Siisay an Makakapagligtas kan Daga?

Dakul an nahahadit ta rinaraot daa kan mga tawo an daga saka an mga nabubuhay diyan. Sinasabi kan mga eksperto na grabe nang destroso an ginigibo kan mga tawo ngunyan kaya namemeligrong mawara an iba-ibang klase nin buhay sa planetang daga.

Dagos na daw na mararaot kan mga tawo an daga? O maabot pa daw an panahon na mabubuhay sinda diyan na dai rinaraot an kapalibutan?

Kaya daw iligtas kan mga tawo an daga?

Nagtutubod an dakul na eksperto na kaya kan mga tawo na protektaran an daga saka mamuhay diyan na dai rinaraot an kapalibutan. May mga parasiyasat na nagsasabi na para magibo iyan, igwang nagkapirang bagay na dapat baguhon nin sabay-sabay. Kaiba diyan an:

• Pagpakarhay sa pag-asikaso kan daga, mga kadlagan, mga dagang matubig, saka mga dagat.

• Paggamit nin iba-ibang mga pamamaagi nin pagtanom asin mga pigkukuanan nin enerhiya.

• Pagbago sa sistema nin pagprodusir saka pagdistribwir nin mga pagkakan tanganing mas magkakan an mga tawo nin mga prutas saka gulay tapos dikit sanang karne saka sira. Dahil diyan mababawasan an makokonsumo ninda saka su masasayang na kakanon.

• Pag-ako na an maugmang buhay dai nakadepende sa pagkaigwa nin mas dakul pang materyal na bagay.

Ano sa hiling mo? Realistiko daw na asahan niyato na magtatarabangan sa mga bagay na iyan an mga nasa gobyerno, negosyante, saka mga indibidwal? O bakong posible iyan dahil may mga tawo na mahanab saka makasadiring marhay tapos mayong pakiaram sa mga mangyayari sa maabot na panahon?—2 Timoteo 3:1-5.

May pag-asa pa

Sinisigurado sa sato kan Bibliya na talagang dai maaano an planetang daga. Ipinapaliwanag kaiyan kun taano ta dai kaya kan mga tawo na iligtas an daga, saka sinasabi kaiyan kun ano talagang pagbabago an dapat na gibuhon asin kun paano man iyan mangyayari.

Kun taano ta dai kaya kan tawo na iligtas an daga. Linalang kan Diyos na Jehovaa an daga, saka itinao niya sa mga tawo an responsabilidad na asikasuhon iyan. (Genesis 1:28; 2:15) Magigibo sana ninda iyan kun susunudon ninda an paggiya kan saindang Kaglalang. (Talinhaga 20:24) Kaso dai ninda sinusunod si Jehova; sadiri ninda an mas gusto nindang sunudon. (Parahulit 7:29) Kun sinda sana, mayong kakayahan an mga tawo na atamanon an daga, saka maghinguwa man sindang marhay limitado sana an magigibo ninda.—Talinhaga 21:30; Jeremias 10:23.

An pagbabago na dapat gibuhon. Hahalion nin Diyos an mga tawong nagraraot kan daga. (Kapahayagan 11:18) Dai niya aayuson an mga gobyerno saka an sosyedad nin mga tawo na nagraraot kan daga; sasalidahan niya an mga iyan. (Kapahayagan 21:1) Kaya sinabi ni Jehova: “Uya! Ginigibo kong bago an gabos na bagay.”—Kapahayagan 21:5.

Kun paano mangyayari an pagbabago. Sasalidahan ni Jehova an mga gobyerno nin tawo kan gobyernong nasa langit na inaapod na Kahadian nin Diyos. Papamahalaan kan gobyernong iyan an bilog na daga, sa panginginot ni Jesu-Cristo.—Daniel 2:44; Mateo 6:10.

Tutukduan kan Kahadian nin Diyos an mga tawo na mamuhay kauyon kan matanos na mga pamantayan nin Diyos. Kun aakuon kan mga tawo na an Diyos an saindang Kaglalang saka susunudon ninda an paggiya niya, magigibo nindang mamuhay sa daga na dai rinaraot an kapalibutan. (Isaias 11:9) Ipinapahiling kan Bibliya na sa irarom kan gobyerno nin Diyos, magkakaigwa nin maugmang buhay an mga tawo, na dai nararaot an daga. Uni an mga gigibuhon kaiyan:

• Matao nin pagkakan para sa gabos.—Salmo 72:16.

• Ibabalik an kagayunan kan kapalibutan.—Isaias 35:1, 2, 6, 7.

• Sisiguraduhon na aatamanon kan mga tawo an mga hayop saka dai kukulgan kan mga hayop an mga tawo.—Isaias 11:6-8; Oseas 2:18.

• Hahalion an natural na mga kalamidad.—Marcos 4:37-41.

Makakaasa ka na dai na mahahaloy, gigibuhon na kan Kahadian nin Diyos an mga pagbabagong ini. Para sa iba pang impormasyon, basahon an artikulong “Nuarin Mamamahala sa Daga an Kahadian nin Diyos?”