Ibuuku lya Kubalilapo Ilya Imilandu
13 Davidi alanshenye na baletungulula amabumba ya bantu 1,000, abaletungulula amabumba ya bantu 100 e lyo ne ntungulushi shonse.+ 2 Lyena Davidi aebele ulukuta lonse ulwa bena Israele ati: “Nga mulemona ukuti cili fye bwino kabili na Yehova Lesa wesu kuti atemwa, natutume amashiwi kuli bamunyinefwe abashala mu fitungu fyonse ifya mu Israele na kuli bashimapepo na bena Lebi mu misumba yabo+ iyakwata impanga ya mulemfwe, pa kuti nabo bese kuno. 3 Kabili natubweshe Icipao+ ca kwa Lesa wesu.” Pantu balicilekeleshe ilyo Shauli aleteka.+ 4 Ulukuta lonse lwalisumiine ukucita ifyo Davidi alandile, pantu abantu bonse balitemenwe ifyo alandile. 5 E ico Davidi alonganike abena Israele bonse ukutendekela fye ku mumana* wa mu Egupti ukuyafika fye na ku Lebohamati,*+ pa kuti bayesenda Icipao ca kwa Lesa wa cine ku Kiriati-yearimu.+
6 Davidi na bena Israele bonse baile ku Baala,+ ku Kiriati-yearimu iyaba mu Yuda, mu kusenda Icipao ca kwa Lesa wa cine Yehova, uwaikala pa muulu* wa bakerubi,+ pa Cipao apo abantu betila ishina lyakwe. 7 Lelo babikile Icipao ca kwa Lesa wa cine pe celeta ilipya+ pa kucifumya ku ng’anda ya kwa Abinadabu, kabili Usa na Ahio e baletungulula ing’ombe ishaletinta iceleta.+ 8 Davidi na bena Israele bonse balesefya pa cinso ca kwa Lesa wa cine na maka yabo yonse, ninshi baleimba inyimbo, balelisha insango, ifilimba fimbi ifya nsale, utuoma,+ amalimba+ na mapenga.+ 9 Lelo ilyo bafikile apo Kidone alepumina ingano, Usa aikete Icipao, pantu kwashele fye panono ing’ombe nga shaliciponeshe. 10 E lyo ubukali bwa kwa Yehova ububilima ngo mulilo bwaishile pali Usa pa mulandu wa kuti alikete Icipao,+ kabili afwilile palya pene pa cinso ca kwa Lesa.+ 11 Lelo Davidi alikalipe* pa mulandu wa kuti Yehova alikalipe sana pa fyo Usa acitile; kabili cilya cifulo baciita ukuti Perese-usa* ukushinta na lelo.
12 E ico pali bulya bushiku Davidi alitiinine Lesa wa cine kabili alandile ati: “Bushe nalacita shani pa kuti ntwale Icipao ca kwa Lesa wa cine uko njikala?”+ 13 Davidi tatwele Icipao uko aleikala ku Musumba wa kwa Davidi, lelo aebele bamo ukuti bacitwale ku ng’anda ya kwa Obed-edomu umwina Giti. 14 Icipao ca kwa Lesa wa cine caikele na ba mu ng’anda ya kwa Obed-edomu. Caikele mu ng’anda yakwe pa myeshi itatu kabili Yehova alepaala aba mu ng’anda ya kwa Obed-edomu na fyonse ifyo akwete.+