Sabihon an Katotoohan sa Mabuot na Paagi

1. Ano an dapat tang gibuhon tanganing magin parte kan pamilya ni Jehova?

“PAANO mo naaraman an katotoohan?” Saro iyan sa parati tang mga ihinahapot sa sarong nakabisto ta pa sanang kapagtubod. An iba nagsisimbag na “nagdakula sinda sa katotoohan.” An iba man tibaad magsabing dai pa sana nahahaloy kan “manudan asin akuon ninda an katotoohan.” Arog kaiyan an mga simbag niyato huling nagpapagiya kita sa katotoohan na nasa Tataramon nin Diyos sa gabos na aspekto kan satong buhay. Taano? Huling aram niyato na magigin parte lang kita kan pamilya ni Jehova kun papatunayan tang namumutan ta an katotoohan asin namumuhay kita kauyon kaiyan. Asin kaiba diyan an pagigin sadiyosan sa satong mga sinasabi asin ginigibo.​—Sal. 15:​1-3.

2. (a) Ano an reputasyon ni Jesus? (b) Ano an nagin epekto sa mga tawo kan mga katotoohan na itinukdo ni Jesus?

² Pirming nagsasabi nin totoo si Jesus. Inadmitir kan mga kaiwal niya na sasabihon niya pa man giraray kun ano an totoo dawa pag dai iyan magustuhan kan mga tawo. (Mat. 22:16) Manungod sa epekto kan mga katotoohan na itinukdo niya, sinabi ni Jesus: “Nag-abot ako tanganing magdara nin pagkabaranga—an aking lalaki tumang sa saiyang ama, asin an aking babayi tumang sa saiyang ina, saka an manugang na babayi tumang sa saiyang panugangan na babayi.” (Mat. 10:35) Habo man ni Jesus na magin negatibo an reaksiyon kan mga tawo sa mensaheng ihinuhulit niya asin kan mga parasunod niya, pero realistiko siya. (Mat. 23:37) Aram niyang an saiyang mensahe magigin dahilan na mabanga sa duwang grupo an mga tawo—an mga namumuot sa katotoohan na nasa Bibliya asin an mga dai namumuot diyan.​—2 Tes. 2:​9-11.

3. Ano an pag-uulayan niyato sa artikulong ini?

³ Arog ni Jesus, hinihinguwa tang magin sadiyosan kaya nagsasabi kita nin totoo sa gabos na panahon dawa habuan kita kan mga tawo huli kaiyan. Ihinuhulit asin itinutukdo ta man an katotoohan na nasa Bibliya, dawa tibaad maanggot an iba sa mensaheng dara ta. Nangangahulugan daw ini na dai ta na kaipuhan na magin makonsiderasyon sa kun paano asin kun nuarin ta sinasabi an katotoohan? Dai nanggad! Sa artikulong ini, sisimbagon ta nguna an mahalagang hapot na: Sain ta mahahanap an katotoohan? Dangan sisimbagon ta an konektadong hapot na: Taano, paano, asin nuarin ta dapat sabihon an katotoohan? An simbag sa mga hapot na iyan makakatabang sa sato na mapauswag an satong kakayahan na sabihon an katotoohan sa mabuot na paagi, an buot sabihon, sa mataktikang paagi asin sa tamang panahon.

SAIN TA MAHAHANAP AN KATOTOOHAN?

4. Taano ta masasabi niyatong si Jehova an Gikanan nin katotoohan?

⁴ Si Jehova an Gikanan nin katotoohan. An gabos na sinasabi niya katotoohan. Halimbawa, totoo an mga sinasabi niya manungod sa kun ano an tama asin kun ano an sala. (Sal. 19:9; 119:​142, 151) Nagkakatotoo an gabos na sinasabi niya manungod sa maabot. (Isa. 55:​10, 11) Pag nanuga si Jehova, pirmi niyang inuutob iyan. (Bil. 23:19) Sa katunayan, imposible nanggad na magputik si Jehova! (Heb. 6:18) Kaya bakong makangangalas na si Jehova “an Diyos nin katotoohan.”​—Sal. 31:5.

5. Taano ta bako man dipisil na hanapon “an Diyos nin katotoohan”? Ipaliwanag. (Gibo 17:27)

⁵ May mga nagsasabi na dipisil daang hanapon si Jehova, “an Diyos nin katotoohan.” Pero sala nanggad sinda. Nasa palibot lang niyato an mga ebidensiya na nag-eeksister siya. (Roma 1:20) Kan nagtataram si apostol Pablo sa tahaw kan sarong grupo nin mga edukadong Griego sa Atenas, sinabi niya na gusto kan Diyos na “hanapon [niyato] siya” asin na “bako man siyang harayo sa lambang saro sa sato.” (Basahon an Gibo 17:27.) Sa katunayan, irinarani ni Jehova sa saiya an mapakumbabang mga tawo na naghahanap kan katotoohan.​—Juan 6:44.

6. Ano an nagkapira sa mga katotoohan na nasa Bibliya, asin taano ta nagpapasalamat ka na naaraman mo an mga iyan?

⁶ An saro sa mga paagi na mahahanap ta si Jehova iyo an pag-adal nin Bibliya. An mga lalaking nagsurat kan librong iyan pinasabngan kan banal na espiritu nin Diyos. (2 Ped. 1:​20, 21) Kaya an gabos na laog kan Bibliya katotoohan asin mapagtitiwalaan niyato. Halimbawa, mapagtitiwalaan ta an sinasabi kaiyan manungod sa kun paano nagpuon an uniberso asin an buhay digdi sa daga. (Gen. 1:​1, 26) Mapagtitiwalaan ta an sinasabi kaiyan manungod sa kun taano ta gabos kita nagkakasala, kun taano ta igwa nin grabeng pagsakit, asin kun taano ta nagagadan kita. (Roma 5:12; 6:23) Lubos kitang makakapagtiwala sa sinasabi kaiyan na hahalion ni Jehova, paagi kan saiyang Aki, an gabos na danyos na ginibo ni Satanas, “an ama kan kaputikan.” (Juan 8:44; Roma 16:20) Asin masasarigan ta an panuga kan Bibliya na lalaglagon ni Jesus an mga maraot, bubuhayon an mga gadan, gigibuhon na paraiso an daga, asin tatabangan kitang magin perpekto. (Juan 11:​25, 26; 1 Juan 3:8) Sarong dakulang pribilehiyo nanggad iyan na itinao sa sato ni Jehova! Itinukdo niya sa sato an katotoohan, asin tinawan niya kita kan oportunidad na itukdo man iyan sa iba.​—Mat. 28:​19, 20.

KUN TAANO TA NAGTATARAM KITA KAN KATOTOOHAN

7-8. Mahalaga daw kun ano an motibo ta sa pagsabi nin katotoohan? Magtao nin halimbawa. (Marcos 3:​11, 12) (Hilingon man an mga ritrato.)

⁷ Arog kan sinambit kasubago, dapat kitang magtaram nin sadiyosan kun gusto tang magin parte kan pamilya ni Jehova. Alagad, urog pa diyan an kaipuhan tanganing mapaugma siya. Mahalaga man ki Jehova an dahilan kaya sadiyosan kita sa mga sinasabi ta. Pag-isipan an nangyari kaidtong ministeryo ni Jesus digdi sa daga. (Basahon an Marcos 3:​11, 12.) Kan naghuhulit si Jesus harani sa Dagat nin Galilea, nagkatiripon sa palibot niya an dakulon na tawo. Kabilang sa mga ini an mga tawong sinaniban nin demonyo. Nagruluhod sinda sa atubangan ni Jesus asin nagkurahaw: “Ika an Aki nin Diyos.” Taano ta nagsabi nin katotoohan manungod ki Jesus an mga demonyong idto? Gusto nindang makua an tiwala kan mga nagdadangog sa sainda dangan irayo sinda ki Jehova. Totoo man an sinabi kan mga demonyo, pero makasadiri an motibo ninda. Dai ninda nadaya si Jesus; ni napaugma man ninda siya. Sa katunayan, ipinagbuot ni Jesus sa mga demonyo na dai maghulit manungod sa saiya.

⁸ Ano an manunudan ta sa pangyayaring iyan? Mahalaga ki Jehova an motibo niyato sa pagsabi nin katotoohan. Mahalaga nanggad na dalisay an motibo ta sa pagtukdo kan katotoohan asin na itao niyato ki Jehova, bako sa sadiri ta, an ano man na kamurawayan o pag-umaw na inaako ta!—Mat. 5:16; ikumparar an Gibo 14:​12-15.

9. Ano an dapat tang likayan, asin taano?

⁹ Pag-isipan an saro pang sitwasyon na diyan dapat tang likayan na hinguwahon na matawan nin kamurawayan an sadiri ta. Ipamugtak na may sarong masasarigan na brother na pinagkatiwalaan kita nin pirang kumpidensiyal na impormasyon dangan sinabi ta man iyan sa iba. Kun maaraman ninda sa huri na totoo an mga sinabi ta sa sainda, tibaad maghanga sinda sa mga naaaraman ta asin isipon na pinagkakatiwalaan kita nin dakul na kumpidensiyal na impormasyon. Puwede kaiyan na mapalangkaw an paghiling ninda sa sato, pero dai kaiyan mapapalangkaw an paghiling sa sato ni Jehova. (Tal. 11:13) Taano? Huling dawa ngani totoo man an sinabi ta, sala na ihiras sa iba an kumpidensiyal na impormasyon asin sala man an motibo ta sa pagsabi kaiyan.

KUN PAANO KITA MATARAM NIN KATOTOOHAN

10. Ano an buot sabihon kan “mabuot” na pagtaram? (Colosas 4:6)

¹⁰ Basahon an Colosas 4:6. Ipinagirumdom ni apostol Pablo sa mga Kristiyanong nakaistar sa Colosas na an saindang pagtaram dapat na ‘pirming magin mabuot.’ Ano an buot sabihon kaiyan? Sa orihinal na lengguwahe, an ekspresyon na iyan nagtatao kan ideya na an satong pagtaram dapat na bako lang kapaki-pakinabang kundi nakakaengganyo man.

11-12. Taano ta dapat kitang magin maingat sa pagtukdo kan katotoohan? Iilustrar. (Hilingon man an mga ritrato.)

¹¹ Pag nagtutukdo kita kan katotoohan, kaipuhan tang iaplikar an sadol ni Pablo na magin mabuot. Iinagid mismo kan Bibliya an mga katotoohan na yaon diyan sa sarong matarom na espada na kayang pagsiblagon an satong kalag saka espiritu. An buot sabihon, kaya kaiyan na ihayag an satong kauruiraruming mga namamatian asin motibo. (Heb. 4:12) Pero kun dai ta gagamiton nin mahusay an Bibliya, tibaad makulgan ta an buot kan kaulay ta asin magkawsa nin argumento. Paano iyan puwedeng mangyari?

¹² Imahinara an eksenang ini. Nasa ministeryo ngaya kita asin may nanumpungan kitang sarong lalaking regular na namimibi sa mga imahen saka nag-i-enjoy sa pagselebrar nin Pasko asin Pasko nin Pagkabuhay (Easter) kaiba an saiyang pamilya. Gamit an Bibliya, puwede tang ipahiling sa lalaki na kamangmangan nanggad na mamibi sa daing buhay na mga imahen asin patunayan na paganong mga selebrasyon an Pasko asin Pasko nin Pagkabuhay. (Isa. 44:​14-20; 2 Cor. 6:​14-17) Kun gigibuhon ta iyan sa inot pa lang niyatong pakikipag-ulay sa saiya, totoo man an sasabihon ta, alagad dai ta magagamit nin mahusay an Tataramon nin Diyos.

13. Paano ta titimplahan nin asin an satong mga tataramon?

¹³ Sinabi man ni Pablo na dapat na timplahan ta nin asin an mga sinasabi ta. Dai niya man buot sabihon na dapat tang biribidon an katotoohan o itago iyan. Imbes, dinadagka niya kitang magtaram sa ‘timpladong’ paagi tanganing maipresentar ta an katotoohan sa paaging masiram sa ‘pagnamit’ kan nagdadangog. (Job 12:11) Puwedeng magin dipisil iyan. Pag-abot sa literal na kakanon, tibaad isipon niyato na kun ano an masiram sa sato iyo na man iyan an masiram sa pagnamit kan iba. Sa kaagid na paagi, tibaad isipon man niyato na an paagi ta nin pagtaram magayon sa pandangog kan gabos. Pero bako iyan arog kaiyan. Halimbawa, sa nagkapirang kultura direkta kun magpahayag nin opinyon an mga tawo, dawa pag mas maedad sa sainda an kaulay ninda. Alagad sa ibang kultura tibaad bakong akseptable an arog kaiyan, nakakakulog pa ngani. Sinabi ni Pablo na dapat na maaraman niyato kun paano “dapat magsimbag sa lambang tawo.” Ipinaparisa kaini na dapat na timplahon ta an mga sinasabi ta, bakong kauyon kan satong pagnamit o kultura, kundi kauyon kan pagnamit kan nagdadangog sa sato.

KUN NUARIN MATARAM NIN KATOTOOHAN

14. Kan si Jesus yaon digdi sa daga, itinukdo niya daw sa saiyang mga disipulo an gabos na aram niya? Ipaliwanag.

¹⁴ Pirming mabuot si Jesus pag nagtataram sa saiyang mga parasunod, asin mabuot niya sindang tinukduan nin dakul na bagay. (Mar. 6:34) Pero dakulon pa sindang dai aram. Dawa arog kaiyan, dai pinurbaran ni Jesus na tukduan sinda kan gabos na aram niya. Kinonsiderar niya an saindang mga limitasyon. Nasasabutan niya na bako pa idto an tamang panahon na maaraman ninda an nagkapirang katotoohan. Sa katunayan, sinabi niya na dai ninda makakayang masabutan an mga katotoohan na iyan. (Juan 16:12) Ano an itinutukdo kaini sa sato?

15. Dapat daw na itukdo ta nin sararuan sana sa satong mga tinutukduan sa Bibliya an gabos niyatong naaaraman? Ipaliwanag. (Talinhaga 25:11) (Hilingon man an ritrato.)

¹⁵ Ipinapahiling kan halimbawa ni Jesus na dai man nangangahulugan na miling aram ta an katotoohan kaipuhan ta nang itukdo nin sararuan sana an gabos niyatong naaaraman. Paano ta maaarog si Jesus? Dapat tang ikonsiderar an kamugtakan kan mga tawo. Balikan ta an lalaking nag-i-enjoy sa pagselebrar nin Pasko asin Pasko nin Pagkabuhay kaiba an saiyang pamilya. Aram niyato na pagano an pinaghalian kan mga selebrasyon na iyan asin dai inuuyunan nin Diyos. Pero sabihon ta ngayang napunan mo siya nin pag-adal sa Bibliya mga saro o duwang semana bago an Pasko. Masasabi daw na mabuot ka sa pagtaram kun ipapahiling mo sa saiya an sinasabi kan Bibliya manungod sa paganong mga selebrasyon asin aasahan na dai na siya tulos maselebrar nin Pasko? Totoo na may mga tinutukduan na nag-aaplikar tulos kan gabos na nanunudan ninda sa Bibliya. Pero an iba nangangaipo nin panahon para i-adjust an saindang kaisipan asin paggawi. Matatabangan tang umuswag an satong mga tinutukduan sa Bibliya kun sasabihon ta sa sainda an mga kaipuhan nindang maaraman sa tamang panahon, an buot sabihon, pag kaya na ninda iyan na masabutan.​—Basahon an Talinhaga 25:11.

16. Paano ta matatabangan an satong mga tinutukduan sa Bibliya na ‘padagos na maglakaw sa katotoohan’?

¹⁶ Nakakamati nanggad kita nin dakulang kaugmahan sa pagtabang sa iba na manudan an katotoohan manungod ki Jehova. Matatabangan ta sinda na ‘padagos na maglakaw sa katotoohan’ kun gigibuhon ta an minasunod: Padagos na magpahiling nin marahay na halimbawa sa sainda. (3 Juan 3, 4) Siguraduhon na mahihiling sa satong paagi nin pamumuhay na nagtutubod kita sa mga panuga na nasa Tataramon nin Diyos. Magtaram kan katotoohan nin may malinig na motibo. Magtaram nin may kabuutan paagi sa paggamit nin mataktikang mga tataramon sa tamang panahon. Asin itao ki Jehova an ano man na pag-umaw na inaako mo. Kun gigibuhon mo iyan, mapapatunayan mo na pagsadiri ka ni Jehova, an Diyos nin katotoohan.