Ibuuku lya Kubalilapo Ilya Imilandu

29 Nomba Imfumu Davidi yaebele ulukuta lonse aiti: “Solomone umwana wandi, uo Lesa asalile,+ mwaice kabili talaishiba ifingi,*+ lelo umulimo ukalamba, pantu itempele* ilyo akakuula talyakabe lya muntu, lelo likaba lya kwa Yehova Lesa.+ 2 Kabili nalibombesha pa kuti mpekanye ifya kukuulila ing’anda ya kwa Lesa wandi. Nalipekanya golde iya kupangamo ifya golde, silfere iya kupangamo ifya silfere, umukuba uwa kupangamo ifya mukuba, ifyela ifya kupangamo ifya cela,+ imbao+ sha kupangamo ifya mbao, amabwe ya onikisi, amabwe ya kubikila ne ndaka, utumabwe twa kuyemfeshako, amabwe yonse aya mutengo sana na mabwe ya alabastere ayengi nga nshi. 3 Kabili apo nalitemwa ing’anda ya kwa Lesa wandi,+ nalapeela na golde na silfere yandi+ pa kuti bakaibomfye ku ng’anda ya kwa Lesa wandi ukulunda pali fyonse ifyo napekanishisha ing’anda ya mushilo, 4 kumo na matalanti* 3,000 aya golde ya ku Ofiri,+ na matalanti 7,000 aya silfere iyalopololwa, iya kubika ku fibumba fya miputule* iyalekanalekana, 5 golde iya kupangamo ifya golde, silfere iya kupangamo ifya silfere na fyonse ifyo abaishiba sana ifya kupangapanga bakalabomfya. Nomba nani uulefwaya ukupeela Yehova ubupe lelo?”+

6 E ico bacilolo ba mayanda ya bashibo, bacilolo ba mikowa ya bena Israele, intungulushi sha mabumba ya bantu 1,000 ne sha mabumba ya bantu 100+ na bacilolo abalebombela imfumu+ bali-itemenwe ukupeela ubupe. 7 Lyena bapeele amatalanti ya golde 5,000, badariki* 10,000, amatalanti ya silfere 10,000, amatalanti ya mukuba 18,000 na matalanti ya fyela 100,000. Ifi fyonse bali no kufibomfya pa kukuula ing’anda ya kwa Lesa wa cine. 8 Bonse abakwete amabwe aya mutengo sana baliyaletele pa kuti bayabike mu cipao ca ng’anda ya kwa Yehova ico Yehiele+ umwina Gershone+ aleangalila. 9 Abantu balisekelele pa kutuula iyi imituulo ya kuitemenwa, pantu batuulile Yehova ne mitima yonse,+ kabili nangu fye ni Davidi imfumu alisekelele nga nshi.

10 Lyena Davidi alumbenye Yehova pa menso ya lukuta lonse. Davidi alandile ati: “Mulumbanishiwe mwe Yehova Lesa wa kwa Israele shifwe, ukufuma umuyayaya ukuya umuyayaya. 11 Mwe Yehova muli bakulu,+ muli ba maka,+ muli basuma, mwalisansabikwa kabili mwalicindama,+ pantu fyonse ifya mu muulu ne fya pano isonde fyenu.+ Ubufumu bwenu, mwe Yehova.+ Mwali-isumbula ukucila bonse. 12 Ifyuma no bucindami fifuma kuli imwe,+ kabili nimwe muteka fyonse.+ Ukuboko kwenu kwa maka+ kabili kwalikosa.+ Ukuboko kwenu kuti kwakusha umuntu+ kabili kuti kwalenga abantu bonse bakwata amaka.+ 13 Nomba mwe Lesa wesu, tulemutasha kabili tulelumbanya ishina lyenu ilyacindama.

14 “Lelo ine, nine nani kabili abantu bandi ni bani, pa kuti tube na maka ya kutuula imituulo ya kuitemenwa iyaba nge yi? Pantu fyonse fyafuma kuli imwe, kabili ifyo twamupeela fyafuma kuli imwe. 15 Pantu tuli balebeshi pa cinso cenu kabili twaba nga bantu abekala mu calo icishili cabo nge fyo ifikolwe fyesu fyonse fyali.+ Inshiku shesu pano isonde shaba fye nge cinshingwa+ kabili tatwakwata isubilo lya kuti tukatwalilila ukuba abomi. 16 Mwe Yehova Lesa wesu, fyonse ifi ifyo tupekenye ifya kukuulilamo ing’anda iikalenga ishina lyenu likabe ilya mushilo, fyafuma kuli imwe, kabili fyonse fyenu. 17 Mwe Lesa wandi, nalishiba bwino ukuti mulabebeta imitima,+ kabili mwalitemwa ababa ne cishinka.+ Pa mulandu wa kuti ndi wa kaele,* ninjitemenwa ukupeela ifi fintu fyonse, kabili nintemwa ifi namona abantu benu abali pano baitemenwe ukumutuulila imituulo. 18 Mwe Yehova Lesa wa kwa Abrahamu, Isaki na Israele ifikolwe fyesu, afweni abantu benu pa kuti batwalilile ukuba ne mitima ya musango yu kabili balemubombela ne mitima yabo yonse.+ 19 Kabili lengeni Solomone umwana wandi alemubombela no mutima wakwe onse+ pa kuti alekonka amafunde yenu,+ alekonka ifyo mutwibukishako, ifyo mutweba, na pa kuti alecita ifi fyonse kabili akabomfye fyonse ifyo mpekenye pa kukuula itempele.”*+

20 Lyena Davidi aebele ulukuta lonse ati: “Nomba lumbanyeni Yehova Lesa wenu.” Kabili abali mu lukuta bonse balumbenye Yehova Lesa wa fikolwe fyabo kabili bakontamiine Yehova ne mfumu. 21 Kabili balitwalilile ukutuulila Yehova amalambo kabili baletuulila Yehova amalambo ya koca+ pa bushiku bwakonkelepo. Batuulile ing’ombe 1,000, impaanga ishilume 1,000, utwana twa mpaanga utulume 1,000 ne mituulo yabo iya mwangashi.+ Balituuliileko abena Israele bonse amalambo ayengi.+ 22 Balitwalilile ukulya no kunwa pa cinso ca kwa Yehova pali bulya bushiku ninshi balesekelela nga nshi.+ Babikile Solomone umwana wa Mfumu Davidi pa bufumu umuku walenga bubili kabili balimusubile pa cinso ca kwa Yehova pa kuti abe intungulushi.+ Sadoke na o balimusubile pa kuti abe shimapepo.+ 23 Kabili Solomone aikele pa cipuna ca bufumu ica kwa Yehova+ pa kuti apyane Davidi wishi kabili ifintu fyalemwendela bwino na bena Israele bonse balemumfwila. 24 Bacilolo bonse,+ abashilika bonse aba maka+ na bana ba Mfumu Davidi bonse,+ balenakila Imfumu Solomone. 25 Kabili Yehova alengele Solomone acindama nga nshi ica kuti abena Israele bonse balimwene ukuti alimucindamike nga nshi, kabili alimupeele ubukata ubo imfumu ishabalilepo ukuteka abena Israele shishakwetepo.+

26 E fyo Davidi umwana wa kwa Yese atekele Israele yonse, 27 kabili imyaka atekele Israele yali 40. Mu Hebrone atekelemo imyaka 7,+ e lyo mu Yerusalemu atekelemo imyaka 33.+ 28 Kabili pa numa ya kwikala imyaka iingi alifwile.+ Alikwete ifyuma, alilumbwike kabili Solomone umwana wakwe alimupyene pa bufumu.+ 29 Ilyashi lya Mfumu Davidi, ukufuma pa kutendeka ukufika na lintu yafwile, balililemba mu mashiwi ayo Samwele uwaleiluka ifimonwa alembele, na mu mashiwi ayo Natani+ kasesema na Gadi+ uwalemona ifimonwa balembele. 30 Balembele pa fyalecitika ilyo aleteka, pa milimo iyo abombele, pa fyamucitikile ne fyacitikile abena Israele na mabufumu yonse ayali mupepi.