• Sekaria 9:9
    Baibo—Amalembo ya Calo Cipya

    •  9 Sekelela nga nshi, we mwana mwanakashi Sione.

      Welesha ukuwelesha kwa kucimfya, we mwana mwanakashi Yerusalemu.

      Mona! Imfumu yobe ileisa kuli iwe.+

      Yalilungama, ileleta ipusukilo,*

      Yali-icefya+ kabili ininine pa mpunda,

      Pa mpunda iyana iilume,* pa kana ka mpunda iikota.+

  • Marko 11:7-10
    Baibo—Amalembo ya Calo Cipya

    • 7 Kabili baleteele Yesu umwana wa mpunda,+ babikapo ifya kufwala fyabo ifya kunse e lyo aikalapo.+ 8 Kabili abengi ba-anshike ifya kufwala fyabo ifya kunse mu musebo, e lyo bambi bakontwele utumisambo mu mpanga.+ 9 Kabili abali pa ntanshi na balekonka pa numa balebilikisha abati: “Tulepepa+ kuli imwe atuti, mupususheni! Alipaalwa uwishila mwi shina+ lya kwa Yehova!* 10 Bwalipaalwa Ubufumu bwa kwa shifwe Davidi+ ubuleisa! Tulepepa kuli imwe mwe baikala mu muulu atuti, mupususheni!”