Abena Roma
2 E ico we muntu,+ apo fye uli muntu, nga ulapingula+ ninshi taukwete umwa kubepesha; pantu umo upingwila umbi, ulaishinina we mwine, apo we upingula+ na iwe ucita ifyo fine.+ 2 Nomba ifwe twalishiba ukuti Lesa akapingula abacita ifi fintu, ukulingana ne fyo bacita.+
3 We muntu,+ ilyo ulepingula abacita ifi fintu uku ninshi na iwe e fyo ucita, bushe utila ukapusuka ubupingushi bwa kwa Lesa?+ 4 Nelyo bushe ni co walisuula ubukulu bwa cikuuku+ cakwe no bwa kutekanya+ kwakwe no bwa kushishimisha+ kwakwe? Bushe tawaishiba ukuti icikuuku ca kwa Lesa ca kukutwala ku kulapila?+ 5 Lelo pa mulandu wa kutalama+ kobe na pa kukanafwaya ukulapila,+ ukailetela ubukali+ pa bushiku bwa bukali+ kabili ubwa kusokolwelamo+ ubupingushi bwalungama ubwa kwa Lesa.+ 6 Kabili akapingula umo na umo ukulingana ne milimo yakwe:+ 7 akapeela ubumi bwa muyayaya ku bafwayafwaya ubukata no mucinshi no bumi ubushakonaike+ pa kutwalilila ukubomba umulimo usuma; 8 lelo, ku ba lubuli+ kabili abashinakila icine+ lelo abacita ifyabipa kukaba ubukali ne cipyu,+ 9 ubucushi no bulanda, ku muntu onse uucita ifyabipa, pa kubala ku muYuda+ e lyo na ku muGriki;+ 10 lelo ubukata no mucinshi no mutende fikaba kuli onse uucita ifisuma,+ pa kubala ku muYuda+ e lyo na ku muGriki.+ 11 Pantu kuli Lesa takwaba kapaatulula.+
12 Pantu bonse ababembwike apabula amafunde bakaloba apabula amafunde;+ kabili bonse ababembwike ninshi bali mu mafunde+ bakapingulwa ku mafunde yene aya.+ 13 Pantu abomfwa amafunde te balungama ku menso ya kwa Lesa, lelo abacita+ amafunde e bakalungamikwa.+ 14 Pantu lyonse ilyo abena fyalo+ abashakwata amafunde+ bacita ku cifyalilwa ifya mu mafunde,+ aba bantu, nangu tabakwata amafunde, baba e mafunde abene. 15 Aba bene e balanga ukuti ifyaba mu mafunde fyalembwa mu mitima yabo,+ ilyo kampingu+ wabo aleshimika ubunte pamo na bo, kabili mu matontonkanyo yabo abene, balepeelwa umulandu+ nelyo fye ukulungamikwa. 16 Ifi e fyo cikaba mu bushiku ilyo Lesa ukupitila muli Yesu Kristu akapingula+ abantu+ pa fyo bacita mu bumfisolo,+ ukulingana ne mbila nsuma iyo mbila.+
17 Lelo, nga witwa+ umuYuda kabili washintilila pa mafunde+ no kuitakishisha muli Lesa,+ 18 walishiba no kufwaya+ kwakwe kabili kuti wailuka ifyacindama pantu walifundwa ifya mu Mafunde;+ 19 kabili walishininwa ukuti uli ntungulushi ya mpofu,+ waba ngo lubuuto ku baba mu mfifi,+ 20 kalungika wa bawelewele,+ kasambilisha wa tunya,+ kabili walishibako+ fimo pali Lesa ne cine+ ifyaba mu mafunde 21 bushe iwe, we usambilisha umbi, taubala waisambilisha we mwine?+ We ubila auti “Wilaiba,”+ bushe uleba?+ 22 We utila “Wilacita bucende,”+ bushe ulacita ubucende? We wapata utulubi, bushe wiba+ ifya mu matempele? 23 We uitakishisha mu Mafunde, bushe usaalula Lesa pa kupula mu mafunde?+ 24 Pantu “ishina lya kwa Lesa lilepontelwa mu bena fyalo pa mulandu wenu”;+ nga filya fine calembwa.
25 Na kuba ukusembululwa+ kuli no kukuwamina fye nga ulekonka amafunde;+ lelo nga ni we mpulamafunde, ukusembululwa+ kobe cimo fye no kukanasembululwa.+ 26 E co, kanshi, ngo ushasembululwa+ alekonka ifipope+ fyalungama ifya mu Mafunde, bushe tabakamumone ngo wasembululwa nangu ca kutila tasembululwa?+ 27 Kabili uushasembululwa, akakupingula+ ilyo alekonka Amafunde, akakupingula we upula mu mafunde, we uli na mafunde yalembwa no kusembululwa walisembululwa. 28 Pantu ukuba umuYuda wine wine te kwa ku nse fye,+ nangu ukusembululwa te kwa ku nse fye ku mubili.+ 29 Lelo umuYuda ni uyo uuli umuYuda mu mutima,+ no kusembululwa kwakwe ni kulya ukwa mutima+ ku mupashi, te kwa mafunde yalembwa iyo.+ Ukutashiwa+ kwa wabe fi takufuma ku bantu, lelo kufuma kuli Lesa.+