Tabang Para sa Minamaltratong mga Babayi

Iyan an introduksiyon kan artikulo sa jw.org na “Kapakanan kan mga Babayi—An Sinasabi kan Bibliya.” Sa katapusan kan artikulong iyan, igwa nin link para maka-download ka nin PDF kaiyan, na puwede mong i-print asin itiklop para magin tract na may apat na pahina. “Nag-print ako nin mga kopya asin dinara mi iyan kan saro pang sister sa sarong pasilidad para sa mga babaying inabuso na nasa teritoryo kan kongregasyon mi,” an sabi kan sister sa Estados Unidos na si Stacy.

Sarong empleyado diyan an naghapot kun puwede siyang magkaigwa nin dagdag pang mga kopya para ipanao sa mga nakaistar sa pasilidad. Bilang resulta, 40 pa kan tract na ini an naitao kaiba kan 30 jw.org contact card. Kan suminunod na pagdalaw, sinabi kan administrador kan pasilidad na ipahiling ninda sa mga nakaistar sa pasilidad kun paano gigibuhon an pag-adal sa Bibliya.

Nagkaigwa si Stacy asin an duwa pang sister nin kaagid na magayon na eksperyensiya kan magduman sinda sa saro pang pasilidad, na diyan limang kopya kan tract an inako asin dakul pa kaiyan an pig-request sa sainda. “An babasahon na ini makakatabang sa mga babayi digdi,” an sabi kan saro sa mga empleyado. Sinabi niya pa, “Kaipuhan mi ini.” Kan suminunod na pagbisita, nagkapirang nakaistar sa pasilidad an nagkatiripon para hilingon kun paano ginigibo an pag-adal sa Bibliya asin duwa sa sainda an nagpahiling nin interes na mag-atender sa sunod na pagtiripon sa puro kan semana sa Kingdom Hall.

Sinabi ni Stacy: “Napangalas kami sa kun gurano karahay kan nagin reaksiyon kan mga tawo sa magayunon na artikulong ini. Pag pig-print asin tiniklop, nagigin kaakit-akit na paagi ini na ihiras an mensahe kan Kahadian sa espesipikong grupong ini nin mga parabasa. Na-touch talaga kami kan marahayon na reaksiyon kan mga tawo, asin excited kami na mahiling kun paano bebendisyunan ni Jehova an samong mga paghihinguwa na urog pang mapaabutan kan maugmang bareta an mga indibidwal na ini.”