Yeremia
18 Icebo icaishile kuli Yeremia ukufuma kuli Yehova, ica kuti: 2 “Ima, kabiye ku ng’anda ya kwa nakabumba,+ kabili kulya e ko ndekulenga ukumfwa amashiwi yandi.”
3 Na ine naile ku ng’anda ya kwa nakabumba, kabili moneni, alebomba umulimo pa mipeto ya kwa nakabumba. 4 Ne cipe ico alebumba calyonawilwe ku kuboko kwa kwa nakabumba, kabili alyalwike no kupanga icipe cimbi ukulingana ne caweme mu menso ya kwa nakabumba.+
5 Icebo ca kwa Yehova caishile kuli ine na kabili, no kutila: 6 “‘Bushe na ine te kuti ncite kuli imwe, ngo yu nakabumba, mwe ba mu ng’anda ya kwa Israele?’ e fyasosa Yehova. ‘Moneni! Filya iloba lyaba mu minwe ya kwa nakabumba, e fyo na imwe mwaba mu minwe yandi, mwe ba mu ng’anda ya kwa Israele.+ 7 Nga nasosa ukuti ndi no kunukula, ukubongolola no kulofya uluko napamo ubufumu,+ 8 nomba ulo luko lwaleka ukucita ifibi ifyo nalusokelepo,+ na ine nkalanguluka pa bubi ubo napangile ukucita kuli lwena.+ 9 Lelo nga nasosa ukuti ndi no kukuula no kulimba uluko nelyo ubufumu,+ 10 na lo lwacita ifyabipa mu menso yandi pa kukanaumfwa kwi shiwi lyandi,+ na ine nkomfwa ubulanda pa fisuma ifyo nasosele ukuti nkalucitila pa kuti ifintu filuwamine.’
11 “Kabili nomba, shi eba abaYuda na bekashi ba mu Yerusalemu, auti, ‘Yehova atila: “Moneni, ndemupangila ububi kabili ndi na mapange pali imwe.+ Shi bweleni cila muntu aleke imibele yakwe iibi, no kuwamya imibele yenu ne micitile yenu.”’”+
12 E lyo na bo batile: “Awe tatwaumfwe ifyo ulesosa!+ Pantu twakulakonka amapange yesu, kabili cila muntu akulacita ifyatalama ifili mu mutima wakwe uubi.”+
13 E ico Yehova atila: “Ipusheni mwe bene mu nko. Nani uwaumfwapo ifya musango yu? Kuli ica bunani icikulu ico nacisungu Israele acitile.+ 14 Bushe imfula ya bunga bunga iya ku Lebanone kuti yafuma pa cilibwe ica mu mpanga? Nelyo bushe amenshi ayatalala ayalekonkoloka kuti yakama?15 Pantu abantu bandi balindaba+ pa mulandu wa kuti bafutumwina icushi ce lambo ku cintu ica fye,+ na pa mulandu wa kuti balenga abantu ukuipununa mu mibele yabo,+ mu nshila sha kale,+ ukuti bende mu nshila, mu nshila ishishalundumana, 16 pa kuti balenge icalo ukuba ica kupapa,+ ica kulishisha umunsoli umuyayaya.+ Na onse uulepitapo akapapa fye no kupukunya umutwe.+ 17 Nkabasalanganya kwati mwela wa ku kabanga pa ntanshi ya balwani babo.+ Nkabalanga inuma yandi, te cinso,+ mu nshita ya kucula kwabo.”
18 Na bo batile: “Iseni tupange amapange+ pali Yeremia, pantu amafunde tayakalobe kuli shimapepo+ nangu ukupanda amano ukwa wa mano nangu mashiwi ya kwa kasesema.+ Natuleya, tumuumine ku mashiwi yesu,+ kabili twikutika ku mashiwi yakwe iyo.”
19 ‘Mwe Yehova, nkutikeni, kabili umfweni ishiwi lya balwani bandi.+ 20 Bushe ububi e cilambu icifwile ukupeelwa pa busuma?+ Pantu nabanyimbila+ ubucinga. Ibukisheni ifyo naiminina ku cinso cenu pa kuti mbalandileko bwino, ukuti mubweshe ubukali bwenu pali bena.+ 21 E ico lekeni icopowe cise pa bana babo,+ kabili bapeeleni ku maka ya lupanga;+ lekeni na bakashi babo bafwilwe abana, kabili lekeni babe bamukamfwilwa.+ Lekeni abaume babo bafwe ku cinkunka icabipa, na balumendo babo lekeni bakomwe ku lupanga mu bulwi.+ 22 Lekeni kube ukupunda mu mayanda yabo, ilyo mwabaletela ifipondo.+ Pantu nabemba ubucinga bwa kunjikatilamo, kabili nabafisa ifiteyo fya kwikata amakasa yandi.+
23 Lelo, mwe Yehova, mwalishiba amapange yabo yonse aya kufwaya ukunjipaya.+ Mwifimba pa filubo fyabo, kabili mwifuuta ulubembu lwabo ku cinso cenu; lelo lekeni baipunune pa ntanshi yenu.+ Mu nshita ya bukali bwenu, mukabakande.+