Yeremia

14 Ici e cebo ca kwa Yehova icaishile kuli Yeremia pa mulandu wa cilala.+ 2 Yuda naya mu kuloosha,+ ne mpongolo shakwe nashibongoloka.+ Nashiwa pa nshi,+ no kulila kwa bantu mu Yerusalemu nakumfwika.+ 3 Na bakanabesa nabatuma abantu yaweyawe mu kufwaya amenshi.+ Na bo nabaya ku fishima. Kabili tabasangile amenshi.+ Babwelele ukwabula amenshi. Nabekatwa insoni+ kabili nabaseebana, nabafimba na ku mitwe yabo.+ 4 Abalimi nabekatwa insoni; nabafimba na ku mitwe yabo,+ pa mulandu wa kuti umushili naonaika pantu imfula tailokeele pa mushili.+ 5 Pantu nangu ni nsebula nkota mu mpanga naifyala, lelo naisha umwana, pa mulandu wa kuti tapali umulemfwe. 6 Kabili bacolwa+ nabeminina shilili pa tupili; balepeemashika nga bamumbwe; amenso yabo nayanaka pantu tapali umulemfwe.+ 7 Mwe Yehova, citenipo cimo pa mulandu we shina lyenu;+ nangu ifilubo fyesu fitushiniine; pantu ukubembuka kwesu nakufula;+ ni mwe tubembukile.+

8 Mwe subilo lya kwa Israele,+ mwe Mupusushi wakwe+ mu nshita ya kucula,+ nga cinshi mwabela ngo mulebeshi mu calo, ngo mulendo uwapaatukila ku kutubilisha ubushiku?+ 9 Nga cinshi mwabela ngo muntu uwapeshiwa amano, nge mpalume iyabula amaka aya kupususha?+ Lelo imwe mwaba mu kati kesu,+ mwe Yehova, kabili ifwe twainikwa ishina lyenu.+ Mwitulekelesha.

10 E fyasosa Yehova pali aba bantu ati: “Balitemwa ukwendauka;+ tabakaanya amakasa yabo.+ E ico Yehova tabasekelela.+ Nomba akebukisha ifilubo fyabo no kubakanda pa membu shabo.”+

11 E lyo Yehova asosele kuli ine ati: “Wipepelako aba bantu ukuti cibawamine.+ 12 Ilyo baleka ukulya, nshumfwa ukupapaata kwabo;+ ilyo batuula umutuulo wa koca no mutuulo wa ngano, nshisekelelamo nakalya;+ pantu nkabalofya ku lupanga na ku cipowe na ku cikuko.”+

13 Na ine natile: “Iye, mwe Shikulu Mulopwe Yehova! Moneni, bakasesema balesosa kuli bena abati, ‘Tamwakamone ulupanga, kabili icipowe tacakese pali imwe, lelo nkamuletela umutende wa cine muli cino calo.’”+

14 E lyo Yehova atile kuli ine: “Bufi e bo bakasesema balesesemena mwi shina lyandi.+ Nshabatuma nangu kubeba ukuti balesesema nangu kulanda na bo.+ Balesesema kuli imwe ifiloto fya bufi no kubuka ifya fye+ no bucenjeshi bwa mitima yabo.+ 15 E ico e fyasosa Yehova pali bakasesema abalesesemena mwi shina lyandi kabili abo nshatuma kabili abaletila ulupanga nangu icipowe tafyakese muli cino calo, ‘Abo bakasesema bakafwila ku lupanga na ku cipowe.+ 16 Kabili abantu abo balesesemena bakapooswa mu misebo ya mu Yerusalemu pa mulandu wa cipowe no lupanga, ukwabula no wa kubashiika—bena, abakashi babo na bana babo abaume na bana babo abanakashi.+ Nkaleta ubucushi bwabo pali bena.’+

17 “Kabili ukabebe auti, ‘Lekeni amenso yandi yalukushe ifilamba ubushiku na kasuba kabili yeba shilili,+ pantu umwana mwanakashi wa bantu bandi kabili nacisungu napumwa,+ ku mpumo iyabipa nga nshi.+ 18 Nga naya mu mpanga, moneni, ndesanga abo bepeye ku lupanga!+ Nga naingila mu musumba, moneni, muli amalwele pa mulandu wa cipowe!+ Pantu bakasesema na bashimapepo nabaya ku calo ico bashaishibe.’”+

19 Bushe namukaaninina fye Yuda,+ kabili bushe namupatilila fye Sione?+ Nga cinshi ico mwatuumina, ica kuti takuli no kundapwa?+ Twalesubila umutende, lelo ifisuma tafyaishile, twalesubila inshita ya kundapwa, lelo moneni! kwaishile umwenso!+ 20 Mwe Yehova, twasumina ifyabipa ifyo tucita, imembu sha fikolwe fyesu,+ pantu natumubembukila.+ 21 Pa mulandu we shina lyenu mwitusuula;+ mwisuula icipuna cenu ica bukata.+ Ibukisheni; mwitoba icipangano cenu ico mwapangana na ifwe.+ 22 Bushe kwaliba utulubi twa fye+ utwa nko utwingalosha imfula, nangu ukuleta imfula iikalamba?+ Bushe te imwe mweka, mwe Yehova Lesa wesu?+ Kabili tusubila muli imwe, pantu ni mwe mwacitile ifintu fyonse ifi.+