Ibuuku lya Kubalilapo Ilya Imilandu
14 Hiramu imfumu+ ya Turi atumine inkombe kuli Davidi, amutumiine ne fimuti fya mikedari. Amutumiine na baishiba ukuputula amabwe ya kukuulila ifibumba* na bakabasa pa kuti bengayamukuulila ing’anda.*+ 2 Kabili Davidi alishibe ukuti Yehova alimupeele insambu sha kuba imfumu ya bena Israele+ pantu alikoseshe ubufumu bwakwe pa mulandu wa bantu bakwe abena Israele.+
3 Davidi alyupiilepo abanakashi na bambi+ mu Yerusalemu, kabili alifyalilepo abana na bambi abaume na banakashi.+ 4 Aba e bana abo afyalile mu Yerusalemu:+ Shamua, Shobabu, Natani,+ Solomone,+ 5 Ibhari, Elishua, Elipelete, 6 Noga, Nefege, Yafia, 7 Elishama, Beeliada na Elifelete.
8 Ilyo abaPelishiti baumfwile ukuti Davidi balimusubile ukuba imfumu ya bena Israele,+ bonse baile mu kufwaya Davidi.+ Ilyo Davidi aumfwile, aile mu kubalwisha. 9 Lyena abaPelishiti balishile kabili balesansa abaleikala mu Mupokapoka* wa Refaimu.+ 10 Davidi aipwishe Lesa ati: “Bushe njelwisha abaPelishiti? Bushe muleyabapeela mu minwe yandi?” E lyo Yehova aebele Davidi ati: “Kabiye, pantu nangu cibe shani nalayabapeela mu minwe yobe.”+ 11 E ico Davidi aile ku Baali-perasimu,+ kabili kulya kwine e ko abepaile. E lyo alandile ati: “Lesa wa cine nancimfishako abalwani.” E co bainikile ilya ncende ukuti Baali-perasimu. 12 AbaPelishiti bashiile tulesa twabo kulya kwine. Lyena Davidi aebele abantu ukuti batoce, kabili balitocele.+
13 Pa numa abaPelishiti balibwelele no kusansa abaleikala mu mupokapoka.*+ 14 Davidi na kabili aipwishe Lesa wa cine nga kuti ayabalwisha, lelo amwaswike ati: “Pa kuya mu kubalwisha wibalungama. Lelo upitile ku numa yabo, kabili ubasanshile ku ntanshi ya fimpusa fya bakha.+ 15 Kabili nga waumfwa kwati ni nshindo sha bantu pa muulu wa fimpusa fya bakha, ilyo line ubasanse pantu pali iyo nshita ninshi Lesa wa cine nakutangilila pa kuti wipaye abashilika ba baPelishiti.”+ 16 E ico Davidi acitile filya fine Lesa wa cine amwebele,+ kabili baipeye abashilika ba baPelishiti ukufuma ku Gibeone ukuyafika ku Gesere.+ 17 Davidi alilumbwike mu fyalo fyonse, kabili Yehova alengele inko shonse shalamutiina.+