Ibuuku lya Kubalilapo Ilya Imilandu

23 Ilyo Davidi akotele kabili ninshi ali mupepi no kufwa, abikile Solomone umwana wakwe pa bufumu pa kuti aleteka abena Israele.+ 2 Lyena alonganike bacilolo bonse aba mu Israele, bashimapepo+ na bena Lebi.+ 3 Abaume abena Lebi abali ne myaka 30 no kucilapo balibapendele.+ Bonse abo bapendele bali 38,000. 4 Pali aba pali abaume 24,000 abaleangalila umulimo pa ng’anda ya kwa Yehova, kabili pali bacilolo na bakapingula 6,000,+ 5 kabili pali na balinshi ba mpongolo abali 4,000+ e lyo na bambi 4,000 abalelisha ifilimba pa kulumbanya Yehova.+ Davidi alandile pali ifi ifilimba ati, “Nafipangiile ukulumbanishishako Lesa.”

6 Lyena Davidi abaakenye mu mabumba+ ukulingana na bana ba kwa Lebi, e kutila Gershone, Kohati na Merari.+ 7 Abana ba kwa Gershone bali ni Ladani na Shimei. 8 Abana batatu aba kwa Ladani bali ni Yehiele uwali intungulushi ya lupwa lwabo, Setani na Yoele.+ 9 Abana batatu aba kwa Shimei bali ni Shelomote, Hasiele na Harani. Aba e bali intungulushi sha ba mu mayanda ya kwa Ladani uwali icikolwe cabo. 10 Kabili abana 4 aba kwa Shimei bali ni Yahati, Sina, Yeushi na Beria. 11 Yahati e wali intungulushi ya lupwa lwabo, kabili Sisa e wamukonkelepo. Nomba apo Yeushi na Beria tabakwete abana baume abengi, babapeendele pamo kwati fye ba mu ng’anda imo kabili babapeele umulimo umo.

12 Abana 4 aba kwa Kohati bali ni Amramu, Isari,+ Hebrone na Usiele.+ 13 Abana ba kwa Amramu bali ni Aarone+ na Mose.+ Lelo Aarone na bana bakwe balibapaatwileko+ pa kuti balesangulula Umuputule wa Mushilo Nga Nshi, baletuulila Yehova amalambo, balemubombela kabili balepaalila abantu mwi shina lyakwe.+ 14 Lelo abana ba kwa Mose umuntu wa kwa Lesa wa cine, babapendeele pa ba mu mukowa wa bena Lebi. 15 Abana ba kwa Mose bali ni Gershomu+ na Eliesere.+ 16 Uwali intungulushi pa bana ba kwa Gershomu ali ni Shebuele.+ 17 Uwali intungulushi ya batuntwike* muli Eliesere ali ni Rehabia;+ Eliesere takwete abana abaume bambi, lelo abana abaume abo Rehabia akwete bali abengi sana. 18 Uwali intungulushi pa bana ba kwa Isari+ ali ni Shelomiti.+ 19 Abana ba kwa Hebrone bali ni Yeria uwali intungulushi, uwamukonkelepo ali ni Amaria, uwalenga butatu ali ni Yahasiele kabili uwalenga 4 ali ni Yekameamu.+ 20 Abana ba kwa Usiele+ bali ni Mika uwali intungulushi kabili Ishia e wamukonkelepo.

21 Abana ba kwa Merari bali ni Maali na Mushi.+ Abana ba kwa Maali bali ni Eleasari na Kishi. 22 Eleasari alifwile, lelo takwetepo umwana umwaume, akwete fye abana abanakashi. E ico abana ba kwa Kishi, balupwa lwabo,* e baboopile. 23 Abana batatu aba kwa Mushi bali ni Maali, Edere na Yeremote.

24 Aba e bali abana ba kwa Lebi ukulingana ne ndupwa sha bashibo, intungulushi sha ba mu ndupwa sha bashibo, ukulingana na bo bapendele kabili abo balembele amashina, kabili abalebomba umulimo pa ng’anda ya kwa Yehova, ukutula pa bali ne myaka 20 no kucilapo. 25 Pantu Davidi alandile ati: “Yehova Lesa wa kwa Israele alilenga abantu bakwe batuusha,+ kabili akekala mu Yerusalemu umuyayaya.+ 26 Kabili abena Lebi tabakulasenda itenti lya mushilo nelyo ifipe fyonse ifya kubomfya pe tenti lya mushilo.”+ 27 Pantu ukulingana ne fyo Davidi alekelesheko ukubeba, abena Lebi abali ne myaka 20 no kucilapo balibapendele. 28 Umulimo bakwete wa kwafwilisha abana ba kwa Aarone+ abalebombela pa ng’anda ya kwa Yehova, uwa kwangalila imansa,+ imiputule ya kuliilamo, uwa kusangulula ifya mushilo fyonse ne milimo imbi iyalingile ukubombwa pa ng’anda ya kwa Lesa wa cine. 29 Balebombako no mulimo wa kupekanya umukate wa kutuula,+ uwa kupekanya ubuunga bwa mutuulo wa ngano, imikate iyapaapaatala iishatutumuka,+ amakeke ayo bapangila pa ca kocelapo, umufuba uo basaakanya na mafuta+ e lyo no mulimo wa kupima ifintu. 30 Cila lucelo balingile ukulaiminina+ pa kuti baletasha no kulumbanya Yehova, kabili ifi fine e fyo balingile ukulacita ne cungulo.+ 31 Baleafwilishako na lintu kwaleba ukutuulila Yehova amalambo ya koca pa Masabata,+ lyonse ilyo umweshi wamoneka+ na lintu kwaleba imitebeto.+ Balebomba iyi imilimo ukulingana ne fyo amafunde yalandile kabili ifi fine e fyo balecita pa cinso ca kwa Yehova lyonse. 32 Ilyo balebomba umulimo pa ng’anda ya kwa Yehova, balebombela pe tenti lya mushilo na pa cifulo ca mushilo, kabili balesakamana na bamunyinabo abana ba kwa Aarone.