Ukufuma
15 Pali ilya ine nshita Mose na bena Israele baimbiile Yehova ulu lwimbo abati:+
“Kanyimbile Yehova, pantu nacindikwa nga nshi.+
Kabalwe no waninapo abapoosa muli bemba.+
2 Ubukose bwandi na maka yandi ni Jah,* pantu e wampususha.+
Uyu e Lesa wandi, na ine nkamulumbanya;+ e Lesa wa kwa tata,+ kabili nkamutatakula.+
3 Yehova mwaume wa maka uwaishiba ukulwa inkondo.+ Yehova e shina lyakwe.+
4 Apoosa amaceleta ya kwa Farao na bashilika bakwe muli bemba,+
Kabili abashilika bakwe abakwatisha amaka baibila muli Bemba Wakashika.+
5 Amabimbi ya pali bemba yabafimba; baibila nge libwe muli bemba uwashika nga nshi.+
6 Ukuboko kwenu ukwa ku kulyo, mwe Yehova, kwa maka nga nshi;+
Ukuboko kwenu ukwa ku kulyo, mwe Yehova, kuti kwafwantaula umulwani.
7 Mwalikwatisha amaka ica kutila kuti mwacimfya abamwimina;+
Mutuma ubukali bwenu ububilima ngo mulilo, kabili buboca nge mpimbili.
8 Ku mupu wa mu myona yenu amenshi yacilongana pamo;
Yaciminina nge cibumba;
Amabimbi yacikosa pa kati ka bemba.
9 Umulwani acitila: ‘Ndebakonka! Ndebasanga!
Ndeakanya ifyo nalapokolola mpaka umutima* wandi wikale!
Ndesomona ulupanga lwandi! Ukuboko kwandi kwalabalofya!’+
11 Ni lesa nshi pali balesa uwaba nga imwe, mwe Yehova?+
Nani uwaba nga imwe, mwe ba mushilo nga nshi?+
Mwe balinga ukutiina no kulumbanya, mwe bacita ifipesha amano.+
12 Mwacitambalika ukuboko kwenu ukwa ku kulyo, kabili isonde lyacibamina.+
13 Pa mulandu no kutemwa kwenu ukushipwa, mwatungulula abantu abo mwalubula;+
Ku maka yenu mukabatungulula ku cifulo cenu ica mushilo.
15 Pali iyo nshita imfumu sha Edomu shikatiina nga nshi,
Kabili bakateka ba maka aba ku Moabu bakatutuma.+
Bonse abekala mu Kanaani bakafuupuka.+
16 Bakatiina kabili bakatutuma.+
Pa mulandu wa kuboko kwenu ukwa maka nga nshi bakaba shilili nge libwe,
Mpaka abantu benu bakapite, mwe Yehova,
Mpaka bakapite abantu abo mwabumbile.+
17 Mukabaleta no kubalimba pa lupili lwenu,+
Pa cifulo ico mwaipekanishisha ukwikalapo, mwe Yehova,
Apa mushilo, mwe Yehova, apo mwapangile ku minwe yenu.
18 Yehova akaba imfumu umuyayaya, umuyayaya.+
19 Ilyo bakabalwe ba kwa Farao, amaceleta yakwe aya nkondo, na baume ba pali ba kabalwe bacingila muli bemba,+
Yehova acibwesha amenshi ya muli bemba pali bena,+
Lelo abena Israele bacenda mu kati ka bemba pa mushili uwauma.”+
20 Lyena Miriamu kasesema mwanakashi, nkashi ya kwa Aarone, alishishe akaoma ka nyenjele, na banakashi bonse balimukonkele balelisha no tuoma twa nyenjele, uku ninshi balecinda. 21 Miriamu aleyankula abaume ati:
“Imbileni Yehova, pantu nacindikwa nga nshi.+
Kabalwe no waninapo abapoosa muli bemba.”+
22 Pa numa Mose na bena Israele bafumine kuli Bemba Wakashika. Abatungulwile ku matololo ya Shuri kabili baendele inshiku shitatu mu matololo, lelo tabasangile amenshi. 23 Awe bafikile ku Mara,*+ lelo balifililwe ukunwa amenshi ya ku Mara pantu yali ayalula. E co akwinikile ati Mara. 24 E ico abantu batendeke ukuilishanya kuli Mose,+ abati: “Tulenwa nshi?” 25 Mose aliliile kuli Yehova,+ kabili Yehova amutungulwile ku kamuti. Ilyo apoosele aka akamuti mu menshi, amenshi yalyalwike yaba ayasuma.
Palya pene e po Lesa abapangiile ifunde kabili e po abebeele ifya kukonka pa kupingula, kabili e po abeseshe.+ 26 Abebele ati: “Nga ca kuti mwakulakonka ifyo ne Yehova Lesa wenu nakulamweba, kabili nga mwakulacita icisuma mu menso yandi kabili nga mwakulakonka amafunde yandi ne fipope fyandi fyonse,+ nshakamuletele ubulwele nangu bumo pa malwele ayo naleteele abena Egupti;+ pantu ne Yehova nine ndemucingilila.”+
27 Pa numa bafikile ku Elimu, ukwali utumfukumfuku twa menshi 12 no tuncindu 70. E ico bapangile inkambi kulya kwine mupepi na menshi.