Yobo
29 Yobo atwalilile ukulanda ati:
2 “Kanshi nga ndi filya nali imyeshi iyapitapo,
Ilyo Lesa aleninda,
3 Ilyo alengele inyali yakwe yansanika pa mutwe,
Ilyo nale-enda umwafiita ninshi ulubuuto lwakwe nalusanika,+
4 Ilyo* nali umulumendo ninshi ndi na maka,
Ilyo Lesa ali sana cibusa wandi kabili ilyo ali mwi tenti lyandi,+
5 Ilyo Uwa Maka Yonse aali na ine,
Ilyo abana bandi* bonse bali na ine,
6 Ilyo nalenyanta mu mukaka watikama,*
Kabili ilyo ifimabwe fyalempongolwela amafuta.+
7 Ilyo naleya ku mpongolo ya musumba+
No kwikala pa cipuna mu lubansa,+
8 Abalumendo nga bamona, balemfumina mu nshila,*
Abakalamba nabo baleimininako, kabili baletwalilila ukwiminina.+
9 Bacilolo baleikala tondolo;
Balebika iminwe pa tunwa twabo.
10 Bashimucindikwa baleikala tondolo;
Ululimi lwalelambatila mu tunwa twabo.
11 Bonse abaleumfwa pali ine balelanda ifisuma pali ine,
Kabili bonse abalemona, balenandilako.
12 Pantu nalepususha umupiina uwalepunda mutuule,+
No mwana uushakwete wishi e lyo na onse fye uushakwete wa kumwafwa.+
14 Nalefwala ubulungami nge fya kufwala fyandi;
Nalefwala umulinganya ngo mwingila* kabili nge nsalu ya kupomba ku mutwe.
15 Nali amenso ku bashimona
Kabili nali amakasa ku balemana.
Kabili nalefwailisha umulandu wa bantu abo nshaishibe no kwishiba+ pa kuti bebafyenga.
19 Imishila yandi ikatabilila mu menshi,
Kabili umume ukekala ku misambo yandi ubushiku bonse.
20 Abantu tabakaleke ukuncindika,
Kabili ubuta ubuli mu minwe yandi tabwakaleke ukulasa.’
21 Abantu balefwaisha ukumfwa ifyo nalelanda,
Baleikala tondolo ilyo balelolela ukuti mbapandeko amano.+