Ulwimbo lwa kulumbanya Lesa
ulwa kwa Davidi.
א [Aleph]
145 Nkamucindika mwe Lesa wandi, mwe Mfumu,+
Nkalumbanya ishina lyenu umuyayaya.+
ב [Beth]
2 Nkamulumbanya akasuba konse;+
Nkalumbanya ishina lyenu umuyayaya.+
ג [Gimel]
3 Yehova mukulu kabili e walinga sana ukulumbanya;+
Takuli uwingeshiba ubukulu bwakwe.+
ד [Daleth]
4 Aba mu nkulo shonse bakamulumbanya pa fyo mwacita;
Bakalanda pa fya maka ifyo mwacita.+
ה [He]
5 Bakalalanda pa bucindami bwa bukata bwenu+
Kabili nkalatontonkanya sana pa fisuma ifyo mwacita.
ו [Waw]
6 Bakalanda pa fyo mwacita ifya kutiinya,
Kabili nkalanda pa bukulu bwenu.
ז [Zayin]
7 Nga baibukisha ifisuma ifyo mwacita bakatwalilila ukulandapo,+
Kabili bakalasekelela ilyo bakalaimba pa bulungami bwenu.+
ח [Heth]
8 Yehova wa nkumbu kabili wa luse.+
Alakokola ukukalipa kabili aliba sana no kutemwa ukushipwa.+
ט [Teth]
9 Yehova musuma kuli bonse,+
Kabili fyonse ifyo abumba filanga ukuti wa luse.
י [Yod]
10 Mwe Yehova, fyonse ifyo mwabumba fikalamulumbanya,+
Kabili ababa ne cishinka kuli imwe bakalamulumbanya.+
כ [Kaph]
11 Bakalabila pa bukata bwa bufumu bwenu+
Kabili bakalalanda pa maka yenu,+
ל [Lamed]
12 Pa kuti balenge abantu beshibe imilimo yenu iya maka+
No bukata bwa bufumu bwenu.+
מ [Mem]
13 Ubufumu bwenu bwa muyayaya,
No kuteka kwenu kukabako mu nkulo shonse.+
ס [Samekh]
14 Yehova alatungilila bonse abalewa+
Kabili alenuna bonse abakontama pa mulandu na mafya.+
ע [Ayin]
15 Fyonse ifyo mwabumba filolesha kuli imwe ukuti mufyafwe;
Mulafipeela ifya kulya pa nshita yalinga.+
פ [Pe]
16 Mulafumbatula iminwe yenu
Kabili mulapeela ica mweo conse ifyo cilefwaya.+
צ [Tsade]
17 Fyonse ifyo Yehova acita fyalilungama+
Kabili wa cishinka muli fyonse ifyo acita.+
ק [Qoph]
18 Yehova alaba mupepi na bonse abalilila kuli ena,+
Bonse abalilila kuli ena mu cishinka.+
ר [Resh]
19 Alapeela abamutiina ifyo balefwaya;+
Alomfwa nga balilila kuli ena ukuti abafwe, kabili alabapususha.+
ש [Shin]
20 Yehova alalinda bonse abamutemwa,+
Lelo akalofya ababifi bonse.+
ת [Taw]
21 Akanwa kandi kakalumbanya Yehova;+
Lekeni ica mweo conse cilumbanye ishina lyakwe ilya mushilo umuyayaya.+