Ibuuku lya Bubili Ilya kwa Samwele

24 Yehova alifuliilwe nga nshi abena Israele+ ilyo umo atunkile Davidi ati: “Kabiye, kapende+ abena Israele na bena Yuda.”+ 2 E ico imfumu yaebele Yoabu+ umukalamba wa bashilika uo yali nankwe aiti: “Kabiyeni mu mikowa ya kwa Israele yonse mupende abantu, ukutendekela ku Dani ukufika ku Beere-sheba,+ pa kuti njishibe ifyo abantu bafulile.” 3 Lelo Yoabu aebele imfumu ati: “Yehova Lesa wenu afushe abantu imiku 100, kabili shikulu imfumu amone ifyo balafula. Nomba cinshi shikulu imfumu alefwaila ukucitila ica musango uyu?”

4 Lelo imfumu yalipatikishe Yoabu na bakalamba ba bashilika. E ico Yoabu na bakalamba ba bashilika bafumine pa mfumu baya na mu kupenda abena Israele.+ 5 Bayabwike Yordani kabili bailepanga inkambi pa Aroere+ ku kulyo kwa musumba pa kati ka mupokapoka. Lyena baile ku bena Gadi, e lyo bayafika na ku Yasere.+ 6 Pa numa baile ku Gileadi+ na ku calo ca bena Tatimu-hodeshe e lyo bayafika ku Dani-yaani na ku Sidone.+ 7 Lyena baile ku musumba we linga uwa Turi+ na ku misumba yonse iya bena Hibi+ ne ya bena Kanaani, kabili balekeleshe ku Beere-sheba,+ umusumba wa mu Negebu+ iya bena Yuda. 8 E fyo baendawike mu calo conse kabili babwelele ku Yerusalemu pa numa ya myeshi 9 ne nshiku 20. 9 Nomba Yoabu apeele imfumu impendwa ya bantu abo balembele. Abashilika abena Israele abo bapendele abengalwa no lupanga bali 800,000, na bashilika abena Yuda bali 500,000.+

10 Lelo umutima* wa kwa Davidi watampile ukumucusha+ pa numa ya kupenda abantu. Lyena Davidi aebele Yehova ati: “Ulubembu ulo ncitile+ lukalamba nga nshi. E ico nomba mwe Yehova, napaapaata mbeleleni uluse ne mubomfi wenu pa lubembu ncitile,+ pantu ifyo ncitile buwelewele.”+ 11 Ilyo Davidi abuukile ulucelo, Yehova aebele kasesema Gadi,+ uwalemwenako Davidi ifimonwa ati: 12 “Kebe Davidi auti, ‘Yehova atila: “Ndekupeela ifintu fitatu ifyo ufwile ukusalapo. Usalepo cimo ico mfwile ukukucita.”’”+ 13 E ico Gadi aile kuli Davidi, kabili ailemwipusha ati: “Bushe ulefwaya mu calo cobe mukabe icipowe pa myaka 7?+ Nelyo bushe ulefwaya ukalefulumuka abalwani bobe abakalakukonka pa myeshi itatu?+ Nelyo ulefwaya mu calo cobe mukabe icikuko pa nshiku shitatu?+ Nomba tontonkanyapo bwino e lyo unjebe ifyo mfwile ukuyaeba uuntumine.” 14 E ico Davidi aebele Gadi ati: “Ici cintu cansakamika sana. Leka Yehova e o atukande+ pantu wa luse nga nshi;+ lelo wileka abantu e bo bankande.”+

15 Lyena Yehova aletele icikuko+ mu Israele ukufuma ulucelo ukufika pa nshita iyo apimine, ica kuti abantu 70,000 balifwile+ ukutendekela ku Dani ukufika ku Beere-sheba.+ 16 Ilyo malaika atambike ukuboko kwakwe pa Yerusalemu pa kuti onaule umusumba, Yehova alyumfwile ubulanda pa mulandu na bantu abo icikuko caipeye,+ kabili aebele malaika uwaleipaya abantu ati: “Capwa! Nomba bwesha ukuboko kobe.” Malaika wa kwa Yehova ali mupepi na po Arauna+ umwina Yebusi+ alepumina ingano.

17 Ilyo Davidi amwene malaika uwaleipaya abantu, aebele Yehova ati: “Nine nabembuka kabili nine nalufyanya; nomba ishi mpaanga,+ cinshi shalufyanya? Kandeni ine wine na ba mu ng’anda ya kwa tata.”+

18 E ico bulya bushiku Gadi aile kuli Davidi kabili amwebele ati: “Kabiyeni kapangileni Yehova iciipailo apo Arauna umwina Yebusi+ apumina ingano.” 19 E ico Davidi alilecita ifyo Gadi amwebele ukulingana ne fyo Yehova alandile. 20 Ilyo Arauna amwene imfumu na babomfi ba iko bamulungama, ilyo line ailekontamina imfumu, afisha ne mpumi panshi. 21 Arauna aipwishe imfumu ati: “Cinshi mwe shikulu mwe mfumu yandi mwaishila kuli ne mubomfi wenu?” Davidi amwaswike ati: “Naisa mu kushita apo upumina ingano pa kuti nkuulilepo Yehova iciipailo, pa kuti icikuko cifume pa bantu.”+ 22 Lelo Arauna aebele Davidi ati: “Shikulu mwe mfumu yandi cibuuleni fye mutuulilepo ilambo ilyo alefwaya.* Ing’ombe sha kutuula ilambo ishi, ica kupuminako ingano na makoli ya ng’ombe ifi, e fyo fibe inkuni. 23 Fyonse ifi mwe mfumu namupeela.” Lyena Arauna aebele imfumu ati: “Shi Yehova Lesa wenu amupaale.”

24 Lelo imfumu yaebele Arauna aiti: “Awe, mfwile ukucishita kuli iwe. Nshatuulile Yehova Lesa wandi amalambo ya koca ukwabula ukupoosapo nangu shimo.” E ico Davidi ashitile apa kupumina ingano ne ng’ombe pa mashekele* ya silfere 50.+ 25 Kabili palya pene e po Davidi akuuliile Yehova iciipailo+ e lyo atuulilapo amalambo ya koca na malambo ya mutende. Lyena Yehova akutike ifyo Davidi apaapaatileko abena Israele.+ E fyo icikuko capwile mu calo.