Ibuuku lya Kubalilapo Ilya kwa Samwele

7 E ico abena Kiriati-yearimu balile mu kusenda Icipao ca kwa Yehova kabili baciletele ku ng’anda ya kwa Abinadabu+ pa kapili, kabili Eleasari umwana wakwe e o basalile ukuti alelinda Icipao ca kwa Yehova.

2 Palipitile imyaka 20 ukutula apo Icipao bacileteele ku Kiriati-yearimu. Lyena aba mu ng’anda ya kwa Israele bonse batendeke ukufwaya Yehova.+ 3 Lyena Samwele aebele aba mu ng’anda ya kwa Israele bonse ati: “Nga mulebwelela kuli Yehova ne mitima yenu yonse,+ pooseni balesa bambi bambi+ ne fimpanshanya fya kwa Astarte+ ifyo mwakwata, kabili mulebombela fye+ Yehova ne mitima yenu yonse. Nga mwacita ifi, Lesa akamupokolola ku baPelishiti.”+ 4 E ico abena Israele bapoosele ba Baali ne fimpanshanya fya kwa Astarte ifyo bakwete, kabili batampile ukulabombela Yehova eka.+

5 Lyena Samwele atile: “Longanikeni abena Israele bonse pa Mispa,+ pa kuti imupepeleko+ kuli Yehova.” 6 E ico balongene pa Mispa, kabili balitapile amenshi bayetila na pa cinso ca kwa Yehova kabili tabaliile nangu cimo pali bulya bushiku.+ Palya pene e po balandiile abati: “Natubembukila Yehova.”+ Kabili Samwele aishileba kapingula+ wa bena Israele mu Mispa.

7 Ilyo abaPelishiti baumfwile ukuti abena Israele nabalongana pa Mispa, bakateka ba baPelishiti+ baile mu kulwisha abena Israele. Ilyo abena Israele baumfwile, balitiinine abaPelishiti. 8 E ico abena Israele baebele Samwele abati: “Mwileka ukutupaapaatilako kuli Yehova Lesa wesu pa kuti atwafwilishe+ kabili atupusushe ku baPelishiti.” 9 Lyena Samwele abuulile akana ka mpaanga akaleonka akatuula umutuulo wa koca+ kuli Yehova; kabili Samwele apaapaatileko abena Israele kuli Yehova pa kuti abafwe, kabili Yehova alimwaswike.+ 10 Ilyo Samwele aletuula umutuulo wa koca, abaPelishiti balipaleme pa kuti balwe na bena Israele. Nomba pali bulya bushiku Yehova alengele umuulu wabulukutila+ abaPelishiti, kabili alibafulungenye+ ica kuti balibacimfishe ku bena Israele.+ 11 E lyo abaume abena Israele bafumine pa Mispa bakonka abaPelishiti, kabili baile balebepaya ukuyafika fye na ku kapinda ka ku kulyo aka Beti-ka. 12 Lyena Samwele abuulile ilibwe+ alibika pa kati ka Mispa na Yeshana kabili alinike ati Ebenesere,* pantu atile: “Yehova acili alatwafwa+ ukufika na lelo.” 13 E ico abaPelishiti balibacimfishe, kabili tababwekeshepo ukwisa mu calo ca bena Israele;+ kabili Yehova talekele abaPelishiti basansa abena Israele mu nshiku shonse isho Samwele ali uwa mweo.+ 14 Kabili imisumba ne mpanga ifyo abaPelishiti bapokele abena Israele fyaishileba fya bena Israele na kabili, ukutendekela ku Ekrone ukufika ku Gati.

Na kabili abena Israele na bena Amore+ balilekele ukulwishanya.

15 Samwele ali kapingula wa bena Israele inshiku shonse isho ali uwa mweo.+ 16 Cila mwaka aleya ku Betele,+ ku Gilgali+ na ku Mispa+ kabili alepingula abena Israele muli ifi ififulo fyonse. 17 Lelo alebwelela ku Rama,+ pantu e kwali ing’anda yakwe, kabili nako kwine alepingwilako abena Israele. Uku kwine e ko akuuliile Yehova iciipailo.+