Yeremia
50 Aya e mashiwi Yehova aebele kasesema Yeremia pali Babiloni,+ icalo ca bena Kaldi, amwebele ati:
2 “Bilisheni ici ku nko.
Imyeni icishibilo kabili bilisheni.
Mwifisa nangu cimo.
Bilisheni amuti, ‘Babiloni nabaipoka.+
Bele nabamuseebanya.+
Merodaki ali no mwenso.
Ifimpashanya fyakwe nabafiseebanya.
Ifilubi fyakwe ifya bunani* fili no mwenso.’
3 Pantu uluko ulufumine ku kapinda ka ku kuso nalwisa mu kumulwisha.+
Nalulenga icalo cakwe caba ica kutiinya;
Takuli nangu umo uuleikalamo.
Abantu ne nama nafifulumuka,
Nafiya.”
4 “Muli shilya inshiku kabili pali ilya nshita,” e fyo Yehova alanda, “abena Israele na bekala mu Yuda,+ bakalongana pamo. Bakalaenda ninshi balelila+ kabili bonse bakafwaya Yehova Lesa wabo.+ 5 Bakepusha inshila yaya ku Sione, ninshi ifinso fyabo nafilosha ku Sione,+ bakalalanda abati, ‘Natuleya tuilunde kuli Yehova mu cipangano ca muyayaya icishakalabwe.’+ 6 Abantu bandi bali nge mpaanga ishaluba.+ Bakacema babo balibalufishe.+ Babatwele mu mpili umo bale-endauka ukufuma pa lupili ukuya pa kapili. Balilaba icifulo cabo ica kutuushishamo. 7 Bonse ababasanga balabepaya+ kabili abalwani babo balanda abati, ‘Tatwaba na mulandu pantu balibembukile Yehova, balibembukile icifulo umwaba ubulungami kabili isubilo lya fikolwe fyabo, Yehova.’”
8 “Fulumukeni mu Babiloni,
Fumeni mu calo ca bena Kaldi,+
Kabili beni nge nama ishiletungulula umukuni.
9 Pantu moneni, ndeimya ibumba lya nko ishikalamba
Isha ku calo ca ku kapinda ka ku kuso.+ Kabili ndeshileta mu kulwisha Babiloni.
Bakesa ninshi nabaipekanya ukulwa nankwe.
Kulya e ko bakamwikatila.
Imifwi yabo yaba nge mifwi ya mushilika
Iilenga abafyashi bafwilwa abana;+
Tababwelelamo ukwabula ukucita nangu cimo.
10 Icalo ca bena Kaldi bakacipoka.+
Bonse abakasenda ifyabamo bakasenda ifintu ifingi ukulingana ne fyo balefwaya,”+ e fyo Yehova alanda.
Pantu mwaletolauka nge ng’ombe iyana mu cani,
Kabili mwalelila nga bakabalwe abalume.
Uwamufyele naumfwa insoni.
Moneni! E wacepesha mu nko,
Ali nga matololo umushaba amenshi kabili nge ciswebebe.+
Onse uukalapita mupepi na Babiloni akalatiina
Kabili akalalisha umunsoli pa mulandu wa fyabipa fyonse ifikacitikila uyu umusumba.+
15 Mushingulukeni kabili muweleshe ukuwelesha kwa nkondo.
Babiloni nacimba.*
Mulanduleni.
Mumucite nge fyo acita.+
16 Mwishamo uutanda imbuto nangu umo mu Babiloni
Mwishamo no ubomfya icikwakwa mu nshita ya kusombola.+
Pa mulandu wa lupanga ulukali, cila muntu akabwelela ku bantu bakwe,
Cila muntu akafulumukila ku calo cakwe.+
17 “Abena Israele bali nge mpaanga ishasalangana.+ Inkalamo shalibapasa.+ Imfumu ya ku Asiria e yabalilepo ukubalya;+ Lyena Imfumu Nebukadnesari* iya ku Babiloni e yakokwete amafupa yabo.+ 18 E ico Yehova wa mabumba, Lesa wa kwa Israele alanda ati: ‘Nkakanda imfumu ya ku Babiloni ne calo ca iko nga filya nakandile imfumu ya kwa Asiria.+ 19 Kabili nkabwesesha abena Israele ku calo cabo ica mulemfwe,+ bakalya umulemfwe mu Karmele na mu Bashani+ kabili bakekuta* mu calo ca mpili ica kwa Efraimu+ ne ca Gileadi.’”+
20 “Muli shilya nshiku kabili pali ilya nshita,” e fyo Yehova alanda,
“Bakafwaya ifilubo fya kwa Israele,
Lelo tabakafisange,
Bakafwaya ne membu sha kwa Yuda, lelo tabakashisange,
Pantu nkeleela abo nkaleka bakashalepo.”+
21 “Kalwisheni icalo ca Merataimu na bekala mu Pekode.+
Kabepayauleni bonse,” e fyo Yehova alanda.
“Mucite fyonse ifyo mwebele.
22 Mu calo muli icongo ca nkondo,
Muli ubucushi ubukalamba.
23 Iye, ifyo sando iitobaula inko shonse isha pano sonde baiputaula no kuyonaula!+
Iye, ifyo Babiloni aba ica kutiinya mu nko!+
24 Ninkuteya iciteyo kabili nawikatwamo we Babiloni,
Tawaishiba no kwishiba.
Balikusangile kabili balikwikete,+
Pantu ni Yehova e o walelwisha.
25 “Yehova naisula umo asungila ifintu,
Kabili afumyamo ifyanso ifyo abomfya pa kulanga ubukali bwakwe.+
Pantu Shikulu Mulopwe, Yehova wa mabumba, nakwata umulimo wa kubomba
Mu calo ca bena Kaldi.
26 Fumeni ku fifulo ifyaba ukutali, mwise mu mulwishe.+
Isuleni umo asungila ingano.+
Mutuulikeni nge miina ya ngano.
Monauleni onse.+
Mwishala nangu umo muli ena.
We bulanda kuli bena pantu ubushiku bwabo nabufika,
Inshita ya kubakanda naifika!
28 “Kuli icongo ca balefulumuka,
Abalefyuka ukufuma mu calo ca Babiloni,
Pa kuti bayeshimika mu Sione abati, Yehova Lesa wesu alelandula,
Alelandwilako itempele lyakwe.+
Mushingeni kabili mwileka nangu umo abutuke.
Mulanduleni ukulingana ne fyo acita.+
Muciteni ukulingana ne fyo alecita abantu bambi.+
Pantu alacita ifilanga ukuti wa cilumba kuli Yehova,
Ku Wa Mushilo wa kwa Israele.+
30 E ico abalumendo bakwe bakafwila mu mansa shakwe,+
Na bashilika bakwe bonse bakafwa* muli bulya bushiku,” e fyo Yehova alanda.
31 “Mona! Ninkwimina+ we cintomfwa,”+ e fyo Shikulu Mulopwe, Yehova wa mabumba alanda
“Pantu ubushiku bobe bufwile ukwisa ne nshita ilyo nkakukanda.
Nkasonteka umulilo mu misumba yobe,
Kabili ukoca fyonse ifyakushinguluka.”
33 Yehova wa mabumba alanda ati:
“Abena Israele na baYuda balebacusha,
Kabili bonse ababasenda mu kuyaba bankole balibekatilila.+
Tabafwaya ukubaleka baya.+
34 Lelo Kalubula wabo wa maka.+
Yehova wa mabumba e shina lyakwe.+
Akabalubulwilako,+
Pa kuti akalenge icalo cikatuushe+
Na pa kuti akalenge abekala mu Babiloni bakomfwe umwenso.”+
35 “Kuli ulupanga ulwimiine abena Kaldi,” e fyo Yehova alanda,
“Ulwimiine abekala mu Babiloni ne ntungulushi shabo na ba mano babo.+
36 Kuli ulupanga ulwimiine abalanda ifya fye,* kabili bakalacita ifya buwelewele.
Kuli ulupanga ulwimiine abashilika bakwe, kabili bakomfwa umwenso.+
37 Kuli ulupanga ulwimiine bakabalwe babo na maceleta yabo aya nkondo,
Kabili ulwimiine abantu bonse abalekanalekana abekala muli ena,
Kabili bakaba nga banakashi.+
Kuli ulupanga ulwimiine ifyuma fyakwe, kabili bakafisenda.+
38 We bulanda ku menshi yakwe, yakakama.+
Pantu muli ici calo mwaliba ifilubi ifingi,+
Kabili pa mulandu wa fimonwa fyabo ifya kutiinya, bacita nga bapena.
39 E ico inama sha mu ciswebebe shikekala pamo ne nama ishikuwa,
Kabili muli ena e mo bamwakatala bakekala,+
Tamwakatale amwikala nangu umo,
Takwakabe uukekalamo mu nkulo shonse.”+
40 “Nga filya fine cali ilyo Lesa aonawile Sodomu na Gomora+ ne misumba iinono iyali mupepi,”+ e fyo Yehova alanda, “tamwakatale amwikala umuntu nangu umo.+
41 “Moneni! Abantu bakafuma ku kapinda ka ku kuso;
Uluko ulukalamba ne mfumu ishikalamba+ bakashimya
Ukufuma ku ncende ishaba ukutali sana isha pe sonde.+
Bankalwe kabili tabakomfwile nangu umo uluse.+
Icongo ca bakabalwe banininepo,
Cileumfwika ngo kululuma kwa bemba,+
Bali no mutima umo ilyo batantama ukuti balwe na iwe, we mwana mwanakashi Babiloni.+
Yasakamikwa nga nshi,
Yaumfwa ubukali nga bulya umwanakashi uulepaapa omfwa.
44 “Moneni! Nga filya inkalamo ifuma mu mpanga umwaba ifimuti ifyatitikana iyaba mu mbali ya Yordani, e fyo umuntu umo akesa mu kusansa impanga ya mulemfwe iyacingililwa, lelo mu nshita fye iinono nkalenga akafulumukemo. Kabili nkamusontela uwa kumutungulula uo nasala.+ Pantu nani uwaba nga ine kabili nani uwingalubulula na ine? Ni kacema nshi uwingeminina pa ntanshi yandi?+ 45 E ico umfweni mwe bantu ifyo Yehova apingwile Babiloni+ ne fyo apingwile icalo ca bena Kaldi.
Nangu cibe shani impaanga ishana bakashikululula.
Akalenga icifulo bekalamo cikabe icibolya pa mulandu wabo.+