1 Imilandu
13 Kabili Davidi alanshenye na bakalamba ba mabumba ya makana na ba mabumba ya myanda ne ntungulushi shonse;+ 2 kabili Davidi asosele ku lukuta lonse ulwa bena Israele ati: “Nga cawama kuli imwe kabili cili bwino kuli Yehova Lesa wesu, natutume amashiwi kuli bamunyinefwe abashala mu fitungu fyonse ifya kwa Israele+ na kuli bashimapepo+ na bena Lebi+ mu misumba+ yabo iya mpanga ya mulemfwe, pa kuti balongane kuli ifwe. 3 Kabili natulete icipao+ ca kwa Lesa wesu ciise kuli ifwe.” Pantu tabacisakamene mu nshiku sha kwa Shauli.+ 4 E ico ulukuta lonse lwatile bacite ifi fine, pantu ici caliweme mu menso ya bantu bonse.+ 5 Awe Davidi alonganike+ abena Israele bonse ukufuma ku mumana wa mu Egupti+ ukufika fye na pa kwingilila mu Hamati,+ pa kuti fye balete icipao+ ca kwa Lesa wa cine ukufuma ku Kiriati-yearimu.+
6 Kabili Davidi na bena Israele bonse baile ku Baala,+ ku Kiriati-yearimu, iyaba mu Yuda, ku kuleta icipao ca kwa Lesa wa cine, Yehova, uwaikala pali bakerubi,+ apo ishina lyakwe lyaba. 7 Lelo basendeele icipao ca kwa Lesa wa cine pe celeta+ ilipya ilyafumine ku ng’anda ya kwa Abinadabu, kabili Usa na Ahio+ e balekumba ing’ombe ishaletinta iceleta. 8 Kabili Davidi na bena Israele bonse balesefya+ pa cinso ca kwa Lesa wa cine na maka yonse ne nyimbo+ na bansango+ ne filimba fya nsale+ no tuoma+ na malimba na mapenga.+ 9 Kabili basukile bafika apa kupumina ingano apa kwa Kidone,+ e lyo Usa atambike ukuboko kwakwe ukuti ekate Icipao,+ pantu ing’ombe shapene shiciponye. 10 E lyo ubukali bwa kwa Yehova bwaishile pali Usa, ica kuti alimwipeye pa mulandu wa kuti alitambike ukuboko kwakwe no kwikata Icipao,+ kabili afwilile palya pene ku cinso ca kwa Lesa.+ 11 Kabili Davidi alifulilwe+ pa mulandu wa kuti Yehova akalipile Usa; kabili cilya cifulo baciinike ati Perese-usa ukushinta na lelo.
12 Kabili Davidi atiinine Lesa wa cine pali bulya bushiku,+ e ico aipwishe ati: “Bushe nkaleta shani icipao ca kwa Lesa wa cine ku mwandi?”+ 13 Nomba Davidi tatwele Icipao ku mwakwe ku Musumba wa kwa Davidi, lelo acitwele ku ng’anda ya kwa Obed-edomu+ umwina Giti.+ 14 Kabili icipao ca kwa Lesa wa cine caikele na ba mu ng’anda ya kwa Obed-edomu, mu ng’anda+ yakwe pa myeshi itatu; na Yehova alepaala+ aba mu ng’anda ya kwa Obed-edomu na fyonse ifyo akwete.