Mag-adal na May Bukas na Isip

Mantang nag-aandam kita sa satong pag-adal, puwede tang haputon an satong sadiri, ‘Ano an inaasahan kong manunudan ko digdi?’ Pero, marahay na mag-ingat kita na an mga inaasahan niyato magin dahilan na dai ta na mahiling kun ano an itinutukdo ni Jehova sa sato. Paano ta mapagdadanay na bukas an satong isip pag nag-aadal?

Mamibi para sa kadunungan. Hagadon ki Jehova na tabangan kang masabutan kun ano an gusto niyang manudan mo ngunyan. (Sant. 1:5) Likayan na magsarig sana sa dati mo nang pakasabot.​—Tal. 3:​5, 6.

Tugutan an puwersa kan Bibliya na magkaigwa nin epekto sa saimong buhay. “An tataramon nin Diyos buhay.” (Heb. 4:12) An buhay na “tataramon” nin Diyos puwedeng magkaigwa nin manlain-lain na epekto sa sato sa lambang pagkakataon na binabasa niyato an Bibliya—alagad mangyayari sana iyan kun bukas an isip ta sa kun ano an puwede niyatong manudan o makua diyan mantang nagbabasa kita.

Pahalagahan an gabos na nasa lamesa ni Jehova. An saiyang espirituwal na kakanon nakakaagid sa “sarong bangkete nin masisiram na mga putahe.” (Isa. 25:6) Likayan na lipasan an “mga putahe” na sa hiling mo dai mo magugustuhan. Dai ka lang makikinabang kundi talagang ikakaugma mo man kun ano an itinatao nin Diyos!