Ibuuku lya Kubalilapo Ilya Imilandu

28 Lyena Davidi alonganike bacilolo ba bena Israele bonse ku Yerusalemu: bacilolo ba mikowa, intungulushi sha mabumba+ ya balebombela imfumu, intungulushi sha mabumba ya bantu 1,000 ne sha mabumba ya bantu 100+ na baleangalila fyonse ifyo imfumu yakwete ne fitekwa fya iko+ ne fyo abana ba iko bakwete.+ Alonganike na bacilolo ba kwi sano e lyo na baume bonse aba maka kabili aba cishinka.+ 2 Lyena Imfumu Davidi yaliminine e lyo yalanda aiti:

“Bamunyinane na mwe bantu bandi umfweni. Ine nalefwaisha ukukuula ing’anda umwa kuti icipao ca cipangano ica kwa Yehova cileikala kabili iya kuba nge cipuna ico Lesa wesu engalanyantapo amakasa,+ kabili nalipekenye ifya kukuulila.+ 3 Lelo Lesa wa cine anjebele ati, ‘Tawakakuule ing’anda iikalenga ishina lyandi likacindikwe,+ pantu walilwa inkondo ishingi kabili walisuumya umulopa.’+ 4 Lelo pali bonse aba mu ng’anda ya kwa tata, nine Yehova Lesa asalile pa kuti imbe imfumu ya bena Israele umuyayaya,+ pantu Yuda e o asalile ukuba intungulushi+ kabili pa ba mu ng’anda ya kwa Yuda asalilepo ing’anda ya kwa tata,+ kabili pa bana ba kwa tata, asalilepo ine pa kuti imbe imfumu ya bena Israele bonse.+ 5 Yehova alilenga nakwata abana abengi,+ kabili pa bana bandi bonse, asalilepo Solomone+ pa kuti ekale pa cipuna ca bufumu bwa kwa Yehova aleteka abena Israele.+

6 “Anjebele ati, ‘Solomone umwana obe e ukankuulila ing’anda ne mansa, pantu nimusala ukuti abe umwana wandi kabili na ine nkaba wishi.+ 7 Nga akatwalilila ukukonka amafunde yandi no bupingushi bwandi+ nge fi fine acita, nkakosha ubufumu bwakwe umuyayaya.’+ 8 E ico ndemweba bonse mwe bena Israele, mwe lukuta lwa kwa Yehova, kabili na Lesa wesu aleumfwa ndeti: Mulebika amano ku kusambilila amafunde ya kwa Yehova Lesa wenu yonse, kabili muleyakonka pa kuti mukekale mu calo icisuma+ kabili mukashiile abakatuntuka muli imwe ici calo pa kuti bakatwalilile ukwikalamo.

9 “Kabili iwe Solomone mwana wandi, ishiba Lesa wa kwa wiso kabili ulemubombela no mutima onse+ ne nsansa, pantu Yehova alafwaya mu mitima yonse,+ kabili aleshiba amatontonkanyo yonse.+ Nga wamufwaya, akaleka ukamusange,+ lelo nga wamusha, na o akakukaana umuyayaya.+ 10 E ico ubikeko amano, pantu Yehova nakusala ukukuula ing’anda iikaba icifulo ca mushilo. Shipa kabili kabombe.”

11 Lyena Davidi apeele Solomone umwana wakwe apo balembele ifya kukonka pa kukuula+ umuputule wa kwingililapo+ e lyo ne miputule imbi iya ng’anda, imiputule ya kusungilamo ifintu iya ng’anda, imiputule ya pa muulu iya ng’anda, imiputule ya mu kati sana iya ng’anda e lyo no muputule umwali inkupiko ya cifuta mulandu.*+ 12 Amupeele apo balembele ifya kukonka pa kukuula fyonse ifyo umupashi wa kwa Lesa walangile Davidi, ifya kukuula imansa+ sha ng’anda ya kwa Yehova, imiputule ya kuliilamo yonse, imiputule ya kusungilamo ifyuma fya ng’anda ya kwa Lesa wa cine ne miputule ya kusungilamo fyonse ifya mushilo;*+ 13 amwebele ne fya kukonka pa kwakanya bashimapepo+ na bena Lebi imilimo yonse iya kubomba pa ng’anda ya kwa Yehova ne fya kubomfya ifipe fyonse ifya ng’anda ya kwa Yehova; 14 alimwebele ne fyo golde iyo alingile ukubomfya yafinine, golde iyo alingile ukupangilamo ifipe fya kubomfya ku milimo yalekanalekana, ifyo ifipe fyonse ifya silfere fyafinine ne fyo ifipe fyonse ifya kubomfya ku milimo yalekanalekana fyafinine; 15 ne fyo golde ya kupangila ifya kutekapo inyali+ ne nyali sha fiko yafinine, e lyo ne fyo silfere ya kupangila ifya kutekapo inyali ne nyali sha fiko yafinine; 16 alimwebele ne fyo golde ya kupangila amatebulo ya kubikapo umukate wa kutuula+ yafinine, ne fyo silfere ya kupangila amatebulo yafinine, 17 silfere ya kupangilamo ifya kutunkwilako, imbale ishafonka, imitondo ya golde iisuma ne fyo golde ya kupangilamo imbale ishinono ishafonka+ yafinine, ne fyo golde ya kupangilamo imbale imo na imo iinono iyafonka yafinine ne fyo silfere ya kupangilamo imbale imo na imo iinono iyafonka yafinine. 18 Alimwebele ne fyafinine golde iyalopololwa iya kupangila iciipailo ca kocelapo ububani+ ne cimpashanya ce celeta,+ e kutila bakerubi+ ba golde abafungulwilile amapindo yabo pa cipao ca cipangano ica kwa Yehova. 19 Davidi alandile ati: “Yehova alintungulwile pa kuti njishibe ifya kulemba+ fyonse ifya kukonka pa kukuula.”+

20 Lyena Davidi aebele umwana wakwe Solomone ati: “Shipa, kosa kabili kabombe. Witiina kabili witutuma, pantu Yehova Lesa, Lesa wandi, ali na iwe.+ Takakulekeleshe kabili takakushe+ mpaka ukapwishe ukukuula ing’anda ya kwa Yehova. 21 Kabili aya e mabumba ya bashimapepo+ na bena Lebi+ aba kubomba imilimo yonse pa ng’anda ya kwa Lesa wa cine. Naukwata abengaitemenwa ukubomba kabili abaishiba ukubomba imilimo yonse.+ Naukwata na bacilolo+ na bantu bonse abakalacita fyonse ifyo ukalabeba.”