IBUUKU LYALENGA 5
(Amalumbo 107–150)
107 Tooteleni Yehova, pantu musuma;+
Ukutemwa kwakwe ukushipwa kwa muyayaya.+
2 Ifi e fyo balanda abo Yehova apokolwele,
Abo apokolwele mu minwe ya mulwani,+
3 Abo alonganya ukufuma mu fyalo,+
Ukufuma ku kabanga na ku masamba,
Ukufuma ku kapinda ka ku kuso na ku kapinda ka ku kulyo.+
4 Baendawike mu matololo, mu ciswebebe;
Tabasangile inshila iyaya mu musumba umo bengekala.
5 Bali ne nsala ne cilaka;
Balifwile icipuupu pa mulandu wa kuti balinakile nga nshi.
6 Ilyo balecula+ balelilila kuli Yehova ukuti abafwe;
Alibapuswishe ku mafya bakwete.+
7 Alengele baenda mu nshila iyalungama,+
Pa kuti bafike mu musumba umo bengekala.+
8 Abantu nabatootele Yehova+ pa kutemwa kwakwe ukushipwa
Na pa fisuma ifyo acitila abana ba bantu.+
9 Pantu apeela ababa ne cilaka amenshi
Kabili ababa ne nsala alabapeela ifintu ifisuma.+
10 Bamo bali mu mfifi iyafiitisha,
Bali bafungwa abalecula kabili abo bakakile amaceni.
11 Pantu tabakonkele ifyo Lesa abebele;
Balisuulile ubufwayo bwa Wapulamo.+
12 E ico alilekele bacula+ pa kuti imitima yabo iicefye;
Bali-ipunwine no kuwa, lelo takwali uwa kubaafwa.
13 Ilyo balecula balelilila kuli Yehova ukuti abafwe;
Alebapususha ku mafya bakwete.
14 Abafumishe mu mfifi iyafiitisha,
Kabili aputawile na maceni babakakile.+
15 Abantu nabatootele Yehova pa kutemwa+ kwakwe ukushipwa
Na pa fisuma ifyo acitila abana ba bantu.
16 Pantu natobaula ifiibi fya mukuba,
Naputaula ne mipindo ya cela.+
17 Baali bawelewele kabili baliculile+
Pa mulandu wa membu ne filubo balecita.+
18 Tabalefwaya ukulya nangu cimo;
Bapalamine ku mpongolo sha mfwa.
19 Ilyo balecula balelilila kuli Yehova ukuti abafwe;
Alibapuswishe ku mafya bakwete.
20 Aletuma amashiwi yakwe no kubondapa+
Kabili alebafumya mu filindi fya mfwa.
21 Abantu nabatootele Yehova pa kutemwa kwakwe ukushipwa
Na pa fisuma fyo acitila abana ba bantu.
22 Lekeni batuule amalambo ya kutootela+
Kabili babilishe imilimo yakwe ninshi balesekelela nga nshi.
23 Abenda pali bemba mu mato,
Abacita amakwebo pa menshi ayengi,+
24 Balimona ifyo Yehova acita
Ne fintu ifisuma ifyo abumba ifyaba muli bemba;+
25 Balimona ifyo ishiwi lyakwe lilenga inkuuka yaima,+
Ica kuti yaimya amabimbi pali bemba.
26 Amabimbi yalabemya mu muulu;
E lyo yababwesesha panshi.
Balaba no mwenso pa mulandu wa fyabipa ifingacitika.
27 Balatalantanta no kuipununa kwati muntu uukolelwe,
Kabili fyonse ifyo baishiba fiba ifya fye.+
28 Lyena balalilila kuli Yehova nga baba no bwafya,+
Kabili alabapokolola ku bwafya bakwata.
29 Alatalalika icikuuku ca mwela;
Amabimbi ya pali bemba yalaba tondolo.+
30 Balasekelela ifi nga fyaba tondolo,
Kabili alabatungulula ku cabu uko balefwaya ukuya.
31 Abantu nabatootele Yehova pa kutemwa kwakwe ukushipwa
Na pa fisuma ifyo acitila abana ba bantu.+
32 Nabamulumbanishishe pa bantu abalongene,+
Kabili bamulumbanishishe apalongene abakalamba abalepandana amano.
33 Alenga imimana yaba iciswebebe
Kabili alenga impanga umwaba utumfukumfuku yaba iyauma,+
34 Alenga impanga iya mufundo yaba iya mucele kabili iyabula umufundo+
Pa mulandu wa kuti abekalamo balacita ifyabipa.
35 Alenga iciswebebe caba ifishiba fya menshi,
Na mu mpanga iyauma, alenga mwalafukauka amenshi.+
36 Alenga abali ne nsala batendeka ukwikalamo+
Pa kuti bakuule umusumba uo bengalaikalamo.+
37 Balalima amabala umo babyala imbuto no mo balimba imyangashi+
Muli aya amabala mulatwala ifisabo ifingi.+
38 Alabapaala kabili balafula icine cine;
Taleka ing’ombe shabo shacepa.+
39 Lelo balacepa na kabili no kuseebana
Pa mulandu wa kuti balabacusha, balacula kabili balaba no bulanda.
40 Alaseebanya abakankaala
Kabili alenga balaendauka mu matololo umushaba inshila.+
41 Lelo acingilila abapiina pa kuti belabacusha+
Kabili alenga indupwa shabo shafula nge mpaanga.
42 Abalungama balamona ifi kabili balasekelela;+
Lelo bonse abashalungama balesala utunwa twabo.+
43 Onse uwa mano akatontonkanya sana pali ifi fintu+
Kabili akabika sana amano ku fyo Yehova acita ifilanga ukuti aliba no kutemwa ukushipwa.+