Ibuuku lya Bubili Ilya kwa Samwele
6 Na kabili Davidi alonganike abashilika abaishibishe ukulwa inkondo 30,000 mu Israele. 2 Lyena Davidi na bashilika bonse abo ali nabo balimine baya ku Baale-yuda mu kusenda Icipao ca kwa Lesa wa cine+ ico abantu balumbanishishapo Yehova wa mabumba,+ uwaikala pa muulu* wa bakerubi.+ 3 Lelo babikile Icipao ca kwa Lesa wa cine pe celeta ilipya+ pa kucifumya ku ng’anda ya kwa Abinadabu+ iyali pa muulu wa kapili; kabili Usa na Ahio, abana baume ba kwa Abinadabu, e baletungulula ing’ombe ishaletinta iceleta ilipya.
4 E ico basendele Icipao ca kwa Lesa wa cine ku ng’anda ya kwa Abinadabu, iyali pa muulu wa kapili, kabili Ahio ali pa ntanshi ya Cipao. 5 Davidi na ba mu ng’anda ya kwa Israele bonse balesefya pa cinso ca kwa Yehova balelisha ne filimba fya misango yonse ifyo bapangiile ne mbao sha mukupri, insango, ifilimba fimbi ifya nsale,+ utuoma,+ amalangu na malimba.+ 6 Lelo ilyo bafikile apo Nakone alepumina ingano, Usa aikete+ ku Cipao ca kwa Lesa wa cine, pantu kwashele fye panono ing’ombe nga shaliciponeshe. 7 E lyo ubukali bwa kwa Yehova ububilima ngo mulilo bwaishile pali Usa kabili Lesa wa cine alimwipeye+ pantu takonkele ifunde lya kwa Lesa,+ kabili afwilile palya pene ku mbali ya Cipao ca kwa Lesa wa cine. 8 Lelo Davidi alikalipe pa mulandu wa kuti Yehova alikalipe sana pa fyo Usa acitile; kabili cilya cifulo baciita ukuti Perese-usa* ukushinta na lelo. 9 E ico pali bulya bushiku Davidi alitiinine Yehova+ kabili alandile ati: “Bushe Icipao ca kwa Yehova cikesa shani kuno?”+ 10 Davidi tafwaile Icipao ca kwa Yehova bacitwale uko aleikala ku Musumba wa kwa Davidi.+ Lelo aebele abantu ukuti bacitwale ku ng’anda ya kwa Obed-edomu+ umwina Giti.
11 Icipao ca kwa Yehova caikele mu ng’anda ya kwa Obed-edomu umwina Giti pa myeshi itatu, kabili Yehova alepaala Obed-edomu na ba mu ng’anda yakwe bonse.+ 12 Nomba kwali abaile-eba Imfumu Davidi abati: “Yehova napaala aba mu ng’anda ya kwa Obed-edomu na fyonse ifyo akwata pantu Icipao ca kwa Lesa wa cine caba mu ng’anda yakwe.” E ico Davidi aile mu kusenda Icipao ca kwa Lesa wa cine mu ng’anda ya kwa Obed-edomu kabili acitwele ku Musumba wa kwa Davidi ninshi balesekelela inshila yonse.+ 13 Ilyo abasendele+ Icipao ca kwa Yehova batampwile intampulo 6, Davidi alituulile ing’ombe iilume ne nama iyaina.
14 Kabili Davidi alecinda na maka yakwe yonse pa cinso ca kwa Yehova. Alecinda ninshi nafwala* efode+ iyo bapangila no bushishi ubusuma. 15 Davidi na ba mu ng’anda ya kwa Israele bonse baletwala Icipao+ ca kwa Yehova ninshi baleaula utupundu,+ balelisha ne ntandala.+ 16 Nomba ilyo Icipao ca kwa Yehova cafikile mu Musumba wa kwa Davidi, Mikali+ umwana mwanakashi wa kwa Shauli, alengeele pe windo kabili ilyo amwene Imfumu Davidi ilecilauka kabili ilecinda pa cinso ca kwa Yehova, ali-isuulile mu mutima wakwe.+ 17 E ico baingishe Icipao ca kwa Yehova mwi tenti ilyo Davidi acipangiile kabili bacibikile pa ncende ya ciko.+ Lyena Davidi atuulile Yehova+ amalambo ya koca+ na malambo ya mutende.+ 18 Ilyo Davidi apwishishe ukutuula imituulo ya koca na malambo ya mutende, apaalile abantu mwi shina lya kwa Yehova wa mabumba. 19 Na kabili apeele abantu bonse, abena Israele bonse, abaume na banakashi, cila muntu umukate umo, keke ya fisabo fya tuncindu na keke ya myangashi, e lyo abantu bonse baile cila muntu ku mwakwe.
20 Ilyo Davidi aile mu kupaala aba mu ng’anda yakwe, Mikali umwana mwanakashi wa kwa Shauli,+ alifumine mu kusengela Davidi. Lyena amwebele ati: “Ifyo imfumu ya bena Israele yaicindamika lelo, ilyo yaci-ifuula pa menso ya bakashana abasha ba babomfi ba iko nga filya fine umuwelewele aifuula pa bantu!”+ 21 E lyo Davidi aebele Mikali ati: “Nacilasefya pa cinso ca kwa Yehova uwansalile ukuba intungulushi ya bantu ba kwa Yehova abena Israele,+ ukucila ukusala wiso na bonse aba mu ng’anda yakwe. E ico nakulasefya pa cinso ca kwa Yehova, 22 kabili nkaicefya ukucila ne fyo naci-icefya, nakulaimona no kuti nshacindama. Lelo abakashana abasha abo ulumbwile, e bakancindamika.” 23 E ico Mikali umwana mwanakashi wa kwa Shauli+ afwile fye ukwabula ukukwatapo umwana.