Ibuuku lya Kubalilapo Ilya Imilandu

27 Iyi e mpendwa ya bena Israele, e kutila intungulushi sha ba mu mayanda ya bashibo, intungulushi sha mabumba ya bantu 1,000 ne sha mabumba ya bantu 100,+ na bacilolo babo abalebombela imfumu+ muli fyonse ifyakumine amabumba ayalebombela imfumu. Cila ibumba lyalebomba umweshi umo mu mwaka. Mwi bumba limo na limo mwaleba abantu 24,000.

2 Uwaleangalila ibumba lya kubalilapo mu mweshi wa kubalilapo ni Yashobeamu+ umwana wa kwa Sabdiele, kabili muli ili ibumba mwali abantu 24,000. 3 Yashobeamu atuntwike muli Perese,+ kabili e wali umukalamba wa ntungulushi shonse isha mabumba ya babomfi abalebomba mu mweshi wa kubalilapo. 4 Uwaleangalila ibumba lyalebomba mu mweshi wa bubili ali ni Dodai+ umwina Ahohe+ kabili Mikilote e wali intungulushi. Mwi bumba lyakwe mwali abantu 24,000. 5 Intungulushi ye bumba lya babomfi ilyalenga butatu ilyalebomba mu mweshi wa butatu ali ni Benaya+ umwana wa kwa Yehoyada+ shimapepo mukalamba. Mwi bumba lyakwe mwali abantu 24,000. 6 Uyu Benaya ali mwaume wa maka pa bashilika ba mfumu 30 aba maka. Uwaleangalila ibumba lyakwe ni Amisabadu umwana wakwe. 7 Uwaleangalila ibumba lyalenga 4 ilyalebomba mu mweshi walenga 4 ali ni Asaele,+ munyina Yoabu,+ kabili Sebadia umwana wakwe e wali inkonkani yakwe. Mwi bumba lyakwe mwali abantu 24,000. 8 Shamuti umwina Isra e wali intungulushi ya balebomba mu mweshi walenga 5, kabili mwi bumba lyakwe mwali abantu 24,000. 9 Ira+ umwana wa kwa Ikeshe umwina Tekoa+ e waleangalila abalebomba mu mweshi walenga 6, kabili mwi bumba lyakwe mwali abantu 24,000. 10 Helese+ umwina Pelone uwatuntwike muli Efraimu e waleangalila abalebomba mu mweshi walenga 7, kabili mwi bumba lyakwe mwali abantu 24,000. 11 Sibekai+ umwina Husha uwatuntwike muli Sera+ e waleangalila abalebomba mu mweshi walenga 8, kabili mwi bumba lyakwe mwali abantu 24,000. 12 Uwaleangalila abalebomba mu mweshi walenga 9 ali ni Abiesere+ umwina Anatote+ uwatuntwike muli Benjamini, kabili mwi bumba lyakwe mwali abantu 24,000. 13 Uwaleangalila abalebomba mu mweshi walenga 10 ali ni Maharai+ umwina Netofa uwatuntwike muli Sera,+ kabili mwi bumba lyakwe mwali abantu 24,000. 14 Uwaleangalila abalebomba mu mweshi walenga 11 ali ni Benaya+ umwina Piratone uwatuntwike muli Efraimu, kabili mwi bumba lyakwe mwali abantu 24,000. 15 Uwaleangalila abalebomba mu mweshi walenga 12 ali ni Heldai umwina Netofa, uwatuntwike muli Otniele, kabili mwi bumba lyakwe mwali abantu 24,000.

16 Aba e bali intungulushi sha mikowa ya bena Israele: Uwaletungulula abena Rubene ali ni Eliesere umwana wa kwa Sikri; uwaletungulula abena Simeone ali ni Shefatia umwana wa kwa Maaka; 17 uwaletungulula abena Lebi ali ni Hashabia umwana wa kwa Kemuele; uwaletungulula ulupwa lwa kwa Aarone ali ni Sadoke; 18 uwaletungulula abaYuda ali ni Elihu,+ munyina Davidi; uwaletungulula abena Isakari ali ni Omri umwana wa kwa Mikaele; 19 uwaletungulula abena Sebuluni ali ni Ishmaya umwana wa kwa Obadia; uwaletungulula abena Naftali ali ni Yerimote umwana wa kwa Asriele; 20 uwaletungulula abena Efraimu ali ni Hoshea umwana wa kwa Asasia; uwaletungulula hafu ya mukowa wa kwa Manase ali ni Yoele umwana wa kwa Pedaya; 21 uwaletungulula hafu ya mukowa wa kwa Manase mu Gileadi ali ni Ido umwana wa kwa Sekaria; uwaletungulula abena Benjamini ali ni Yaasiele umwana wa kwa Abnere;+ 22 uwaletungulula abena Dani ali ni Asarele umwana wa kwa Yerohamu. Aba e bali bacilolo ba mikowa ya bena Israele.

23 Davidi tapendeeleko abali ne myaka 20 no kwisa panshi, pantu Yehova alilaile ukuti ali no kufusha abena Israele nge ntanda sha mu muulu.+ 24 Yoabu umwana wa kwa Seruya alitendeke ukupenda abantu, nomba tapwishishe; kabili Lesa alifuliilwe sana abena Israele.*+ E ico tabalembele impendwa ya bantu mu lyashi lya Mfumu Davidi.

25 Uwaleangalila ifipao fya mfumu+ ali ni Asmabete umwana wa kwa Adiele. Yonatani umwana wa kwa Usia e waleangalila amatala* ya mu mabala, aya mu misumba, aya mu mishi na ya mu mpungu. 26 Uwaleangalila abalebomba mu mabala, ali ni Esri umwana wa kwa Kelubu. 27 Shimei umwina Rama e waleangalila amabala ya myangashi; uwaleangalila umo balepangila umwangashi ali ni Sabdi umwina Shifmote. 28 Uwaleangalila amabala ya miolife ne fimuti fya mikunyu+ ifyali mu Shefela,+ ali ni Baali-hanani umwina Gedere; uwaleangalila uko balesungila amafuta ali ni Yoashi. 29 Uwalesakamana ing’ombe ishalelya umulemfwe mu Sharone+ ali ni Shitrai umwina Sharone, kabili Shafati umwana wa kwa Adlai e walesakamana ing’ombe ishali mu mupokapoka.* 30 Uwalesakamana ingamila ali ni Obili umwina Ishmaele; uwalesakamana impunda* ali ni Yehedia umwina Meronote. 31 Uwalesakamana impaanga ne mbushi ali ni Yasisi umwina Hagari. Bonse aba bali ni ntungulushi ishalesakamana ifyo Imfumu Davidi yakwete.

32 Yonatani+ lupwa wa kwa Davidi ali ni mpanda mano, umwaume uwacenjela, kabili ali ni kalemba. Yehiele umwana wa kwa Hakmone e walesakamana abana ba mfumu.+ 33 Ahitofele+ e walepanda imfumu amano, kabili Hushai+ umwina Ariki ali ni cibusa wa mfumu. 34 Yehoyada umwana wa kwa Benaya+ na Abiatari+ e bapyene Ahitofele; kabili Yoabu+ e wali umukalamba wa bashilika ba mfumu.