Impendwa
23 Lyena Balaamu aebele Balaki ati: “Kuula ifiipailo 7 pano,+ kabili umpekanishishe ing’ombe ishilume 7 ne mpaanga ishilume 7.” 2 Ilyo line fye Balaki alicitile ifyo Balaamu amwebele. Kabili Balaki na Balaamu batuulile ing’ombe iilume ne mpaanga iilume pa ciipailo cimo na cimo.+ 3 Lyena Balaamu aebele Balaki ati: “Shala pano pa mutuulo obe uwa koca, lelo ine nalaya. Nalimo Yehova alayanjebapo fimo. Fyonse ifyo alayanjeba e fyo nalaisakweba.” E ico aile pa kalupili apashamenene nangu cimo.
4 Lyena Lesa alandile na Balaamu,+ kabili Balaamu aebele Lesa ati: “Nacikuula ifiipailo 7, kabili nacituula ing’ombe iilume ne mpaanga iilume pa ciipailo cimo na cimo.” 5 Yehova aebele Balaamu ifya kuyalanda, e lyo amweba ati:+ “Bwelelamo kuli Balaki, kabili ifi e fyo uye umwebe.” 6 E ico alibwelelemo, kabili asangile Balaki naiminina pamo na bacilolo ba ku Moabu bonse mupepi no mutuulo wakwe uwa koca. 7 Lyena alandiile mu manshoko ati:+
“Balaki imfumu ya Moabu alinjita ukufuma ku Aramu,+
Amfumya ku mpili sha ku kabanga:
‘Isa untiipileko Yakobo.
Isa unjebawileko Israele.’+
8 Kuti natiipa shani abo Lesa ashatiipa?
Kabili kuti naebaula shani abo Yehova ashaebaula?+
9 Pa muulu wa mabwe e po mbamwena,
Kabili pa tupili e po mbamwena.
10 Nani engapenda abatuntuka muli Yakobo abafula ngo lukungu+
Nelyo nani engapenda nangu fye libumba limo ilya kwa Israele?
Lekeni mfwe* imfwa ya balungami,
Kabili lekeni impela ya mweo wandi ibe nge mpela ya myeo yabo.”
11 Lyena Balaki aebele Balaamu ati: “Cinshi wacitila ifi? Ico nakwitiile kwisatiipa abalwani bandi, nomba iwe wabapaala.”+ 12 Lelo Balaamu amwaswike ati: “Bushe nshifwile ukulanda ifyo Yehova anjebele?”+
13 Balaki amwebele ati: “Shi natuleya bonse kumbi uko wingabamwena. Uleyamonako fye abanono; tawaye umone bonse. Uku kwine e ko uye ntiipilako aba bantu.”+ 14 E ico amutwele ku mpanga ya Sofimu, pa muulu wa Pisga,+ kabili akuulilepo ifiipailo 7, e lyo atuula ing’ombe iilume ne mpaanga iilume pa ciipailo cimo na cimo.+ 15 Pa numa, Balaamu aebele Balaki ati: “Shala pano mupepi no mutuulo obe uwa koca, lelo ine nalaya kulya inande na Lesa.” 16 Kabili Yehova aebele Balaamu ifya kuyalanda, e lyo amweba ati:+ “Bwelelamo kuli Balaki, kabili ifi e fyo uye umwebe.” 17 E ico alibwelelemo, kabili asangile Balaki na bacilolo ba ku Moabu balemulolela mupepi no mutuulo wakwe uwa koca. E lyo Balaki amwipusha ati: “Finshi Yehova akwebele?” 18 Lyena alandiile mu manshoko ati:+
“Ima Balaki kabili kutika.
Umfwa ifyo ndelanda, we mwana mwaume wa kwa Sipore.
Nga alanda fimo, bushe kuti afilwa ukuficita?
Nga alaya fimo, bushe kuti afilwa ukufikilisha?+
21 Tasuminisha nangu umo ukucita ifinjelengwe pali Yakobo,
Kabili tasuminisha nangu umo ukucusha Israele.
Yehova Lesa wakwe aba nabo,+
Kabili balamulumbanya ukuti ni mfumu yabo.
22 Lesa alebafumya mu Egupti.+
Alabafwa na maka yakwe ayaba nga masengo ya mboo.+
Pali iyi nshita abantu kuti balanda pali Yakobo na Israele abati:
‘Moneni ifyo Lesa abacitiile!’
Tabakalaale nga filya fine inkalamo ishilaala mpaka yalya inama ikete,
Kabili yanwa umulopa wa nama ikete.”
25 Lyena Balaki aebele Balaamu ati: “Kanshi nga wafilwa ukumutiipa, ninshi no kumupaala kwine wimupaala.” 26 Balaamu aebele Balaki ati: “Bushe nshacikweba nati nalacita fye ifyo Yehova alanjeba?”+
27 Na kabili Balaki aebele Balaamu ati: “Ale natuleya nkutwale ku cifulo na cimbi. Nalimo kulya kwena Lesa wa cine aleyakusuminisha ukuntiipilako aba bantu.”+ 28 E ico Balaki atwele Balaamu pa muulu wa Peore, iyaba apalungatana na Yeshimone.*+ 29 Lyena Balaamu aebele Balaki ati: “Kuula ifiipailo 7 pano, kabili umpekanishishe ing’ombe ishilume 7 ne mpaanga ishilume 7.”+ 30 E ico Balaki alicitile ifyo Balaamu amwebele, kabili atuulile ing’ombe iilume ne mpaanga iilume pa ciipailo cimo na cimo.