Ibuuku lya Bubili Ilya Ishamfumu

24 Ilyo Yehoyakimu aleteka, Nebukadnesari imfumu+ ya ku Babiloni alishile mu kumulwisha, kabili Yehoyakimu aishileba umubomfi wakwe pa myaka itatu, lyena alimupondokele. 2 Lyena Yehova atendeke ukumutumina ifipondo ifyalebelamina abantu ifyalefuma ku calo ca bena Kaldi,+ ku calo ca bena Siria, ku calo ca bena Moabu na ku calo ca bena Amone. Alefituma pa kuti fyonaule icalo ca Yuda nga filya fine Yehova alandile+ ukupitila mu babomfi bakwe bakasesema. 3 Yehova e walengele ukuti ifi ficitikile abaYuda, pa kuti abafumye pa cinso cakwe+ pa mulandu wa membu isho Manase acitile,+ 4 na pa mulandu wa bantu ba kaele abengi abo aipeye,+ pantu aiswishe umulopa wa kaele mu Yerusalemu monse, kabili Yehova talefwaya ukubelela abaYuda uluse.+

5 Amalyashi yambi aya kwa Yehoyakimu na fyonse ifyo acitile, bushe tabafilemba mwi buuku lya malyashi ya mfumu sha mu Yuda?+ 6 Lyena Yehoyakimu alifwile nge fyafwile ifikolwe fyakwe,+ kabili Yehoyakini umwana wakwe e wamupyene pa bufumu.

7 Imfumu ya Egupti tayatalile aitumapo abashilika ba iko mu kulwa inkondo, pantu imfumu ya ku Babiloni yalipokele incende yonse iyali ya mfumu ya Egupti,+ ukutendekela ku mumana wa Egupti+ ukuyafika ku Mumana wa Yufrate.+

8 Yehoyakini+ ali ne myaka 18 ilyo aishileba imfumu, kabili atekele imyeshi itatu mu Yerusalemu.+ Nyina ali ni Nehushta umwana wa kwa Elnatani uwa mu Yerusalemu. 9 Yehoyakini alecita ifyabipa mu menso ya kwa Yehova, nga filya fine wishi acitile. 10 Pali ilya nshita, ababomfi ba kwa Nebukadnesari imfumu ya ku Babiloni baishile mu kulwisha umusumba wa Yerusalemu kabili baliushingile.+ 11 Ilyo Nebukadnesari imfumu ya ku Babiloni aishile kuli uyu musumba, ninshi ababomfi bakwe baliushinga kale.

12 Yehoyakini imfumu ya Yuda alifumine mu musumba pamo na nyina, ababomfi bakwe, bacilolo bakwe* na bacilolo ba kwi sano+ pa kuti amonane ne mfumu ya ku Babiloni.+ Lelo imfumu ya ku Babiloni yalimusendele mu mwaka walenga 8 ukutula apo atampiile ukuteka+ pa kuti akayeba nkole. 13 Lyena yasendele fyonse ifyali mu fipao fya ng’anda ya kwa Yehova ne fyali mu fipao fya ng’anda ya mfumu.*+ Yaonawile ifipe fyonse ifya golde ifya mwi tempele lya kwa Yehova+ ifyo Solomone imfumu ya Israele apangile. Ifi ifyacitike e fyo Yehova asobele. 14 Yasendele bonse aba mu Yerusalemu pa kuti bakayeba bankole, kumo na bacilolo bonse aba kwi sano,*+ abashilika bonse aba maka, bonse abaishibishe imilimo na bakafula wa fyela.*+ Bonse abo yasendele mu kuyaba bankole bali 10,000, yashileko fye abali abapiina sana.+ 15 E fyo yasendele Yehoyakini+ pa kuti ayeba nkole ku Babiloni.+ Yasendele na nyina wa mfumu, abakashi ba mfumu, bacilolo ba iko aba kwi sano na bashimucindikwa ba mu calo. Bonse aba yabasendele mu kuyaba bankole. Yabafumishe mu Yerusalemu yabatwala ku Babiloni. 16 Na kabili imfumu ya ku Babiloni yasendele abashilika bonse 7,000, abaishibishe imilimo 1,000, na bakafula wa fyela.* Aba bonse bali baume ba maka kabili balishibe ukulwa inkondo. 17 Imfumu ya ku Babiloni yabikile Matania, wishi mwaice+ wa kwa Yehoyakini pa bufumu, kabili ya-alwile ishina lyakwe aba Sidekia.+

18 Sidekia ali ne myaka 21 ilyo aishileba imfumu, kabili atekele imyaka 11 mu Yerusalemu. Nyina ali ni Hamutali+ umwana wa kwa Yeremia uwa ku Libna. 19 Sidekia alecita ifyabipa mu menso ya kwa Yehova, nga filya fine Yehoyakimu acitile.+ 20 Icalengele fyonse ifi ficitikile aba mu Yerusalemu na ba mu Yuda, ni co Yehova alibafuliilwe, mpaka abafumya pa cinso cakwe.+ Kabili Sidekia alipondokele imfumu ya ku Babiloni.+