Ibuuku lya Bubili Ilya kwa Samwele
7 Ilyo imfumu yatampile ukwikala mu ng’anda* ya iko+ kabili ilyo Yehova alengele ukuti ituushe ku balwani ba iko bonse abaleikala mupepi, 2 imfumu yaebele kasesema Natani+ aiti: “Mona ine ndeikala mu ng’anda ya mbao sha mikedari,+ lelo Icipao ca kwa Lesa wa cine caikala mwi tenti.”+ 3 Natani aebele imfumu ati: “Kaciteni conse ico mulefwaya pantu Yehova ali na imwe.”+
4 Mu nshita ya bushiku bulya bwine bushiku, Yehova aebele Natani ati: 5 “Kabiye kebe umubomfi wandi Davidi auti, ‘Yehova alanda ati: “Bushe naulinga ukunkuulila ing’anda ya kwikalamo?+ 6 Pantu nshatala njikalapo mu ng’anda ukufuma fye ubushiku nafumishe abena Israele mu Egupti ukufika na buno bushiku,+ lelo njikala fye mwi tenti monse umo nyenda.+ 7 Inshita yonse iyo naendele na bena Israele* bonse, bushe nalyebelepo umo pa ntungulushi sha mikowa ya bena Israele abo naebele ukuti balecema abantu bandi abena Israele nati, ‘Ico ushankuulile ing’anda ya fimuti fya mikedari cinshi?’”’ 8 Nomba kebe umubomfi wandi Davidi auti, ‘Yehova wa mabumba alanda ati: “Nakufumishe mu mpanga ya mulemfwe umo walecema impaanga+ pa kuti wise ube intungulushi ya bantu bandi abena Israele.+ 9 Kabili nakulaba na iwe konse uko wakulaya,+ nkalofya abalwani bobe bonse pa menso yobe;+ kabili nkalenga ukalumbuke+ nga baume ba pe sonde abalumbuka. 10 Nkasalila abantu bandi abena Israele icifulo uko bakekala, kabili takwakabe uwa kubapumfyanya; kabili ababifi tabakabacushe na kabili nge fyo babacushishe kale,+ 11 ukutula pa bushiku nasontele bakapingula+ abalepingula abantu bandi abena Israele. Kabili nkalenga ukatuushe ku balwani bobe bonse.+
“‘“Kabili Yehova nakweba ukuti Yehova akakukuulila ing’anda.*+ 12 Ilyo ukafwa nge fyafwa ifikolwe fyobe,+ pa bufumu bobe nkapyanikapo umwana* obe umwaume,* kabili nkakosha ubufumu bwakwe.+ 13 E ukakuula ing’anda iikalenga ishina lyandi likacindikwe,+ kabili nkakosha ubufumu bwakwe umuyayaya.+ 14 Nkaba wishi, na o akaba umwana wandi.+ Nga alufyanya, nkamukandila ku nkonto ya bana ba bantu, kabili nkamulopwela ku nkonto ya bantunse.*+ 15 Nshakaleke ukumulanga ukutemwa ukushipwa nga filya nalekele ukulanga Shauli+ uo nafumishe pa cinso cobe. 16 Ing’anda yobe no bufumu bobe fikabako umuyayaya; nkalenga ubufumu bobe bukabe ubwakosa umuyayaya.”’”+
17 Natani aebele Davidi amashiwi yonse aya e lyo ne ci icimonwa conse.+
18 E lyo Imfumu Davidi yaikele pa cinso ca kwa Yehova e lyo yatila: “Nine nani, mwe Shikulu Mulopwe Yehova? Kabili bushe ing’anda yandi yalicindama pa kuti muncitile ifi mwancitila?+ 19 Mwe Shikulu Mulopwe Yehova mwalanda no kuti ing’anda ya mubomfi wenu ikatwalilila ukubako na ku nshita ya ku ntanshi sana; kabili ifi e fyo* abantu bonse bafwile ukulakonka, mwe Shikulu Mulopwe Yehova. 20 Finshi fimbi ne mubomfi wenu ningamweba apo mwalinjishiba bwino,+ mwe Shikulu Mulopwe Yehova? 21 Mwalicita ifi fintu fyonse ifikalamba kabili mwalisokolwela umubomfi wenu+ pantu e fyo mufwaya kabili e fyo mwalaile. 22 E mulandu wine mwabela abakalamba,+ mwe Shikulu Mulopwe Yehova. Takwaba uwaba nga imwe,+ kabili takwaba Lesa umbi ukucila pali imwe;+ fyonse ifyo twaumfwa filanga ukuti takwaba uwacila pali imwe. 23 Kabili luko nshi lumbi pe sonde ulwaba nga bantu benu abena Israele?+ Lesa ailebalubula pa kuti babe abantu bakwe+ kabili alibacitiile ifya maka kabili ifya kutiinya+ pa kuti aipangile ishina.+ Mwalitamfiisheko abantu benu abo mwalubwile mu Egupti inko na balesa ba shiko. 24 Mwalengele abena Israele baba abantu benu umuyayaya;+ kabili imwe, mwe Yehova nimwe Lesa wabo.+
25 “Nomba, mwe Yehova Lesa, fikilisheni ifyo mwalaya umubomfi wenu na ba mu ng’anda yakwe umuyayaya, kabili fikilisheni ifyo mulaile.+ 26 Abantu bengalalumbanya ishina lyenu umuyayaya,+ pa kuti bakalelanda abati, ‘Yehova wa mabumba ni Lesa wa bena Israele,’ kabili ing’anda ya mubomfi wenu Davidi ikabeko umuyayaya.+ 27 Pantu mwe Yehova wa mabumba, Lesa wa kwa Israele, mwasokolwela umubomfi wenu amuti, ‘Nkakukuulila ing’anda.’*+ E co umubomfi wenu akwatile amaka ya kupepa ili ipepo kuli imwe. 28 Kabili nomba mwe Shikulu Mulopwe Yehova, nimwe Lesa wa cine, amashiwi yenu ya cine,+ kabili namulaya umubomfi wenu ifi ifintu ifisuma. 29 E ico paaleni ing’anda ya mubomfi wenu, kabili naitwalilile ukubako;+ pantu imwe, mwe Shikulu Mulopwe Yehova namulaya, kabili pa mulandu we paalo lyenu, ing’anda ya mubomfi wenu ingapaalwa umuyayaya.”+