Ibuuku lya Bubili Ilya kwa Samwele
21 Nomba kwali icipowe+ mu nshiku sha kwa Davidi pa myaka itatu, e ico Davidi aipwishe Yehova icalengele, lyena Yehova amwebele ati: “Shauli na ba mu ng’anda yakwe baliba no mulandu wa mulopa, pantu alipeye abena Gibeone.”+ 2 E ico imfumu yaitile abena Gibeone+ kabili yalilandile nabo. (Nomba abena Gibeone tabali bena Israele, lelo bali bena Amore+ abashelepo, kabili abena Israele balilapile kuli bena ukuti tabali no kubalofya.+ Lelo Shauli alefwaya ukubalofya pa mulandu wa kuti alefwaisha ukwafwa abena Israele na bena Yuda.) 3 Davidi aipwishe abena Gibeone ati: “Cinshi mfwile ukumucitila, kabili kuti nacita shani pa kufuta umulandu pa kuti mupaale abantu* ba kwa Yehova?” 4 Abena Gibeone ba-aswike abati: “Tatulefwaya silfere nelyo golde+ pa mulandu uo Shauli na ba mu ng’anda yakwe baacita; kabili te kuti twipaye umuntu mu Israele ukwabula ukutupeela insambu.” E lyo Davidi abebele ati: “Conse ico mwalalanda nalamucitila.” 5 Baebele imfumu abati: “Umuntu uwatwipeye kabili uwakwete amapange ya kutulofya mu calo conse ica Israele+— 6 tupeeleni abana bakwe abaume 7. Tukakulika ifitumbi fyabo*+ pa cinso ca kwa Yehova mu musumba wa Gibea+ uwa kwa Shauli uo Yehova asalile ukuba imfumu.”+ Lyena imfumu yabebele aiti: “Nalamupeela.”
7 Lelo imfumu yalilangulukileko Mefiboshete+ umwana wa kwa Yonatani umwana wa kwa Shauli pa mulandu wa mulapo uo Davidi na Yonatani+ umwana wa kwa Shauli balapiile mwi shina lya kwa Yehova. 8 E ico imfumu yabuulile Armoni na Mefiboshete abana abaume babili aba kwa Rispa+ umwana mwanakashi wa kwa Aya abo afyele kuli Shauli. Abuulile na bana abaume 5 aba kwa Mikali*+ umwana mwanakashi wa kwa Shauli abo afyele kuli Adriele+ umwana wa kwa Barsilai umwina Mehola. 9 Lyena abapeele mu minwe ya bena Gibeone, kabili bakulike ifitumbi fyabo pa lupili pa cinso ca kwa Yehova.+ Bonse 7 bafwilile pamo; babepeye mu nshiku sha kubalilapo isha kusombola, e kutila ilyo batendeke ukuseepa barle. 10 Lyena Rispa+ umwana mwanakashi wa kwa Aya abuulile icisalu acanshika pe libwe kabili e po aleikala ukutula pa kutendeka kwa kuseepa ukufika ilyo imfula yalokeele pa fitumbi fyabo. Talekele ifyuni fya mu lwelele fyaikala pali bena mu nshita ya kasuba kabili mu nshita ya bushiku talekele inama mpanga shapalama kuli bena.
11 Kwali abaebele Davidi ifyo Rispa umwana wa kwa Aya, kanakashi wa kwa Shauli acitile. 12 E ico Davidi ailesenda amafupa ya kwa Shauli na mafupa ya kwa Yonatani umwana wakwe ku ntungulushi sha bena Yabeshe-gileadi+ abayebile mu lubansa lwa Bete-shani, umo abaPelishiti babakulikiile pa bushiku abaPelishiti baipeye Shauli pa Gilboa.+ 13 Aletele amafupa ya kwa Shauli na mafupa ya kwa Yonatani umwana wakwe, kabili balonganike amafupa ya baume abo baipeye.*+ 14 Lyena bashiikile amafupa ya kwa Shauli na ya kwa Yonatani umwana wakwe mu Sela+ mu citungu ca bena Benjamini mu nshiishi ya kwa Kishi+ wishi. Ilyo bacitile fyonse ifyo imfumu yabebele, Lesa alikutike ifyo balepaapaatilako icalo.+
15 Na kabili abaPelishiti baimishe inkondo na bena Israele.+ E ico Davidi na bashilika bakwe baile mu kulwa na baPelishiti, lelo Davidi alinakile sana. 16 Ishibi-benobe uwatuntwike mu bena Refa,+ uwakwete ifumo lya mukuba ilyafinine amashekele 300*+ kabili uwakwete ulupanga ulupya, alefwaya ukwipaya Davidi. 17 Ilyo line Abishai+ umwana wa kwa Seruya aishilemupususha,+ kabili aipeye umuPelishiti. E lyo abashilika ba kwa Davidi balapile kuli ena abati: “Mwikatala amuya na ifwe ku nkondo+ pa kuti inyali ya kwa Israele ikashima!”+
18 Pa numa abena Israele baile na kabili mu kulwa inkondo na baPelishiti+ ku Gobe. Pali ilya nshita Sibekai+ umwina Husha aipeye Safi, uwatuntwike mu bena Refa.+
19 Na kabili abena Israele baile mu kulwa inkondo na baPelishiti+ ku Gobe, kabili Elhanani umwana wa kwa Yairi-oregimu umwina Betelehemu aipeye Galyati umwina Giti, uwakwete ifumo ilyali ne ca kwikatilako icali nga kamulando ka bakapikula ba nsalu.+
20 Na kabili kwali inkondo mu Gati, umwali umwaume ipaka uwali ne minwe 6 kuli cila cisansa, ne fikondo 6 kuli cila lukasa, fyonse pamo fyali 24. Uyu na o atuntwike mu bena Refa.+ 21 Kabili alepontela abena Israele.+ E ico Yonatani umwana wa kwa Shimei,+ munyina Davidi alimwipeye.
22 Aba 4 batuntwike mu bena Refa mu Gati, kabili Davidi na bashilika bakwe e babepeye.+