraman ta na an Kahadian nin Diyos mapuon na mamahala sa katapusan kan inaapod na “pitong panahon.” (Daniel 4:16, 17) Pakalihis nin mga siglo, inapod ni Jesus an panahon na iyan na “itinalaan na mga panahon para sa mga nasyon,” asin itinukdo niya na dai pa iyan natatapos. (Lucas 21:24) Arog kan maaaraman ta, an pitong panahon natapos kan taon 1914.
2. Anong kamugtakan sa kinaban asin pag-uugali kan mga tawo an nagin risang-risa puon kan 1914?
Hinapot si Jesus kan mga disipulo niya: “Ano an magigin tanda kan saimong presensiya saka kan pagtatapos kan sistema nin mga bagay?” (Mateo 24:3) Bilang simbag, ihinula ni Jesus an dakul na bagay na mangyayari pag nagpuon na siyang mamahala sa langit bilang Hadi kan Kahadian nin Diyos. Kaiba sa mga pangyayaring iyan an mga giyera, kakulangan nin kakanon, asin mga linog. (Basahon an Mateo 24:7.) Ihinula man kan Bibliya na sa “huring mga aldaw,” magigin “masakit” an buhay dahil sa pag-uugali kan mga tawo. (2 Timoteo 3:1-5) Puon kan 1914, nagin mas risang-risa an mga iyan.
3. Taano ta nagin marauton an kamugtakan sa kinaban puon kan mamahala an Kahadian nin Diyos?
Dai nahaloy pagkatukaw ni Jesus bilang Hadi kan Kahadian nin Diyos, nagkaigwa nin giyera sa langit. Nakipaglaban siya ki Satanas asin sa mga demonyo. Nadaog si Satanas. Sinasabi kan Bibliya na “ihinulog siya sa daga, asin an saiyang mga anghel ihinulog kaibanan niya.” (Kapahayagan 12:9, 10, 12) Angguton si Satanas ta aram niyang paparaon siya. Kaya nagdadara siya nin mga problema asin kasakitan sa bilog na kinaban. Bako nanggad makangangalas na arog kaini karaot an kamugtakan kan kinaban! Sosolusyunan kan Kahadian nin Diyos an gabos na problemang iyan.
ARAMON PA
Siyasaton kun paano ta naaraman na kan 1914 nagpuon na mamahala an Kahadian nin Diyos, asin kun ano an dapat na magin epekto kaiyan sa sato.
4. Ipinapahiling kan kronolohiya sa Bibliya na an Kahadian nin Diyos nagpuon na mamahala kan 1914
Paagi sa sarong pangaturugan, ipinahiling kan Diyos ki Hading Nabucodonosor kan suanoy na Babilonya kun ano an mangyayari sa maabot na panahon. Ipinaparisa kan pangaturugan saka kan interpretasyon diyan ni Daniel na nanunungod iyan sa pamamahala ni Nabucodonosor asin sa Kahadian nin Diyos.—Basahon an Daniel 4:17.a
Basahon an Daniel 4:20-26, dangan gamiton an tsart para masimbag an minasunod na mga hapot:
(A) Ano an nahiling ni Nabucodonosor sa saiyang pangaturugan?—Hilingon an bersikulo 20 asin 21.
(B) Ano an mangyayari sa kahoy?—Hilingon an bersikulo 23.
(C) Ano an mangyayari sa katapusan kan “pitong panahon”?—Hilingon an bersikulo 26.
Kun Paano Konektado sa Kahadian nin Diyos an Pangaturugan Manungod sa Kahoy
AN PROPESIYA (Daniel 4:20-36)
Pamamahala
(A) Sarong dakulaon na kahoy
Naputol an pamamahala
(B) “Paluda nindo an kahoy,” asin ‘pitong panahon an palihison’
Ibinalik an pamamahala
(C) “Mapapasaimo giraray an kahadian mo”
Sa inot na kautuban kan propesiyang ini . . .
(D) Kiisay nagrerepresentar an kahoy?—Hilingon an bersikulo 22.
(E) Paano naputol an saiyang pamamahala?—Basahon an Daniel 4:29-33.
(F) Ano an nangyari ki Nabucodonosor sa katapusan kan “pitong panahon”?—Basahon an Daniel 4:34-36.
INOT NA KAUTUBAN
Pamamahala
(D) Si Nabucodonosor, na Hadi kan Babilonya
Naputol an pamamahala
(E) Pagkatapos kan 606 B.C.E., nawara sa tultol na pag-iisip si Nabucodonosor asin dai siya nakapamahala sa laog nin pitong literal na mga taon
Ibinalik an pamamahala
(F) Nakabalik sa tultol na pag-iisip si Nabucodonosor asin namahala giraray
Sa ikaduwang kautuban kan propesiyang ini . . .
(G) Kiisay nagrerepresentar an kahoy?—Basahon an 1 Cronica 29:23.
(H) Paano naputol an saindang pamamahala? Paano ta naaraman na dai pa iyan naibalik kan si Jesus yaon digdi sa daga?—Basahon an Lucas 21:24.
(I) Kasuarin asin sain ibinalik an pamamahala na iyan?
IKADUWANG KAUTUBAN
Pamamahala
(G) Mga hading Israelita na nagrerepresentar sa pamamahala nin Diyos
Naputol an pamamahala
(H) Linaglag an Jerusalem, naputol an linya nin pamamahala kan mga hading Israelita sa laog nin 2,520 taon
Ibinalik an pamamahala
(I) Nagpuon na mamahala si Jesus sa langit bilang Hadi kan Kahadian nin Diyos
Gurano kalawig an pitong panahon?
Matatabangan kita kan ibang parte kan Bibliya na masabutan an iba pang parte kaiyan. Halimbawa, sinasabi kan libro sa Bibliya na Kapahayagan na 1,260 aldaw an katumbas kan tulo may kabangang panahon. (Kapahayagan 12:6, 14) Pitong panahon kun dodoblehon iyan, o 2,520 aldaw. Sa Bibliya, an sarong aldaw nangangahulugan kun minsan na sarong taon. (Ezekiel 4:6) Arog kaiyan kun manungod sa pitong panahon na sinasabi sa libro nin Daniel—katumbas iyan nin 2,520 taon.
5. Nagbago an kinaban puon kan 1914
Ihinula ni Jesus an magigin kamugtakan kan kinaban pagkatapos na patukawon siya bilang Hadi. Basahon an Lucas 21:9-11, dangan pag-ulayan an hapot na ini:
Arin sa mga kamugtakan na sinambit diyan an nahihiling o nababaretaan mong nangyayari na ngunyan?
Sinabi ni apostol Pablo kun ano an magigin ugali kan mga tawo sa huring mga aldaw kan pamamahala nin tawo. Basahon an 2 Timoteo 3:1-5, dangan pag-ulayan an hapot na ini:
Arin sa mga ugali diyan an nahihiling mo sa mga tawo sa ngunyan?
6. Kun ano an dapat na magin epekto sa sato kan pamamahala kan Kahadian nin Diyos
Basahon an Mateo 24:3, 14, dangan pag-ulayan an mga hapot na ini:
Anong mahalagang gibuhon an nagpapahiling na namamahala na ngunyan an Kahadian nin Diyos?
Paano ka makakapartisipar sa gibuhon na iyan?
Namamahala na ngunyan an Kahadian nin Diyos, asin madali na kaiyan na pamahalaan nin lubos an bilog na daga. Basahon an Hebreo 10:24, 25, dangan pag-ulayan an hapot na ini:
Ano an dapat na gibuhon kan lambang saro sa sato mantang “nahihiling [niyato] na an aldaw paparani na”?
Ano an gigibuhon mo kun may nanudan kang sarong bagay na makakatabang asin makakaligtas sa iba?
TIBAAD MAY MAGHAPOT: “Taano ta importantehon man sa mga Saksi an taon 1914?”
Ano an isisimbag mo?
SUMARYO
An mga propesiya sa Bibliya, kronolohiya, asin kamugtakan sa kinaban nagpapatunay na namamahala na ngunyan an Kahadian nin Diyos. Ipinapahiling ta na nagtutubod kita diyan kun sinasabi ta iyan sa iba asin kun nag-aatender kita sa mga pagtiripon kan kongregasyon.
Rebyu
Ano an nangyari sa katapusan kan pitong panahon na ihinula sa Bibliya sa libro nin Daniel?
Taano ta kumbinsido ka na nagpuon nang mamahala an Kahadian nin Diyos kan 1914?
Paano mo maipapahiling na nagtutubod ka na namamahala na ngunyan an Kahadian?
HILINGON MAN
Aramon an sinasabi kan mga historyador asin kan iba pa manungod sa mga pagbabago sa kinaban puon kan 1914.
“Kung Kailan Biglang Bumaba ang Moral” (Gumising, Abril 2007)
Basahon kun ano an nagin epekto sa buhay nin sarong lalaki kan propesiya na nasa Mateo 24:14.
“Mayo Nang Mas Mahalaga Sako Kisa sa Baseball!” (An Torrengbantayan Num. 3 2017)
Paano ta naaraman na konektado sa Kahadian nin Diyos an propesiya sa Daniel kapitulo 4?
Ano an patunay na an “pitong panahon” na sinambit sa Daniel kapitulo 4 natapos kan 1914?
a Hilingon an huring duwang artikulo na sinambit sa leksiyon na ini sa seksiyon na Hilingon Man.
-
-
Kun Ano ang Gigibuhon kan KahadianMabuhay nin Maugma Sagkod Pa Man!—Interactive na Pag-adal sa Bibliya
-
-
LEKSIYON 33
Kun Ano an Gigibuhon kan Kahadian
Namamahala na an Kahadian nin Diyos. Dai na mahahaloy, magibo iyan nin dakulang mga pagbabago sa daga. Aramon ta an pira sa marahay na mga bagay na lalauman ta sa pamamahala kan Kahadian.
1. Paano madara nin katuninungan asin hustisya sa daga an Kahadian nin Diyos?
Paparaon ni Jesus, an Hadi kan Kahadian nin Diyos, an maraot na mga tawo asin mga gobyerno sa giyera nin Armagedon. (Kapahayagan 16:14, 16) Sa panahon na iyan, lubos na mauutob an panugang ini kan Bibliya: “Dikit na sanang panahon, asin an mga maraot mawawara na.” (Salmo 37:10) Paagi sa Kahadian, sisiguraduhon ni Jesus na magkakaigwa nin katuninungan asin hustisya sa bilog na daga.—Basahon an Isaias 11:4.
2. Ano an magigin buhay ta pag nangyari na an kabutan nin Diyos sa daga?
Sa pamamahala kan Kahadian nin Diyos, “magigin pagsadiri kan mga matanos an daga, asin maistar sinda diyan nin daing sagkod.” (Salmo 37:29) Isipa na sana na gabos na nag-iistar sa daga matanos asin namumutan si Jehova saka an saindang kapwa! Mayo nang magkakahilang, asin an gabos mabubuhay nin daing katapusan.
3. Ano an gigibuhon kan Kahadian nin Diyos pag hinali na an mga maraot?
Pag hinali na an mga maraot, mamamahala si Jesus bilang Hadi sa laog nin 1,000 taon. Sa panahon na iyan, tatabangan ni Jesus asin kan 144,000 na kairiba niyang mga tagapamahala na magin perpekto an gabos na tawo sa daga. Sa pagtatapos kan 1,000 taon, magigin magayunon na paraiso an bilog na daga, asin mauugma an gabos na tawo huli sa pagsunod sa mga pagbuot ni Jehova. Dangan ibabalik ni Jesus an pamamahala sa saiyang Ama, si Jehova. ‘Papakangbanalon an pangaran’ ni Jehova urog kisa kasuarin man. (Mateo 6:9, 10) Mapapatunayan nanggad na si Jehova sarong marahayon na Tagapamahala na nagmamalasakit sa mga nasasakupan niya. Dangan paparaon ni Jehova si Satanas, an mga demonyo, asin an siisay man na marebelde sa Saiyang pamamahala. (Kapahayagan 20:7-10) An marahayon na mga bagay na ipapaabot kan Kahadian nin Diyos magdadanay sagkod pa man.
ARAMON PA
Aramon kun taano ta makakapagtiwala kita na gagamiton nin Diyos an Kahadian para utubon an gabos na panuga niya sa maabot na panahon.
4. Tatapuson kan Kahadian nin Diyos an mga gobyerno nin tawo
“An tawo nananakop sa tawo sa saiyang ikakapahamak.” (Eclesiastes 8:9) Paagi sa saiyang Kahadian, hahalion ni Jehova an ano man na danyos na dara nin inhustisya.
Basahon an Daniel 2:44 asin 2 Tesalonica 1:6-8, dangan pag-ulayan an mga hapot na ini:
Ano an gigibuhon ni Jehova asin kan saiyang Aki na si Jesus sa mga gobyerno nin tawo asin sa mga nagsusuportar diyan?
Sa mga nanudan mo manungod ki Jehova asin ki Jesus, taano ta makakasigurado ka na may hustisya asin makatanusan an mga gigibuhon ninda?
5. Si Jesus an pinakamarahay na Hadi
Bilang Hadi kan Kahadian nin Diyos, kadakul nin gigibuhon si Jesus para tabangan an mga nasasakupan niya digdi sa daga. I-play an VIDEO para mahiling kun paano pinatunayan ni Jesus na gusto niya talagang tabangan an mga tawo asin na igwa siya nin kapangyarihan na hali sa Diyos para gibuhon iyan.
Kan si Jesus yaon digdi sa daga, ipinahiling niya kun ano an gigibuhon kan Kahadian pag-abot nin panahon. Arin sa mga bendisyon na nakalista digdi an gustong-gusto mo nang mangyari? Basahon an mga teksto manungod sa mga bendisyon na iyan.
AN MGA GINIBO NI JESUS KAN YAON SIYA SA DAGA:
AN MGA GIGIBUHON NI JESUS MANTANG NASA LANGIT:
Kinontrol an panahon.—Marcos 4:36-41.
Sosolusyunan an mga problema sa kapalibutan.—Isaias 35:1, 2.
Milagrosong pinakakan an rinibong tawo.—Mateo 14:17-21.
Hahalion an gutom.—Salmo 72:16.
Nagpaumay nin mga hilang.—Lucas 18:35-43.
Sisiguraduhon na dai na magkakahilang an gabos.—Isaias 33:24.
Nagbuhay nin mga gadan.—Lucas 8:49-55.
Bubuhayon an mga gadan asin hahalion an kagadanan.—Kapahayagan 21:3, 4.
6. Papangyarihon kan Kahadian nin Diyos an sarong magayunon na puturo
Lubos na uutubon kan Kahadian an orihinal na katuyuhan ni Jehova para sa mga tawo. Maistar sinda sa paraisong daga nin daing katapusan. I-play an VIDEO para mahiling kun paano ni Jehova ginagamit an saiyang Aki, si Jesus, para mautob an Saiyang katuyuhan.
Basahon an Salmo 145:16, dangan pag-ulayan an hapot na ini:
Ano an namamati mo sa panuga ni Jehova na ‘papaniguan niya an mawot kan lambang bagay na may buhay’?
MAY MGA NAGSASABI: “Kun magkasararo lang kita, masosolusyunan ta an mga problema sa kinaban.”
Anong mga problema an sosolusyunan kan Kahadian nin Diyos na dai kayang solusyunan kan mga gobyerno nin tawo?
SUMARYO
Uutubon kan Kahadian nin Diyos an katuyuhan ni Jehova. Gigibuhon kaiyan na paraiso an bilog na daga na diyan an matanos na mga tawo magsasamba ki Jehova nin daing katapusan.
Rebyu
Paano papakangbanalon kan Kahadian nin Diyos an pangaran ni Jehova?
Taano ta makakapagtiwala kita na uutubon kan Kahadian nin Diyos an mga panuga sa Bibliya?
Sa mga gigibuhon kan Kahadian, ano an gustong-gusto mong mahiling na mangyari?
HILINGON MAN
Aramon kun ano an buot sabihon kan Armagedon.
Aramon an mga mangyayari durante kan inaapod ni Jesus na “dakulang kasakitan.”—Mateo 24:21.
Hilingon kun paano iribanan na makakapaghurop-hurop an mga pamilya sa mga bendisyon na itatao kan Kahadian sa maabot na panahon.
Sa eksperyensiya na “Dakol na Hapot an Nakapurisaw sa Sako,” aramon kun paano nakua kan sarong dating rebelde sa gobyerno an solusyon na hinahanap niya.
“Binago kan Biblia an Saindang Buhay” (An Torrengbantayan, Enero-Marso 2012)
-