1 Imilandu

29 Imfumu Davidi nomba yatile ku lukuta+ lonse: “Solomone umwana wandi, uo Lesa asalile,+ mwaice+ kabili talakosa, lelo umulimo ukalamba; pantu ing’anda iyi iikalamba te ya muntu,+ lelo ya kwa Yehova Lesa. 2 Kabili ukulingana na maka+ yandi nimpekanishisha+ ing’anda ya kwa Lesa wandi golde+ iya kubomfya ukupanga ifya golde, na silfere iya kubomfya ukupanga ifya silfere, no mukuba uwa kubomfya ukupanga ifya mukuba, ne fyela+ ifya kubomfya ukupanga ifya cela, ne mbao+ sha kubomfya ukupangamo ifya mbao; amabwe yauma umutengo aya onikisi,+ na mabwe ya kubika pamo ne ndaka, no tumabwe utwapusanapusana, ne libwe lyonse ilyauma umutengo, na mabwe ya alabastere ayengi nga nshi. 3 Kabili apo ndesekelela+ ing’anda ya kwa Lesa wandi, kucili icuma candi icaibela,+ golde na silfere; nafipeela ku ng’anda ya kwa Lesa wandi kabili ukulunda pali fyonse ifyo nateyanishisha ing’anda ya mushilo:+ 4 amatalanti amakana yatatu (3,000) aya golde ya ku Ofiri,+ na matalanti amakana cinelubali (7,000) aya silfere iyalopololwa, iya kubika ku fibumba fya mayanda; 5 golde iya kubomfya ukupanga ifya golde, silfere iya kubomfya ukupanga ifya silfere ne fya kubomfya mu mulimo onse uwa bacenjela mu fya kupangapanga. Kabili nani uuleipeelesha ukwisusha iminwe yakwe ne ca bupe kuli Yehova lelo?”+

6 Kabili bacilolo+ ba mayanda ya bashibo+ na bacilolo+ ba mikowa ya kwa Israele na bacilolo ba pa bantu amakana+ na ba pa bantu imyanda+ na bakalamba ba makwebo+ ya mfumu bali-ipeeleshe. 7 Awe bapeele golde amatalanti amakana yasano (5,000) na badariki amakana ikumi (10,000) na silfere amatalanti amakana ikumi (10,000) no mukuba amatalanti amakana ikumi na cinekonsekonse (18,000) ne fyela amatalanti amakana umwanda (100,000) ku mulimo wa ng’anda ya kwa Lesa wa cine.+ 8 Kabili amabwe ayo abantu bonse bakwete bayapeele ku cipao ca ng’anda ya kwa Yehova ukwangalilwa na Yehiele+ umwina Gershone.+ 9 Kabili abantu balisekelele pa kutuula imituulo ya kuitemenwa, pantu bapeele ne mitima yonse mu kuitemenwa kuli Yehova;+ kabili nangu fye ni Davidi imfumu yalisekelele nga nshi.+

10 Awe Davidi acindike+ Yehova pa menso ya lukuta+ lonse kabili Davidi atile: “Mucindikwe,+ mwe Yehova Lesa wa kwa Israele+ shifwe, ukufuma umuyayaya ukuya umuyayaya. 11 Fyenu, mwe Yehova, ubukulu+ na maka+ no kuyemba+ no kupulama+ no bucindami;+ pantu fyonse ifya mu muulu ne fya pe sonde fyenu.+ Ubufumu+ bwenu, mwe Yehova, mwe bakulisha ukucila bonse.+ 12 Ifyuma+ no bucindami+ fyabako pa mulandu wenu, kabili ni mwe muteka+ fyonse; kabili mu kuboko kwenu mwaba amaka+ no kukosa,+ kabili ukuboko kwenu kuti kwakusha+ no kupeela amaka kuli bonse.+ 13 E ico nomba, mwe Lesa wesu, tulemutasha+ no kulumbanya+ ishina lyenu ilisuma.+

14 “Lelo ine, nine nani+ kabili abantu bandi ni bani, pa kuti tube na maka ya kutuula imituulo ya kuitemenwa iyaba nga iyi?+ Pantu fyonse fyafuma kuli imwe,+ kabili ifyo tupeele fyafuma mu minwe yenu. 15 Pantu tuli beni pa ntanshi yenu kabili abantu abekala mu calo icishili cabo+ nge fyali ifikolwe fyesu fyonse. Inshiku shesu pe sonde shaba nge cinshingwa+ kabili takwaba isubilo. 16 Mwe Yehova Lesa wesu, ifi fyonse ifingi ifyo tupekenye ukuti tukuulile ishina lyenu ilya mushilo ing’anda, fyafuma mu minwe yenu, kabili fyonse fyenu.+ 17 Nalishiba, mwe Lesa wandi, ukuti mulabebeta umutima,+ kabili mwalitemwa icishinka.+ Ine, ukulingana na bukaele bwa mutima wandi, njitemenwe fye ukupeela ifi fintu fyonse, kabili nomba nintemwa ukumona abantu benu abali pano baletuula imituulo kuli imwe mu kuitemenwa. 18 Mwe Yehova Lesa wa kwa Abrahamu,+ Isaki na Israele ifikolwe fyesu, mulesunga ici umuyayaya ukuti e fifwaya amatontonkanyo ya mitima ya bantu benu,+ kabili alwileni imitima yabo kuli imwe.+ 19 Kabili Solomone umwana wandi mupeeleni umutima wa cishinka+ pa kuti alekonka amafunde+ yenu, alekonka ne fyo mutucinkulako+ ne fipope+ fyenu, na pa kuti alecita fyonse, e pa kutila akakuule ing’anda+ iikalamba iyo mpekanishishe ifya kubomfya pa kuikuula.”+

20 Kabili Davidi asosele ku lukuta+ lonse ati: “Nomba cindikeni+ Yehova Lesa wenu.” Kabili ulukuta lonse lwacindike Yehova Lesa wa fikolwe fyabo no kukontama+ no kufukama+ kuli Yehova na ku mfumu. 21 Kabili balitwalilile ukwipaya amalambo+ kuli Yehova no kupeela imituulo ya koca+ kuli Yehova pa bushiku bwakonkelepo, ing’ombe ikana (1,000), basukusuku ikana, abana ba mpaanga ikana ne mituulo yabo iya mwangashi,+ na malambo ayengi aya bena Israele bonse.+ 22 Kabili balelya no kunwa pa ntanshi ya kwa Yehova pali bulya bushiku ninshi balesekelela nga nshi;+ kabili babikile Solomone umwana wa mfumu Davidi+ pa bufumu umuku wa cibili no kumusuba pa ntanshi ya kwa Yehova ukuba intungulushi+ na Sadoke+ ukuba shimapepo. 23 Awe Solomone aikele pa cipuna ca bufumu+ ica kwa Yehova ukuba imfumu ukupyana Davidi wishi kabili alitungulwike,+ kabili abena Israele bonse balemumfwila. 24 Kumfwa bacilolo+ bonse na baume ba maka+ na bana bonse aba Mfumu Davidi,+ balenakila imfumu Solomone. 25 Kabili Yehova alengele Solomone ukucindama+ nga nshi ku bena Israele bonse no kubika pali ena ubukata bwa bufumu ubushabalile abuba pa mfumu iili yonse iya bena Israele iyamutangilile.+

26 Davidi mwana Yese ena, atekele Israele yonse;+ 27 ne myaka atekele Israele yali amakumi yane (40).+ Mu Hebrone atekele imyaka cinelubali (7),+ e lyo mu Yerusalemu atekele imyaka amakumi yatatu na itatu (33).+ 28 Awe asukile afwa ninshi mukote,+ uwa myaka iingi, kabili uwa fyuma+ no bucindami;+ kabili Solomone umwana wakwe alimupyene no kutendeka ukuteka.+ 29 Kumfwa imilandu ya mfumu Davidi, iya kubalilapo ne ya kulekelesha, yalilembwa mu mashiwi ya kwa Samwele kamona+ na mu mashiwi ya kwa Natani+ kasesema na mu mashiwi ya kwa Gadi+ uwalemona ifimonwa, 30 pamo no bufumu bwakwe bonse na maka yakwe ne fyamucitikile+ ne fyacitikile abena Israele na mabufumu yonse mu fyalo.+