Ibuuku lya Bubili Ilya kwa Samwele
13 Nomba Abishalomu umwana wa kwa Davidi alikwete nkashi yakwe uwali uwayemba. Ishina lyakwe ali ni Tamari,+ kabili Amnone+ umwana wa kwa Davidi alimutemenwe. 2 Amnone ali no bulanda sana ica kuti ali fye kwati nalwala pa mulandu wa kwa Tamari nkashi yakwe, pantu ali ni nacisungu, kabili Amnone calimukoseele ukusanga apa kumusembelekela. 3 Nomba Amnone alikwete umunankwe, ishina lyakwe ali ni Yehonadabu+ umwana wa kwa Shimea,+ munyina Davidi; kabili Yehonadabu ali uwacenjela sana. 4 E ico aipwishe Amnone ati: “Cinshi we mwana wa mfumu ubela no bulanda cila lucelo? Bushe te kuti unjebeko?” Amnone amwaswike ati: “Nalitemwa Tamari nkashi+ ya kwa Abishalomu munyinane.” 5 E lyo Yehonadabu amwebele ati: “Laala pa busanshi bobe, ucite kwati naulwala. Bawiso nga baisa mu kukumona, wise ubebe auti, ‘Shi lekeni Tamari nkashi yandi ese ampekanishisheko ifya kulya. Nga apekanya ifya kulya fya mulwele* ninshi ndemonako kabili nga ampeela, nalalya.’”
6 E ico Amnone alileele kabili acitile kwati nalwala. Ilyo imfumu yaile mu kumumona, aebele imfumu ati: “Shi lekeni Tamari nkashi yandi ese ampangileko utumikate tubili ninshi ndemonako kabili ampeele pa kuti indye.” 7 E lyo Davidi atumine amashiwi ku ng’anda ukwali Tamari ati: “Shi kabiye ku ng’anda ya kwa Amnone ndume yobe umupekanishisheko ifya kulya.”* 8 E ico Tamari aile ku ng’anda ya kwa Amnone ndume yakwe ninshi ena nalaala. Abuulile umufuba apangamo utumikate e lyo atusalula ninshi Amnone alemonako. 9 Lyena amupeele utumikate pa ca kusalwilapo. Lelo Amnone alikeene ukulya kabili aebele abantu ati: “Bonse fumeni panse!” E ico bonse balifumine.
10 Nomba Amnone aebele Tamari ati: “Ndetela ifya kulya mu muputule wa kulaalamo, pa kuti indye.” E ico Tamari abuulile utumikate uto apekenye atwalila Amnone ndume yakwe mu muputule wa kulaalamo. 11 Ilyo amutwalile pa kuti alye, alimwikete e lyo amweba ati: “Isa ulaale na ine, we nkashi yandi.” 12 Lelo amwebele ati: “Awe ndume yandi! Wiulungana na ine, pantu tatucita ifi mu Israele.+ Wicita ici cintu ca museebanya.+ 13 Bushe nga wanseebanya, umuseebanya ukatala aufuma pali ine? Kabili abantu mu Israele bakalakumona ukuti uli mwaume icipumbu. Nomba lomba imfumu, pantu tayakaane ifi ulefwaya.” 14 Lelo taumfwile ifyo amwebele, kabili alimucilile amaka. E ico alyulungene nankwe. 15 Pa numa ya kuulungana nankwe, Amnone alimupatile nga nshi, ica kuti ifyo amupatile fyalicilile pa fyo amutemenwe kale. E ico amwebele ati: “Ima; kabiye!” 16 Tamari amwebele ati: “Awe ndume yandi, ukuntamfya kwalabipapo ukucila ifi wancita!” Lelo talefwaya ukumfwa.
17 E lyo aebele umubomfi wakwe umulumendo ati: “Fumya uyu muntu muno, kabili nga wamufumya ukome ne ciibi.” 18 (Nomba Tamari afwele ilaya ilisuma pantu e malaya ayo abana banakashi ba mfumu banacisungu balefwala.) E ico umubomfi wakwe amufumiishe panse, akomako ne ciibi. 19 Lyena Tamari akubile imito pa mutwe,+ alepula ne laya ilisuma ilyo afwele; kabili aikete amaboko ku mutwe, aya alelila.
20 E lyo Abishalomu ndume yakwe+ amwipwishe ati: “Bushe Amnone ndume yobe e wakucita ifi? Nomba, talala nkashi yandi. Ni ndume yobe.+ Wibika ici cintu ku mutima.” Lyena Tamari aikele fye eka mu ng’anda ya kwa Abishalomu ndume yakwe. 21 Ilyo imfumu Davidi yaumfwile ili lyashi, yalikalipe nga nshi.+ Lelo tayalefwaya ukukalifya umwana wa iko Amnone pantu yalimutemenwe pa mulandu wa kuti ali libeli. 22 Kabili Abishalomu taebelepo Amnone nangu cimo, icibi nelyo icisuma; pantu Abishalomu alipatile+ Amnone pa mulandu wa kuti aliseebenye Tamari nkashi yakwe.+
23 Ilyo papitile imyaka ibili iituntulu, abalebeya impaanga sha kwa Abishalomu bali mu musumba wa Baali-hasore mupepi na Efraimu,+ kabili Abishalomu aitile abana ba mfumu abaume bonse+ ku mutebeto. 24 E ico Abishalomu aile-eba imfumu ati: “Kuli abalebeya impaanga sha mubomfi wenu! Shi lekeni ndeya na imwe mwe mfumu na babomfi benu.” 25 Lelo imfumu yaebele Abishalomu aiti: “Awe mwana wandi! Nga ca kuti bonse twaya, cikakukosela ukutusakamana.” Nangu ca kuti atwalilile fye ukupatikisha imfumu, yalikeene ukuya, lelo yalimupaalile. 26 Lyena Abishalomu aebele imfumu ati: “Imwe nga tamwaye, ninshi lekeni tuleya na Amnone munyinane.”+ Imfumu yamwipwishe aiti: “Cinshi ulefwaila ukuya nankwe?” 27 Na lyo line Abishalomu alipatikishe imfumu. E ico yalilekele Amnone na bana ba mfumu bonse abaume baya na Abishalomu.
28 Lyena Abishalomu aebele ababomfi bakwe ati: “Nga mwamona Amnone asansamuka pa mulandu wa mwangashi, nalamweba nati, ‘Ipayeni Amnone!’ Lyena mufwile ukumwipaya. Mwitiina, pantu ninshi nine ndemweba. Mukose kabili mushipe.” 29 E ico ababomfi ba kwa Abishalomu balipeye Amnone nga filya fine Abishalomu abebele; lyena abana ba mfumu abaume bambi balimine, cila muntu anina pa mfalashi yakwe bafulumuka no kufulumuka. 30 Ilyo baleya, kwali abaile-eba Davidi ukuti: “Abishalomu naipaya abana ba mfumu abaume bonse, tapali nangu umo uupuswike.” 31 E lyo imfumu yaimine yalepula ifya kufwala fya iko, yalaala na panshi, kabili ababomfi ba iko bonse baiminine mupepi nayo ninshi nabalepula ne fya kufwala fyabo.
32 Lelo Yehonadabu+ umwana wa kwa Shimea+ munyina Davidi alandile ati: “Mwe shikulu mwimona kwati abana benu bonse abalumendo nababepaya, ni Amnone fye e o bepeye.+ Abishalomu e waceba aba kuti bamwipaye pantu apangile ukucita ifi+ ilyo Amnone aulungene na Tamari+ nkashi yakwe.+ 33 Nomba mwe mfumu mwibika amano ku mashiwi ya kuti, ‘Abana ba mfumu bonse abaume nabafwa’; ni Amnone fye e ufwile.”
34 Lelo Abishalomu alifulumwike.+ Ilyo uwalelonda ainwine amenso, amwene abantu abengi baleisa ku numa yakwe mu musebo waba ku mbali ya lupili. 35 E lyo Yehonadabu+ aebele imfumu ati: “Moneni! Abana ba mfumu babwela. Tabafwile nga filya fine umubomfi wenu acilanda.” 36 Ilyo apwishishe fye ukulanda, abana ba mfumu balingiile ninshi balelila imisowa; imfumu na babomfi ba iko bonse nabo balililile nga nshi. 37 Lelo Abishalomu afulumukiile kuli Talmai+ umwana wa kwa Amihudi imfumu ya Geshuri. Davidi alilooseshe umwana wakwe pa nshiku ishingi. 38 Ilyo Abishalomu afulumukiile ku Geshuri,+ aileikalako imyaka itatu.
39 Pa numa Imfumu Davidi yalefwaya ukuyamona Abishalomu, pantu pali iyi nshita ninshi ubulanda yakwete pa mfwa ya kwa Amnone bwalicepeleko.