Yeremia

36 Nomba mu mwaka walenga ine ukutula apo Yehoyakimu+ mwana Yoshia, imfumu ya kwa Yuda, atendekeele ukuteka, icebo ici caishile kuli Yeremia ukufuma kuli Yehova, aciti: 2 “Buula ibuuku ilyapombwa,+ no kulembapo amashiwi+ yonse ayo nasosa kuli iwe pali Israele na pali Yuda+ na pa nko shonse,+ ukutula pa bushiku nalandile kuli iwe, ukufuma mu nshiku sha kwa Yoshia, ukufika na kuli buno bushiku.+ 3 Napamo aba mu ng’anda ya kwa Yuda kuti baumfwa ubucushi bonse ubo ndefwaya ukubaletela,+ no kuleka cila muntu imibele yakwe iyabipa,+ na ine nabeleela ifilubo fyabo ne membu shabo.”+

4 Na o Yeremia aitile Baruki+ mwana Neria, ukuti alembe pe buuku ilyapompwa+ amashiwi yonse aya kwa Yehova ayo amwebele, ayo Yeremia ali no kusosa kuli Baruki. 5 E lyo Yeremia aebele Baruki ati: “Ine nabandesha ukwingila mu ng’anda ya kwa Yehova.+ 6 Nomba iwe wingile no kubelenga amashiwi ya kwa Yehova+ ayo nsosele kuli iwe ayali mu mufungilo ayo iwe ulembele, ubelengele abantu abali mu ng’anda ya kwa Yehova mu bushiku bwa kuleka ukulya;+ kabili ubelengele na baYuda bonse abaleisa ukufuma ku misumba yabo.+ 7 Napamo ukulomba kwabo ukwa kuti bapaalwe kuti kwafika kuli Yehova+ kabili kuti baleka cila muntu imibele yakwe iyabipa,+ pantu ubukali ne cipyu ifyo Yehova alandile pali aba bantu fikalamba.”+

8 E lyo Baruki+ mwana Neria acitile ukulingana na fyonse ifyo Yeremia amwebele, abelengele amashiwi ya kwa Yehova mwi buuku+ mu ng’anda ya kwa Yehova.+

9 Nomba mu mwaka walenga isano ukutula apo Yehoyakimu+ mwana Yoshia, imfumu ya kwa Yuda, atendekeele ukuteka, mu mweshi walenga pabula (9),+ abantu bonse mu Yerusalemu na bantu bonse abalefuma mu misumba ya mu calo ca kwa Yuda no kwisa ku Yerusalemu babilishe ukuti kube ukuleka ukulya pa ntanshi ya kwa Yehova.+ 10 Awe Baruki abelengele amashiwi ya kwa Yeremia mwi buuku mu ng’anda ya kwa Yehova, mu muputule wa kuliilamo+ uwa kwa Gemaria+ mwana Shafani+ kakopolola+ wa mafunde, mu lubansa lwa pa muulu, pa mwinshi wa mpongolo iipya iya ng’anda ya kwa Yehova,+ ku bantu bonse.

11 Na Mikaya mwana Gemaria mwana Shafani+ aumfwile amashiwi yonse aya kwa Yehova ayali mwi buuku. 12 Na o e pa kuya ku ng’anda ya mfumu, ku muputule wa kuliilamo uwa kwa kalemba, kabili moneni! mulya e mwaikele bacilolo bonse, Elishama+ kalemba na Delaya+ mwana Shemaya na Elnatani+ mwana Akbore+ na Gemaria+ mwana Shafani+ na Sidekia mwana Hanania na bacilolo bonse bambi. 13 Kabili Mikaya+ abebele amashiwi yonse ayo aumfwile ilyo Baruki abelengeele abantu mwi buuku.+

14 E lyo bacilolo bonse batumine kuli Baruki+ Yeudi+ mwana Netania mwana Shelemia mwana Kushi abati: “Senda umufungilo uo ubelengeele abantu no kwisa kuno.” Awe Baruki mwana Neria asendele umufungilo mu minwe yakwe no kuya kuli bena.+ 15 Na bo bamwebele abati: “Shi ikalako, no kutubelengela.” Na o Baruki+ alibabelengeele.

16 Nomba ilyo fye baumfwile amashiwi yonse, baliloleshenye mwenso mwenso; kabili baebele Baruki abati: “Twalaeba imfumu aya mashiwi yonse.”+ 17 Baipwishe na Baruki abati: “Shi, twebe, Nga walembele shani amashiwi yonse aya ayo Yeremia asosele?”+ 18 Na o Baruki abaswike ati: “Alandile aya mashiwi yonse ukufuma mu kanwa kakwe, na ine nalembele mwi buuku kuli inki.”+ 19 E lyo bacilolo batile kuli Baruki: “Kabiye, kafisame, iwe na Yeremia, pa kuti umuntu eishiba uko muli.”+

20 Awe bafikile ku mfumu, mu lubansa,+ bashiile ne buuku ilyapombwa mu muputule wa kuliilamo+ uwa kwa Elishama+ kalemba; baebele ne mfumu amashiwi yonse.

21 Na yo imfumu yatumine Yeudi+ ku kuyasenda ibuuku ilyapombwa. Na o alilibuulile mu muputule wa kuliilamo uwa kwa Elishama+ kalemba.+ Kabili Yeudi atendeke ukubelengela imfumu na bacilolo bonse abaiminine mupepi ne mfumu ifyali mwi buuku. 22 Ne mfumu yaikele mu ng’anda ya mu nshita ya mpepo,+ mu mweshi walenga pabula (9),+ ninshi ne mbabula+ iileaka pa ntanshi ya iko. 23 Nomba yaleti nga Yeudi abelenga fye amabula yatatu nelyo yane, ayalepula ku mwele wa kwa kalemba, no kuyapoosa mu mulilo uwali pa mbabula, mpaka ibuuku lyonse lyapooswa mu mulilo uwali pa mbabula.+ 24 Kabili tabaumfwile na mwenso nakalya;+ ne mfumu na babomfi ba iko bonse abaleumfwa aya mashiwi yonse tabalepwile ne fya kufwala fyabo.+ 25 Na Elnatani+ na Delaya+ na Gemaria+ bapapeete imfumu ukuti ioca ibuuku, lelo tayaumfwile kuli bena.+ 26 Ne mfumu yaebele Yeraameele umwana wa mfumu na Seraya mwana Asriele na Shelemia mwana Abdeele ukuti balete Baruki kalemba na Yeremia kasesema.+ Lelo Yehova alibafishile.+

27 Kabili icebo ca kwa Yehova caishile na kabili kuli Yeremia ninshi imfumu nayoca ibuuku na mashiwi ayo Baruki+ alembele ayo Yeremia+ asosele, no kutila:28 “Buula na kabili ibuuku limbi, no kulembamo amashiwi yonse aya ntanshi ayali mwi buuku lya ntanshi, ilyo Yehoyakimu imfumu ya kwa Yuda yaocele.+ 29 Kabili webe Yehoyakimu imfumu ya kwa Yuda auti, ‘Yehova atila: “Iwe naoca ibuuku,+ no kusosa auti, ‘Mulandu nshi ulembelepo+ auti: “Ukwisa kwena ikesa imfumu ya ku Babiloni no konaula cino calo no kulofya abantu ne nama”?’+ 30 E ico Yehova atila kuli Yehoyakimu imfumu ya kwa Yuda, ‘Takwakabe kuli ena uwa kwikala pa cipuna ca bufumu ica kwa Davidi,+ ne citumbi cakwe cikapooswa ku nse+ ku cikabilila akasuba na ku mpepo ubushiku. 31 Kabili nkamukanda+ na bana bakwe na babomfi bakwe pa membu shabo,+ kabili nkaleta pali bena na pa bekashi ba mu Yerusalemu na pa baYuda ubucushi bonse ubo nasosele pali bena,+ ukwabula ukuti bomfwile.’”’”+

32 Kabili Yeremia abuulile ibuuku limbi no kupeela Baruki mwana Neria, kalemba,+ na o alembelemo amashiwi yonse ayo Yeremia asosele+ ayali mwi buuku ilyo Yehoyakimu imfumu ya kwa Yuda aocele mu mulilo;+ kabili kwalundilwe amashiwi na yambi ayapala yalya.