11 Nomba ilyo Atalia+ nyina wa kwa Ahasia amwene ukuti umwana wakwe alifwile,+ aliimine pa kuti epaye abana ba mfumu bonse.*+ 2 Lelo Yehosheba umwana mwanakashi wa Mfumu Yehoramu, nkashi ya kwa Ahasia, afumishe Yehoashi+ umwana wa kwa Ahasia pa bana ba mfumu abo bali no kwipaya. Ailemufisa mu muputule wa kulaalamo uwa mu kati sana pamo no walemonsha. Balimufishile ica kuti Atalia tamumwene, e ico tabamwipeye. 3 Afiseme pa myaka 6 mu ng’anda ya kwa Yehova pamo no walemonsha, ninshi Atalia aleteka icalo.