Impendwa

1 Kabili Yehova alandile na Mose mu matololo ya Sinai,+ mwi tenti lya kukumaninamo,+ pa bushiku bwa kubalilapo ubwa mweshi wa bubili, mu mwaka wa bubili ukutula apo bafumiine mu calo ca Egupti.+ Amwebele ati: 2 “Pendeni ulukuta+ lonse ulwa bena Israele* umo na umo ukulingana ne ndupwa shabo, ukulingana na mayanda ya bashibo, kabili ukulingana na mashina ya baume bonse. 3 Iwe na Aarone mulembe bonse abali ne myaka 20 no kuya pa muulu+ abengaba abashilika mu Israele. Mufwile ukubalemba ukulingana na mabumba yabo.

4 “Mu mukowa umo na umo musendemo umwaume umo. Umwaume uo mwalasenda afwile ukuba umukalamba wa ng’anda ya kwa wishi.+ 5 Aya e mashina ya baume abakulamwafwilisha: mu mukowa wa kwa Rubene, ni Elisuri+ mwana Shedeuri; 6 mu wa kwa Simeone, ni Shelumiele+ mwana Surishadai; 7 mu wa kwa Yuda, ni Naashone+ mwana Aminadabu; 8 mu wa kwa Isakari, ni Netanele+ mwana Suari; 9 mu wa kwa Sebuluni, ni Eliabu+ mwana Helone; 10 mu bana ba kwa Yosefe: e kutila muli Efraimu,+ ni Elishama mwana Amihudi; muli Manase ni Gamaliele mwana Pedasuri; 11 mu mukowa wa kwa Benjamini ni Abidani+ mwana Gideoni; 12 mu wa kwa Dani, ni Ahiesere+ mwana Amishadai; 13 mu wa kwa Ashere, ni Pagiele+ mwana Okrani; 14 mu wa kwa Gadi, ni Eliasafi+ mwana Deuele; 15 mu wa kwa Naftali, ni Ahira+ mwana Enani. 16 Aba e bo baitile mu lukuta. E ntungulushi+ sha mikowa ya bashibo, kabili e bakalamba ba makana ya kwa Israele.”+

17 E ico Mose na Aarone basendele aba baume abo Lesa asalile. 18 Pa bushiku bwa kubalilapo ubwa mweshi wa bubili, balonganike ulukuta lonse pa kuti bonse balembeshe amashina yabo, ukulingana ne ndupwa shabo, kabili ukulingana na mayanda ya bashibo, ukutampila pa wa myaka 20 no kuya pa muulu,+ 19 nga filya fine Yehova aebele Mose. E ico alibalembele amashina mu matololo ya Sinai.+

20 Abatuntwike muli Rubene ibeli lya kwa Israele,+ balibalembele amashina yabo, ukulingana ne ndupwa shabo na mayanda ya bashibo. Umwaume onse uwali ne myaka 20 no kuya pa muulu, uwingaba umushilika balimupendele, 21 kabili bonse abo balembele amashina mu mukowa wa kwa Rubene, bali 46,500.

22 Abatuntwike muli Simeone,+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 23 kabili bonse abo balembele amashina mu mukowa wa kwa Simeone bali 59,300.

24 Abatuntwike muli Gadi+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 25 kabili bonse abo balembele amashina mu mukowa wa kwa Gadi bali 45,650.

26 Abatuntwike muli Yuda+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 27 kabili bonse abo balembele amashina mu mukowa wa kwa Yuda bali 74,600.

28 Abatuntwike muli Isakari+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 29 kabili bonse abo balembele amashina mu mukowa wa kwa Isakari bali 54,400.

30 Abatuntwike muli Sebuluni+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 31 kabili bonse abo balembele amashina mu mukowa wa kwa Sebuluni bali 57,400.

32 Abatuntwike muli Yosefe: e kutila mu mwana wakwe Efraimu,+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 33 kabili bonse abo balembele amashina mu mukowa wa kwa Efraimu bali 40,500.

34 Abatuntwike muli Manase,+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 35 kabili bonse abo balembele amashina mu mukowa wa kwa Manase bali 32,200.

36 Abatuntwike muli Benjamini+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 37 kabili bonse abo balembele amashina mu mukowa wa kwa Benjamini bali 35,400.

38 Abatuntwike muli Dani+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 39 kabili bonse abo balembele amashina mu mukowa wa kwa Dani bali 62,700.

40 Abatuntwike muli Ashere+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 41 kabili bonse abo balembele amashina mu mukowa wa kwa Ashere bali 41,500.

42 Abatuntwike muli Naftali+ balibalembele amashina yabo, ukulingana ne ndupwa shabo na mayanda ya bashibo. Umwaume onse ukutula pa wa myaka 20 no kuya pa muulu, uwingaba umushilika balimupendele, 43 kabili bonse abo balembele amashina mu mukowa wa kwa Naftali bali 53,400.

44 Aba e bo Mose na Aarone ne ntungulushi sha mu Israele 12 balembele. Onse uo balembele aleimininako ing’anda ya kwa wishi. 45 Umwina Israele onse uwali ne myaka 20 no kuya pa muulu, uwingaba umushilika balimulembele ukulingana ne ng’anda ya kwa wishi, 46 kabili bonse abo balembele bali 603,550.+

47 Lelo mu batuntwike mu mukowa wa kwa Lebi+ mwena tabalembelemo nangu umo.+ 48 E ico Yehova aebele Mose ati: 49 “Aba mu mukowa wa kwa Lebi wikabalemba, kabili wikabalunda ku mpendwa ya bena Israele bambi.+ 50 Upeele abena Lebi umulimo wa kusakamana itenti lya mushilo+ umwaba icipao ca Cipangano, kabili balesakamana ne fipe fya liko fyonse na fyonse ifyabamo.+ E bakalasenda itenti lya mushilo ne fipe fya liko fyonse,+ kabili e bakalabombela pe tenti.+ Kabili inkambi yabo ikaleshinguluka itenti lya mushilo.+ 51 Lyonse ilyo kwaba ukukuusha itenti lya mushilo, abena Lebi e bakalalipangulula;+ kabili ilyo kwaba ukupanga itenti lya mushilo, abena Lebi e bakalalipanga. Uushili mwina Lebi* nga apalamako afwile ukwipaiwa.+

52 “Umwina Israele onse akatanike itenti lyakwe pa ncende iyo bakamupeela mu nkambi, kabili cila muntu akabe mwi bumba lya mikowa itatu ilyo abamo+ ukulingana ne mikowa yabo. 53 Kabili abena Lebi bakalepanga inkambi ukushinguluka itenti lya mushilo umwaba icipao ca Cipangano, pa kuti ubukali bwandi bwikemina ulukuta lwa bena Israele;+ kabili abena Lebi e bafwile ukulabomba imilimo mwi tenti lya mushilo umwaba icipao ca Cipangano.”+

54 Abena Israele balicitile fyonse ifyo Yehova aebele Mose. Filya fine e fyo bacitile.