Yeremia
37 Imfumu Sidekia,+ umwana wa kwa Yoshia e wapyene Konia*+ umwana wa kwa Yehoyakimu, pantu e o Imfumu Nebukadnesari* iya ku Babiloni abikile pa bufumu mu Yuda.+ 2 Lelo ena na babomfi bakwe na bantu ba mu calo tabaumfwile amashiwi ya kwa Yehova ayo alandiile muli kasesema Yeremia.
3 Ne Mfumu Sidekia yatumine Yeukali+ umwana wa kwa Shelemia na Sefania+ umwana wa kwa Maaseya shimapepo kuli kasesema Yeremia, aiti: “Tupepeleko kuli Yehova Lesa wesu.” 4 Pali iyi nshita ninshi Yeremia tabalamubika mu cifungo,+ aleyendela fye mu bantu. 5 Nomba abashilika ba kwa Farao balimine ukufuma ku Egupti.+ Kabili ilyo abena Kaldi abaleshinga Yerusalemu baumfwile ukuti aba bashilika baleisa, balilekele ukulwisha Yerusalemu.+ 6 Lyena Yehova aebele kasesema Yeremia ati: 7 “Yehova Lesa wa kwa Israele alanda ati, ‘Imfumu ya mu Yuda iyamutumine ukuti mwise munjipushe, muye muyebe amuti: “Mona! Ibumba lya bashilika ba kwa Farao ilileisa mu kukwafwa likabwelelamo ku calo ca liko ku Egupti.+ 8 Kabili abena Kaldi bakabwela mu kulwisha uno musumba, bakaucimfya no kuoca.”+ 9 Yehova alanda ati, “Mwi-ibepa* amuti, ‘Abena Kaldi bakaleka ukutulwisha kabili bakaya,’ pantu tabakaye. 10 Nangu mwingacimfya abashilika abena Kaldi abalemulwisha bonse ica kuti pashala fye abaume abacenekwe, kuti baima mu matenti yabo no koca uno musumba.”’”+
11 Ilyo abashilika abena Kaldi balekele ukulwisha Yerusalemu pa mulandu wa bashilika ba kwa Farao,+ 12 Yeremia alifumine mu Yerusalemu, aile ku calo ca kwa Benjamini+ pa kuti bayemupeela impanga mu calo umo abantu bakwe baleikala. 13 Nomba ilyo afikile pa Mpongolo ya kwa Benjamini, Iria umukalamba wa balelonda, umwana wa kwa Shelemia, umwana wa kwa Hanania, alikete kasesema Yeremia, kabili amwebele ati: “Nauilunda ku bena Kaldi!” 14 Lelo Yeremia amwebele ati: “Bufi! Nshileilunda ku bena Kaldi.” Lelo taumfwile. E ico Iria aikete Yeremia no kumutwala ku ntungulushi. 15 Intungulushi shalifuliilwe Yeremia+ kabili shalimumine no kumupoosa mu cifungo*+ mu ng’anda ya kwa Yehonatani kalemba, iyo basangwile icifungo. 16 Yeremia balimubikile mu cifungo ca panshi,* mu muputule uo bacingilile sana, kabili aikele mulya inshiku ishingi.
17 Lyena Imfumu Sidekia yatumine abakuyamuleta, kabili imfumu yalimwipwishe ninshi ili umwafisama mu ng’anda ya iko.*+ Yamwipwishe aiti, “Bushe kuli ifyo Yehova alandile?” Yeremia ayaswike ati, “Ee e ko fili!” ayebele no kuti: “Bakakupeela mu minwe ya mfumu ya ku Babiloni!”+
18 Yeremia aebele Imfumu Sidekia na kabili ati: “Cilubo nshi nakucita kabili ico nacita na babomfi bobe na aba bantu pa kuti mumbike mu cifungo? 19 Nomba bali kwi bakasesema benu abamusesemene ati, ‘Imfumu ya ku Babiloni tayakese mu kumulwisha no kulwisha cino calo’?+ 20 Nomba umfwa, we shikulu imfumu. Umfwa ifyo ndekupaapaata ukuti ube ne cikuuku kuli ine, wimbwesesha mu ng’anda ya kwa Yehonatani+ kalemba, pantu kuti nafwila mulya mwine.”+ 21 E ico Imfumu Sidekia yaebele bamo ukuti bakakile Yeremia mu Lubansa lwa Balelonda,+ kabili balemupeela umukate cila bushiku uo balefumya mu musebo wa bapanga umukate,+ mpaka umukate onse wapwa mu musumba.+ Kabili Yeremia atwalilile ukwikala mu Lubansa lwa Balelonda.