Impendwa

10 Lyena Yehova aebele Mose ati: 2 “Ipangile amapenga yabili+ aya silfere; ubomfye sando pa kuyapanga, kabili e yo ulelisha pa kulonganya ulukuta na pa kufuma apo mupangile inkambi. 3 Nga balisha yonse yabili, ulukuta lonse lufwile ukwisa kuli iwe pa mwinshi we tenti lya kukumaninamo.+ 4 Lelo nga balisha fye limo, intungulushi sha makana ya bena Israele e shifwile fye ukwisa kuli iwe.+

5 “Nga mwalisha mu musango wa kuti iciunda cilealuka-aluka, abakalapangila inkambi ku kabanga+ bafwile ukuya. 6 Nga mwalisha mu musango wa kuti iciunda cilealuka-aluka pa muku walenga bubili, abakalapangila inkambi ku kapinda ka ku kulyo+ bafwile ukuya. Ifi fine e fyo bakalelisha amapenga lyonse ilyo ibumba limo pali aya lyaima.

7 “Nomba pa kulonganya ulukuta, mukalelisha amapenga,+ lelo mwikalalisha mu musango wa kuti iciunda cilealuka-aluka. 8 Abana baume ba kwa Aarone, bashimapepo, bakalelisha amapenga.+ Ifi fine e fyo mukalecita mu nkulo shenu shonse.

9 “Nga ca kuti mufwile ukulwa inkondo na balemucusha mu calo cenu, mulingile ukulisha amapenga ya nkondo,+ kabili Yehova Lesa wenu akamwibukisha no kumupususha ku balwani benu.

10 “Kabili lyonse ilyo mukalasekelela,+ mu nshita ya mitebeto yenu+ na pa kutendeka kwa myeshi yenu, mukalelishisha amapenga pa mituulo yenu iya koca+ na pa malambo yenu aya mutende.+ Nga mwacita ifi Lesa wenu akalamwibukisha. Nine Yehova Lesa wenu.”+

11 Nomba mu mwaka walenga bubili, mu mweshi walenga bubili, pa bushiku bwalenga 20 ubwa uyu mweshi,+ e lyo ikumbi lyafumine pa muulu we tenti lya mushilo+ umwali icipao ca Cipangano. 12 E ico abena Israele batendeke ukufuma mu matololo ya Sinai, baleima mu mabumba mabumba ukulingana ne fyo babebele.+ Kabili ikumbi lyaileiminina mu matololo ya Parani.+ 13 Uyu e wali umuku wa kubalilapo baimine ukulingana ne fyo Yehova abebele ukupitila muli Mose.+

14 E ico aba mwi bumba lya mikowa itatu abo umukowa wa kwa Yuda waletungulula e babalilepo ukwima mu mabumba yabo, kabili Naashone+ mwana Aminadabu e waletungulula ili ibumba. 15 Uwaletungulula ibumba lya mukowa wa bana ba kwa Isakari aali ni Netanele+ mwana Suari. 16 Uwaletungulula ibumba lya mukowa wa bana ba kwa Sebuluni aali ni Eliabu+ mwana Helone.

17 Ilyo bapangulwile itenti lya mushilo,+ abana ba kwa Gershone+ na bana ba kwa Merari+ abalesenda itenti lya mushilo baliimine baya.

18 Lyena abali mwi bumba lya mikowa itatu abo umukowa wa kwa Rubene waletungulula, baliimine mu mabumba yabo, kabili Elisuri+ mwana Shedeuri e waletungulula ili ibumba. 19 Uwaletungulula ibumba lya mukowa wa bana ba kwa Simeone aali ni Shelumiele+ mwana Surishadai. 20 Uwaletungulula ibumba lya mukowa wa bana ba kwa Gadi aali ni Eliasafi+ mwana Deuele.

21 Lyena abena Kohati abalesenda ifipe fye tenti lya mushilo+ baliimine baya. Itenti lya mushilo balingile ukulipanga ilyo abena Kohati bashilafika.

22 Lyena aba mwi bumba lya mikowa itatu abo umukowa wa kwa Efraimu waletungulula baliimine mu mabumba yabo, kabili Elishama+ mwana Amihudi e waletungulula ili ibumba. 23 Uwaletungulula ibumba lya mukowa wa bana ba kwa Manase aali ni Gamaliele+ mwana Pedasuri. 24 Uwaletungulula ibumba lya mukowa wa bana ba kwa Benjamini aali ni Abidani+ mwana Gideoni.

25 Lyena aba mwi bumba lya mikowa itatu abo umukowa wa kwa Dani waletungulula baliimine mu mabumba yabo, kabili bali ku numa pa kuti balecingilila amabumba yonse, kabili Ahiesere+ mwana Amishadai e waletungulula ili ibumba. 26 Uwaletungulula ibumba lya mukowa wa bana ba kwa Ashere aali ni Pagiele+ mwana Okrani. 27 Uwaletungulula ibumba lya mukowa wa bana ba kwa Naftali aali ni Ahira+ mwana Enani. 28 Ifi e fyo abena Israele balekonkana ukwima mu mabumba yabo ilyo inshita ya kwima yafika.+

29 Lyena Mose aebele Hobabu umwana mwaume wa kwa Reuele*+ umwina Midiani, shifyala wa kwa Mose ati: “Ifwe tuleya ku cifulo ico Yehova atile: ‘Nkamupeela.’+ Natuleya bonse,+ kabili tukakucitila ifisuma pantu Yehova nalaya fwe bena Israele ifintu ifisuma.”+ 30 Lelo amwebele ati: “Nshaye na imwe. Ndebwelelamo ku calo candi kabili ku bantu bandi.” 31 E lyo atile: “Shi wileka tuye fweka, pantu niwe waishiba bwino uko twingapangila inkambi muli ino mpanga, niwe ukalatutungulula.* 32 Kabili nga waya na ifwe,+ ifisuma fyonse ifyo Yehova akatucitila, e fyo na ifwe tukakucitila.”

33 E ico baliimine ulwendo lwa nshiku shitatu ukufuma ku lupili lwa kwa Yehova,+ kabili abasendele icipao+ ca cipangano ica kwa Yehova bali pa ntanshi yabo pa nshiku shitatu isho bali pa lwendo lwa kufwaya apa kutuushisha.+ 34 Kabili ikumbi lya kwa Yehova+ lyali pa muulu wabo mu nshita ya kasuba ilyo bafumine pa nkambi.

35 Lyonse ilyo baimya Icipao, Mose aleti: “Imeni mwe Yehova,+ kabili paseni abalwani benu, kabili lekeni abamupata bamufulumuke.” 36 Kabili ilyo batuula icipao, Mose aleti: “Mwe Yehova, bweleleni ku minshipendwa ya bena Israele.”+