Yeremia
38 Awe Shefatia mwana Matani na Gedalia mwana Pashihuri na Yukali+ mwana Shelemia na Pashihuri mwana Malkiya+ baumfwile amashiwi ayo Yeremia alelanda ku bantu bonse,+ ati: 2 “Yehova atila, ‘Uukekalilila muli uno musumba e ukafwa ku lupanga,+ ku cipowe+ na ku cikuko.+ Lelo uukaya ku bena Kaldi e ukaba no mweo, kabili akapususha umweo wakwe no kuba no mweo.’+ 3 Yehova atila, ‘Uno musumba ukapeelwa mu minwe ye bumba lya bashilika ba mfumu ya ku Babiloni, na yo ikaupoka.’”+
4 E lyo bacilolo baebele imfumu abati: “Shi lekeni uyu muntu epaiwe,+ pantu e fyo aletompola amaboko ya baume ba bulwi abashelepo muli uno musumba na maboko ya bantu bonse, pa kusosa amashiwi aya.+ Pantu uyu muntu talefwaya ukuti pabe umutende pa bantu aba kano ububi.” 5 E ico Imfumu Sidekia yatile: “Moneni! Ali mu minwe yenu. Pantu imfumu taikwete amaka ya kumulesha.”+
6 Na bo basendele Yeremia no kumupoosa mu cishima ca kwa Malkiya+ umwana wa mfumu, icali mu Lubansa lwa Balinshi.+ Kabili baishiishe Yeremia ku ntambo; kabili mu cishima tamwali amenshi, mwali fye amatipa; na Yeremia atendeke ukutika mu matipa.+
7 Kabili Ebede-meleke umwina Etiopia,+ uwali mutungwi kabili uwali mu ng’anda ya mfumu, aumfwile ukuti nabapoosa Yeremia mu cishima; ne mfumu yaikele ku Mpongolo ya kwa Benjamini.+ 8 E ico Ebede-meleke afumine mu ng’anda ya mfumu no kuyaeba imfumu, ati: 9 “Mwe shikulu imfumu, aba bantu nabalufyanya pali fyonse ifyo bacitile kuli Yeremia kasesema, uo bapoosele mu cishima, kabili alefwila+ mulya mwine pa mulandu wa cipowe.+ Pantu mu musumba tamuli umukate nakalya.”
10 Ne mfumu yaebele Ebede-meleke umwina Etiopia ati: “Sendapo abaume amakumi yatatu (30), kabili ufumye Yeremia mu cishima ilyo ashilafwa.”+ 11 Awe Ebede-meleke asendele abaume no kuyaingila mu ng’anda ya mfumu pa nshi ya cipao+ no kubuulamo insalu shapwa ne nsamu, no kufiishisha kuli Yeremia mu cishima+ ku ntambo. 12 E lyo Ebede-meleke umwina Etiopia aebele Yeremia ati: “Shi bika isho nsalu ne nsamu mu mapa yobe pe samba lya ntambo.” Na o Yeremia acitile ifyo fine.+ 13 E lyo bakuliile Yeremia ku ntambo no kumufumya mu cishima. Awe Yeremia aleikala mu Lubansa lwa Balinshi.+
14 Ne Mfumu Sidekia yatumine aba kuyasenda Yeremia kasesema ukuti ese uko yali+ ku nshila yalenga butatu,+ iyaba mu ng’anda ya kwa Yehova.+ E lyo imfumu yatile kuli Yeremia: “Ndekulomba icintu cimo. Wimfisa nangu cimo.”+ 15 Na o Yeremia atile kuli Sidekia: “Nga nakweba, bushe tawanjipaye? E lyo nga nakupanda amano, tawaumfwe kuli ine.”+ 16 E ico Imfumu Sidekia yalapile kuli Yeremia, umwafisama, aiti: “Na pali Yehova, uwatupangile,+ nshakwipaye nakalya, kabili nshakupeele mu minwe ya aba bantu abalefwaya ukukwipaya.”+
17 E lyo Yeremia atile kuli Sidekia: “Yehova, Lesa wa mabumba,+ Lesa wa kwa Israele,+ atila, ‘Nga waya ku mfumu ya ku Babiloni,+ tawakafwe kabili uno musumba tabakaoce ku mulilo, kabili iwe na ba mu ng’anda yobe tamwakafwe.+ 18 Lelo nga tawile kuli bacilolo ba mfumu ya ku Babiloni, uno musumba na o ukapeelwa mu minwe ya bena Kaldi, kabili bakaoca ku mulilo,+ na iwe tawakapusuke mu minwe yabo.’”+
19 E lyo Imfumu Sidekia yatile kuli Yeremia: “Ndetiina abaYuda abawilile ku bena Kaldi,+ epali bampeela mu minwe ya bena Kaldi, na bo bancusha nga nshi.”+ 20 Na o Yeremia atile: “Tabakakupeele muli uyo musango. Shi umfwila ishiwi lya kwa Yehova ilyo ine ndekweba, kabili ifintu fikakuwamina,+ e lyo kabili ukaba no mweo. 21 Lelo nga wakaana ukuya,+ ici e co Yehova anengele ukumona:22 Kabili mona! abanakashi bonse abashala mu ng’anda ya mfumu ya kwa Yuda+ balebafumya no kubatwala kuli bacilolo ba mfumu ya ku Babiloni,+ kabili baleti,
‘Abaume abo mumfwana na bo bamubepa+ no kumucimfya.+
Nabalenga amakasa yenu ukutika mu matipa; nababwelelamo no kuya kumbi.’+
23 Na bakashi bobe bonse na bana bobe abaume bakabafumya no kubatwala ku bena Kaldi, na iwe tawakapusuke mu minwe yabo,+ lelo ukekatwa ku minwe ya mfumu ya ku Babiloni, na uno musumba bakaoca ku mulilo pa mulandu obe.”+
24 Na Sidekia aebele Yeremia ati: “Wileka umuntu nangu umo eshibe ifi fyonse, epali wafwa. 25 Nomba bacilolo+ nga baumfwa ukuti nacilanda na iwe, kabili baisa kuli iwe no kukweba abati, ‘Shi twebe, Finshi wacilaeba imfumu? Witufisa nangu cimo, kabili tatwakwipaye. Kabili finshi imfumu yacikweba?’26 ubebe auti, ‘Nacilapapaata imfumu, ukuti imbwesesha ku ng’anda ya kwa Yehonatani+ no kuyafwila kulya.’”
27 E lyo bacilolo bonse baishile kuli Yeremia no kutendeka ukumwipusha. Na o, abebele ukulingana na mashiwi aya yonse ayo imfumu yamwebele.+ E ico baikele fye tondolo pa menso yakwe, pantu ulya mulandu tabaumfwile. 28 Kabili Yeremia aikele mu Lubansa lwa Balinshi+ mpaka ubushiku Yerusalemu apokelwe.+ Kabili aya mashiwi yalandilwe ilyo fye Yerusalemu apokelwe.+